www.ranjithkumarak.blogspot.in
************************
Dt.26.6.2019.
************************
രണ്ടാം സപ്ലിമെന്ററി അലോട്ട്‌മെന്റിനുശേഷമുളള വേക്കൻസി ജില്ല/ജില്ലാന്തര സ്‌കൂൾ/കോമ്പിനേഷൻ ട്രാൻസ്ഫർ അലോട്ട്‌മെന്റിനായി അഡ്മിഷൻ വെബ്‌സൈറ്റായ www.hscap.kerala.gov.in ൽ ഇന്ന് രാവിലെ പ്രസിദ്ധീകരിക്കും. ഇതുവരെ ഏകജാലക സംവിധാനത്തിൽ മെരിറ്റ് ക്വാട്ടയിലോ, സ്‌പോർട്‌സ് ക്വാട്ടയിലോ പ്രവേശനം നേടിയ വിദ്യാർത്ഥികൾക്ക് ഒന്നാം ഓപ്ഷനിലാണ് പ്രവേശനം നേടിയതെങ്കിൽ പോലും ട്രാൻസ്ഫറിന് അപേക്ഷിക്കാം. ജില്ലയ്ക്കകത്തോ/മറ്റ് ജില്ലയിലേക്കോ സ്‌ക്കൂൾ മാറ്റത്തിനോ കോമ്പിനേഷൻ മാറ്റത്തോടെയുളള സ്‌കൂൾ മാറ്റത്തിനോ നിശ്ചിത മാതൃകയിലുളള അപേക്ഷ അഡ്മിഷൻ നേടിയ സ്‌കൂളിൽ നാളെ (ജൂൺ 28ന്) ഉച്ചക്ക് മൂന്നിനുളളിൽ സമർപ്പിക്കണം.Dt.26.6.2019.
************************
സംസ്ഥാന കായികയുവജനകാര്യാലയത്തിനുകീഴിൽ പ്രവർത്തിക്കുന്ന ജി.വി.രാജ സ്‌പോർട്‌സ് സ്‌കൂളിലേക്കും കണ്ണൂർ സ്‌പോർട്‌സ് ഡിവിഷനിലേക്കും ഫുട്‌ബോൾ, അത്‌ലറ്റിക്‌സ്, ഹോക്കി, ജൂഡോ, ബോക്‌സിംഗ്, വോളിബോൾ, ക്രിക്കറ്റ്, വെയിറ്റ് ലിഫ്റ്റിംഗ്, റസ്ലിംഗ്, തായ്‌കോണ്ടോ വിഭാഗങ്ങളിൽ പരിശീലകരായി സീനിയർ ടെക്‌നിക്കൽ അസിസ്റ്റന്റ്, ജൂനിയർ ടെക്‌നിക്കൽ അസിസ്റ്റന്റ് തസ്തികയിൽ താത്കാലിക നിയമനം നടത്തുന്നു. സീനിയർ ടെക്‌നിക്കൽ അസിസ്റ്റന്റ് തസ്തികയ്ക്ക് അതത് കായിക ഇനത്തിൽ പരിശീലകരായി പത്ത് വർഷത്തിൽ കുറയാത്ത പ്രവൃത്തി പരിചയം, എൻ.ഐ.എസ് ഡിപ്ലോമ അഥവാ അന്തർദേശീയ മത്സരങ്ങളിൽ മികവ് തെളിയിച്ചിട്ടുള്ള കായികതാരങ്ങളെ വളർത്തിയെടുത്തിട്ടുള്ള പരിചയം എന്നിവ അടിസ്ഥാന യോഗ്യതയായി പരിഗണിക്കും. ജൂനിയർ ടെക്‌നിക്കൽ അസിസ്റ്റന്റ് തസ്തികയ്ക്ക് എൻ.ഐ.എസ്/എം.പി.ഇ.ഡി യോഗ്യത, അതത് വിഭാഗത്തിലുള്ള പരിശീലന പരിചയം എന്നിവ അടിസ്ഥാന യോഗ്യതയായി പരിഗണിക്കും. അപേക്ഷകർക്കുള്ള പരമാവധി പ്രായപരിധി 60 വയസ്സാണ്. രണ്ട് തസ്തികകളിലേക്കും പരിശീലനരംഗത്തെ ആധുനിക സാങ്കേതിക വിദ്യയിലുള്ള പരിജ്ഞാനം അധികയോഗ്യതയായി പരിഗണിക്കും. www.sportskerala.org എന്ന വെബ്‌സൈറ്റിൽ ലഭ്യമായ നിശ്ചിതമാതൃകയിലുള്ള അപേക്ഷാഫോം പൂരിപ്പിച്ച് യോഗ്യത തെളിയിക്കുന്ന രേഖകളുടെ പകർപ്പുകൾ സഹിതം ജൂലൈ അഞ്ചിന് മുമ്പ് ഡയറക്ടർ, കായികയുവജന കാര്യാലയം, ജിമ്മി ജോർജ് ഇൻഡോർ സ്റ്റേഡിയം, വെള്ളയമ്പലം, തിരുവനന്തപുരം-33 എന്ന വിലാസത്തിൽ നേരിട്ടോ തപാൽ മുഖാന്തരമോ എത്തിക്കണം. ഫോൺ:0471-2326644.Dt.26.6.2019.
************************
കേരള സംസ്ഥാന വികലാംഗക്ഷേമ കോർപ്പറേഷന്റെ ഹസ്തദാനം പദ്ധതിയിൽ തീവ്രഭിന്നശേഷിയുളളവരും 2019 ഏപ്രിൽ ഒന്നിന് 12 വയസ്സിൽ താഴെ പ്രായമുളളതുമായ കുട്ടികളുടെ പേരിൽ സ്ഥിരനിക്ഷേപം നടത്തുന്നതിന് അപേക്ഷ ക്ഷണിച്ചു. 50 ശതമാനമോ അതിൽ കൂടുതലോ ഭിന്നശേഷിയുളള മുൻഗണനാ വിഭാഗത്തിൽപ്പെട്ട (വാർഷിക കുടുംബ വരുമാനം പരമാവധി ഒരു ലക്ഷം രൂപ) കുട്ടികളുടെ രക്ഷകർത്താക്കൾക്ക് അപേക്ഷിക്കാം. കുട്ടികൾക്ക് 18 വയസ്സാകുന്നതുവരെ 20,000 രൂപ നിക്ഷേപിക്കും. 18 വയസ്സ് പൂർത്തിയാകുന്നതോടെ നിക്ഷേപത്തുകയും പലിശയും കോർപ്പറേഷന്റെ അനുവാദത്തോടെ പിൻവലിക്കാം. അപേക്ഷ സ്വീകരിക്കുന്ന അവസാന തീയതി ആഗസ്റ്റ് അഞ്ച് വൈകുന്നേരം അഞ്ച് മണി. പൂരിപ്പിച്ച അപേക്ഷകൾ അനുബന്ധ രേഖകൾ സഹിതം മാനേജിംഗ് ഡയറക്ടർ, കേരള സംസ്ഥാന വികലാംഗക്ഷേമ കോർപ്പറേഷൻ, പൂജപ്പുര, തിരുവനന്തപുരം 12 എന്ന വിലാസത്തിൽ സമർപ്പിക്കാം. അപേക്ഷാഫോമും വിശദവിവരങ്ങളും www.hpwc.kerala.gov.in ൽ ലഭ്യമാണ്. കൂടുതൽ വിവരങ്ങൾക്ക് ഫോൺ: 0471-2347768, 7152, 7153, 7156.Dt.25.6.2019.
************************
സംസ്ഥാന പട്ടികവർഗ്ഗ വികസനവകുപ്പിനു കീഴിലുളള മോഡൽ റസിഡൻഷ്യൽ സ്‌ക്കൂളുകളിൽ എൻട്രൻസ് പരിശീലനം നൽകുന്നതിന് ഈ മേഖലയിൽ മൂന്നു വർഷം മുൻപരിചയമുളള സ്ഥാനപങ്ങളിൽ നിന്നും പ്രൊപ്പോസൽ ക്ഷണിച്ചു. പ്രൊപ്പോസലുകൾ ജൂലൈ അഞ്ച് വൈകിട്ട് മൂന്ന് വരെ സ്വീകരിക്കും. കൂടുതൽ വിവരങ്ങൾക്ക് വികാസ്ഭവനിലെ പട്ടികവർഗ്ഗ വികസന വകുപ്പ് ഡയറക്ടറുടെ ഓഫീസുമായി ബന്ധപ്പെടണം. ഫോൺ: 0471 - 2303229, 2304594 Dt.25.6.2019.
************************
ജൂലൈ 22ന് ആരംഭിക്കുന്ന ഒന്നാം വർഷ ഹയർ സെക്കന്ററി NSQF(VHSE) ഇംപ്രൂവ്‌മെന്റ്/ സപ്ലിമെന്ററി പരീക്ഷയെഴുതുന്ന റഗുലർ/ ലാറ്ററൽ എൻട്രി/ റീ അഡ്മിഷൻ വിദ്യാർത്ഥികൾക്ക് ഫീസ് അടയ്ക്കാനുള്ള തിയതി നീട്ടി. ഒന്നാംവർഷ ഇംപ്രൂവ്‌മെന്റ്/ സപ്ലിമെന്ററി പരീക്ഷയ്ക്ക് മാതൃസ്‌കൂളുകളിൽ ജൂൺ 27 വരെ അപേക്ഷ നൽകാം. സ്‌കൂൾ പ്രിൻസിപ്പൽമാർ 28ന് ട്രഷറിയിൽ ഫീസ് ഒടുക്കണം. വകുപ്പ് പോർട്ടൽ വഴി പരീക്ഷാർത്ഥികളുടെ ഓൺലൈൻ രജിസ്‌ട്രേഷനും ചോദ്യപേപ്പർ വിശദാംശങ്ങളും 29ന് അപ്‌ലോഡ് ചെയ്യണം.Dt.24.6.2019.
************************
എൻ.സി.സിയിൽ കരാർ അടിസ്ഥാനത്തിൽ സംസ്ഥാനത്തെ പൂർവ്വ എൻ.സി.സി വനിത കേഡറ്റുകളെ കേഡറ്റ് അഡ്മിനിസ്‌ട്രേറ്ററായി നിയമിക്കുന്നു. ബിരുദവും എൻ.സി.സി 'സി' സർട്ടിഫിക്കറ്റും നേടിയവർക്ക് അപേക്ഷിക്കാം. അപേക്ഷ ജൂലൈ 10 ന് വൈകിട്ട് അഞ്ചിനകം എൻ.സി.സി ഡയറക്ടറേറ്റ് (കെ&എൽ) സംസ്ഥാന വിഭാഗം, വഴുതക്കാട്, തിരുവനന്തപുരം എന്ന വിലാസത്തിൽ സ്വീകരിക്കും. കൂടുതൽ വിവരങ്ങൾക്ക്: www.keralancc.org, 0471-2721278.Dt.24.6.2019.
************************
കമ്മാറ സമുദായത്തെ സംസ്ഥാന ഒ.ബി.സി പട്ടികയിൽ ഉൾപ്പെടുത്തി സംവരണ ആനുകൂല്യം അനുവദിച്ച് ഉത്തരവായി. കേരള സംസ്ഥാന പിന്നാക്ക വിഭാഗ കമ്മിഷന്റെ ശുപാർശ അംഗീകരിച്ചാണ് ഉത്തരവ്.Dt.22.6.2019.
************************
ഏകജാലക സംവിധാനത്തിന്റെ വിവിധ അലോട്ട്‌മെന്റുകളിൽ അപേക്ഷിച്ചിട്ടും അലോട്ട്‌മെന്റ് ലഭിക്കാത്തവർക്കും അപേക്ഷ സമർപ്പിക്കാൻ കഴിയാത്തവർക്കും രണ്ടാം സപ്ലിമെന്ററി അലോട്ട്‌മെന്റ് ഫലം, അഡ്മിഷൻ വെബ്‌സൈറ്റായ"www.hscap.kerala.gov.in"ലെ "SUPPLEMENTARY RESULTS" എന്ന ലിങ്കിലൂടെ പരിശോധിക്കാം. ലിങ്കിലൂടെ ലഭിക്കുന്ന രണ്ടു പേജുളള അലോട്ട്‌മെന്റ് സ്ലിപ്പുമായി അലോട്ട്‌മെന്റ് ലഭിച്ച സ്‌കൂളിൽ 24ന് രാവിലെ 10 മണി മുതൽ ഹാജരാകണം. ജൂൺ 25ന് വൈകിട്ട് നാലിനു മുമ്പ് സ്ഥിരപ്രവേശനം നേടണം. ഏകജാലക സംവിധാനത്തിൽ മെരിറ്റ് ക്വാട്ടയിലും, സ്‌പോർട്‌സ് ക്വാട്ടയിലും പ്രവേശനം നേടിയ വിദ്യാർത്ഥികൾക്ക് ആവശ്യമെങ്കിൽ ജില്ലയ്ക്കകത്തോ/മറ്റു ജില്ലയിലെ സ്‌കൂളുകളിലേക്കോ/കോഴ്‌സുകളിലേക്കോ മാറ്റത്തിന് അപേക്ഷിക്കാനുളള ഒഴിവും തുടർ നിർദ്ദേശങ്ങളും 27ന് രാവിലെ പത്തിന് വെബ്‌സൈറ്റിൽ പ്രസിദ്ധീകരിക്കും.Dt.22.6.2019.
************************
വൊക്കേഷണൽ ഹയർ സെക്കന്ററി ഒന്നാം വർഷ ഇംപ്രൂവ്‌മെന്റ് പരീക്ഷകൾ ജൂലൈ 22 മുതൽ ആരംഭിക്കും. റഗുലർ വിഭാഗം വിദ്യാർത്ഥികൾ ഫീസടച്ച് അപേക്ഷകൾ ജൂൺ 25 നകവും രൺണ്ടാം വർഷ അന്തിമ പരീക്ഷയിൽ യോഗ്യത നേടാത്ത പ്രൈവറ്റ് വിഭാഗം വിദ്യാർത്ഥികൾ ഫീസടച്ച് ചെലാൻ സഹിതം അപേക്ഷകൾ ജൂലൈ മൂന്നിനകവും പഠിച്ച സ്‌കൂളുകളിൽ നൽകണം. പരീക്ഷ സംബന്ധിച്ച കൂടുതൽ വിവരങ്ങൾ വി.എച്ച്.എസ്.ഇ പരീക്ഷാ കേന്ദ്രങ്ങളിലും vhsems.kerala.gov.in ലും ലഭ്യമാണ്.Dt.22.6.2019.
************************
ഹയർസെക്കൻഡറി/ NSQF (VHSE) ഒന്നാം വർഷ ഇംപ്രൂവ്‌മെന്റ്/ സപ്ലിമെന്ററി പരീക്ഷ ജൂലൈ 22 മുതൽ 29 വരെ നടക്കും. ഗൾഫ് മേഖലയിലെ സ്‌കൂളുകളിൽ പരീക്ഷയ്ക്ക് രജിസ്റ്റർ ചെയ്യുന്ന വിദ്യാർത്ഥികൾക്ക് യു.എ.ഇയിലുള്ള പരീക്ഷാകേന്ദ്രത്തിലോ അതത് വിഷയ കോമ്പിനേഷനുള്ള കേരളത്തിലെ ഏതെങ്കിലും പരീക്ഷാകേന്ദ്രത്തിലോ പരീക്ഷയെഴുതാം. മാർച്ച് 2019ലെ ഒന്നാം വർഷ ഹയർ സെക്കൻഡറി NSQF (VHSE) പരീക്ഷയിൽ എഴുതിയ ആറ് വിഷയങ്ങളിൽ മൂന്നെണ്ണം വരെ സ്‌കോർ മെച്ചപ്പെടുത്തുന്നതിനും രജിസ്റ്റർ ചെയ്തതിൽ പരീക്ഷ എഴുതാത്ത വിഷയങ്ങളുണ്ടെങ്കിൽ അവ എഴുതുന്നതിനും റഗുലർ വിദ്യാർത്ഥികൾക്ക് രജിസ്റ്റർ ചെയ്യാം. 2019ലെ ഒന്നാം വർഷ ഹയർ സെക്കൻഡറി പരീക്ഷയിലോ സപ്ലിമെന്റി പരീക്ഷയിലോ ആറ് വിഷയങ്ങളും എഴുതിയിട്ടുണ്ടെങ്കിൽ മാത്രമേ റഗുലർ വിദ്യാർത്ഥികൾക്ക് 2020 മാർച്ചിലെ രണ്ടാംവർഷ ഹയർ സെക്കൻഡറി പരീക്ഷയ്ക്ക് രജിസ്റ്റർ ചെയ്യാൻ സാധിക്കു. മറ്റു പരീക്ഷാ ബോർഡുകളിൽ നിന്നും 2019ൽ രണ്ടാംവർഷ ഹയർ സെക്കൻഡറി കോഴ്‌സിലേക്ക് പുനഃപ്രവേശനം നേടിയിട്ടുള്ള വിദ്യാർത്ഥികൾ (ലാറ്ററൽ എൻട്രി വിഭാഗം) സപ്ലിമെന്ററി പരീക്ഷ എഴുതിയാൽ മാത്രമേ 2020ലെ രണ്ടാം വർഷ ഹയർ സെക്കൻഡറി പരീക്ഷയ്ക്ക് രജിസ്റ്റർ ചെയ്യാനാവൂ. ഇവർക്ക് ഹയർ സെക്കൻഡറി പരീക്ഷയുടെ ഭാഗമായ നിരന്തര മൂല്യനിർണയം, പ്രായോഗിക പരീക്ഷ എന്നിവ ബാധകമായിരിക്കും. രണ്ടാംവർഷ ഹയർസെക്കൻഡറി കോഴ്‌സ് പൂർത്തീകരിച്ച് 2015 മുതലുള്ള ഒന്നാംവർഷ ഹയർസെക്കൻഡറി പരീക്ഷയ്ക്ക് രജിസ്റ്റർ ചെയ്യുകയും എന്നാൽ പരീക്ഷ എഴുതാൻ കഴിയാതിരുന്ന വിദ്യാർത്ഥികൾ (കമ്പാർട്ട്‌മെൻൽ വിഭാഗം) സപ്ലിമെന്ററി പരീക്ഷയ്ക്ക് രജിസ്റ്റർ ചെയ്യുന്നതോടെ 2020 മാർച്ചിലെ രണ്ടാംവർഷ ഹയർസെക്കൻഡറി പരീക്ഷയ്ക്ക് രജിസ്റ്റർ ചെയ്യാൻ യോഗ്യത നേടും. ഈ വിഭാഗം വിദ്യാർത്ഥികൾക്കും ഹയർസെക്കൻഡറി പരീക്ഷയുടെ ഭാഗമായ നിരന്തര മൂല്യനിർണയം, പ്രായോഗിക പരീക്ഷ എന്നിവ നടത്തും. സ്‌കൂൾ ഗോയിങ് വിഭാഗത്തിൽപ്പെട്ട വിദ്യാർത്ഥികൾക്ക് ഒന്നാംവർഷ ഹയർസെക്കൻഡറി കോഴ്‌സിന് 75 ശതമാനത്തിൽ കുറയാത്ത ഹാജർ വേണം. 2015 മുതലുള്ള ഒന്നാംവർഷ ഹയർ സെക്കൻഡറി പരീക്ഷയ്ക്ക് രജിസ്റ്റർ ചെയ്യുകയോ എഴുതുകയോ ചെയ്ത വിദ്യാർത്ഥികൾ രണ്ടാംവർഷത്തിൽ പരാജയപ്പെട്ട വിഷയങ്ങൾ എഴുതാൻ ഇപ്പോൾ രജിസ്റ്റർ ചെയ്താൽ മാത്രമേ 2020ലെ രണ്ടാംവർഷ മാർച്ച് പരീക്ഷയ്ക്ക് രജിസ്റ്റർ ചെയ്യാനാവൂ. ഈ വിഭാഗത്തിലെ വിദ്യാർത്ഥികൾ നേടിയിട്ടുള്ള സി.ഇ സ്‌കോർ, പ്രാക്ടിക്കൽ സ്‌കോർ എന്നിവ നിലനിൽക്കും. കമ്പ്യൂട്ടർ സയൻസ് ആന്റ് ഇൻഫർമേഷൻ ടെക്‌നോളജി, ഇലക്‌ട്രോണിക് സിസ്റ്റംസ് വിഷയങ്ങൾ ഒഴികെയുള്ളവയ്ക്ക് 2014 അഡ്മിഷൻ മുതലുള്ള പാഠ്യപദ്ധതി പ്രകാരമുള്ള പുതിയ സിലബസിലാണ് പരീക്ഷ. കമ്പ്യൂട്ടർ സയൻസ് ആന്റ് ഇൻഫർമേഷൻ ടെക്‌നോളജിക്കും ഇലക്‌ട്രോണിക് സിസ്റ്റംസും പുതിയ സിലബസിലും പഴയതിലും പരീക്ഷ ഉണ്ടായിരിക്കും. കമ്പാർട്ട്‌മെന്റൽ വിദ്യാർത്ഥികൾക്ക് ഒന്നാംവർഷ ഇംപ്രൂവ്‌മെന്റ് പരീക്ഷയ്ക്ക് ഒറ്റത്തവണ രജിസ്‌ട്രേഷനാണ്. പരീക്ഷയ്ക്ക് രജിസ്റ്റർ ചെയ്യുന്ന വിഷയത്തിൽ ജൂലൈ 2019 ലെ ഒന്നാംവർഷ ഇംപ്രൂവ്‌മെന്റ് പരീക്ഷയ്ക്കും മാർച്ച് 2020ലെ രണ്ടാംവർഷ പരീക്ഷയ്ക്കും രജിസ്റ്റർ ആകും. ഇവയുടെ പരീക്ഷാഫീസ് ഒന്നിച്ച് ഒടുക്കണം. റഗുലർ, ലാറ്ററൽ എൻട്രി വിഭാഗത്തിലെ വിദ്യാർത്ഥികൾ 25നകവും കമ്പാർട്ട്‌മെന്റൽ വിഭാഗം വിദ്യാർത്ഥികൾ ജൂലൈ മൂന്നിനകവും ഫീസ് അടയ്ക്കണം. റഗുലർ, ലാറ്ററൽ എൻട്രി വിഭാഗത്തിൽപ്പെട്ട വിദ്യാർത്ഥികൾക്ക് ഒരു പേപ്പറിന് 175 രൂപയാണ് പരീക്ഷാഫീസ്. സർട്ടിഫിക്കറ്റ് ഫീസ് 40 രൂപ. കമ്പാർട്ട്‌മെന്റൽ വിഭാഗത്തിൽപ്പെട്ട വിദ്യാർത്ഥികൾക്കുള്ള പരീക്ഷാഫീസ് ഒരു പേപ്പറിന് 225 രൂപയും സർട്ടിഫിക്കറ്റ് ഫീസ് 80 രൂപയുമാണ്. വിജ്ഞാപനം www.dhsekerala.gov.in ൽ ലഭ്യമാണ്.Dt.22.6.2019.
************************
2020 ലെ നീറ്റ് എൻജിനീയറിംഗ് എൻട്രൻസ് പരീക്ഷകൾക്ക് ഒരു വർഷത്തെ കോച്ചിംഗ് ക്ലാസ്സിൽ പങ്കെടുത്ത് പരിശീലനത്തിന് പട്ടികവർഗ വിദ്യാർത്ഥി വിദ്യാർത്ഥിനികളിൽ നിന്നും അപേക്ഷ ക്ഷണിച്ചു. 2019 മാർച്ചിലെ പ്ലസ്ടു സയൻസ്, കണക്ക് വിഷയമെടുത്ത് കുറഞ്ഞത് നാല് വിഷയത്തിനെങ്കിലും ബി ഗ്രേഡിൽ കുറയാതെ ഗ്രേഡു ലഭിച്ചു വിജയിച്ചവരും 2019 ലെ മെഡിക്കൽ പൊതു പ്രവേശന പരീക്ഷയിൽ 15 ശതമാനത്തിൽ കുറയാതെ സ്‌കോർ നേടിയവർക്ക് അപേക്ഷിക്കാം. 2019 ലെ മെഡിക്കൽ പ്രവേശന പരീക്ഷയിൽ ഒരു വർഷം നീണ്ടു നിന്ന പരിശീലനത്തിൽ പങ്കെടുത്തതും 25 ശതമാനത്തിൽ കുറയാതെ സ്‌കോർ നേടിയ വിദ്യാർത്ഥികളെയും മതിയായ അപേക്ഷകരില്ലാത്ത സാഹചര്യത്തിൽ പരാമർശിത പരിശീലനത്തിനു പരിഗണിക്കും. എന്നാൽ രണ്ടിൽ കൂടുതൽ പ്രവേശന പരീക്ഷാ പരിശീലനത്തിൽ പങ്കെടുത്തവരെ പരിഗണിക്കില്ല. ഏറ്റവും യോഗ്യരായ 80 പേരെ തിരഞ്ഞെടുത്ത് 2020 ലെ നീറ്റ്, എൻജിനിയറിംഗ് കോഴ്‌സുകൾക്ക് പ്രവേശനം ലഭിക്കുന്നതിന് താമസ, ഭക്ഷണ സൗകര്യത്തോടെ സംസ്ഥാനത്തെ പ്രശസ്തമായ പരിശീലന സ്ഥാപനങ്ങളിൽ ഒരു വർഷത്തെ പ്രത്യേക പ്രവേശന പരീക്ഷാ പരിശീലന പരിപാടി നടത്തും. താൽപര്യമുള്ള പട്ടികവർഗ വിദ്യാർത്ഥികൾ പേര്, മേൽവിലാസം, ബന്ധപ്പെടാവുന്ന ഫോൺ നമ്പർ, പരിശീലനം ക്രമീകരിക്കുന്ന സ്ഥലത്ത് താമസിച്ചു പരിപാടിയിൽ പങ്കെടുക്കുന്നതിനുള്ള സമ്മതപത്രം, ഇവ വെള്ളക്കടലാസിൽ രേഖപ്പെടുത്തി രക്ഷിതാവിന്റെ സമ്മതപത്രം, പ്ലസ്ടു പരീക്ഷയുടെ സർട്ടിഫിക്കറ്റിന്റെയും 2019 പ്രവേശന പരീക്ഷയുടെ സ്‌കോർ ഷീറ്റിന്റെ പകർപ്പ്, ജാതി, വരുമാന സർട്ടിഫിക്കറ്റുകളുടെ പകർപ്പു സഹിതം നെടുമങ്ങാട്, കാഞ്ഞിരപ്പള്ളി, ഇടുക്കി, അട്ടപ്പാടി, കണ്ണൂർ, നിലമ്പൂർ, കൽപ്പറ്റ എന്നീ പ്രോജക്ടാഫീസുകളിലും പുനലൂർ, റാന്നി, അടിമാലി, മൂവാറ്റുപുഴ, ചാലക്കുടി, പാലക്കാട്, സുൽത്താൻബത്തേരി, മാനന്തവാടി, കാസർഗോഡ്, കോഴിക്കോട് എന്നീ ട്രൈബൽ ഡെവലപ്‌മെന്റ് ഓഫീസുകളിൽ ജൂൺ 26 ന് അഞ്ചു മണിക്കു മുമ്പ് ബന്ധപ്പെട്ട ഐ.റ്റി.ഡി. പ്രോജക്ട് ഓഫീസർ/ട്രൈബൽ ഡെവലപ്‌മെന്റ് ഓഫീസർമാർക്ക് ലഭ്യമാക്കണം. നിശ്ചിത സമയത്തിനകം ലഭിക്കാത്തതും ആവശ്യമായ രേഖകൾ ഇല്ലാത്തതുമായ അപേക്ഷകൾ പരിഗണിക്കില്ല. തിരഞ്ഞെടുക്കപ്പെട്ടവരുടെ പരിശീലനത്തിനായുള്ള മുഴുവൻ ചെലവും, താമസ, ഭക്ഷണ സൗകര്യം, ഓണം, ക്രിസ്മസ്, വിഷു എന്നീ അവധിക്കാലത്തിൽ രക്ഷിതാവിനെ കൂട്ടി വീട്ടിൽ പോയി വരുന്നതിനുള്ള ചെലവടക്കം സർക്കാർ വഹിക്കും.Dt.22.6.2019.
************************
2019ലെ സംസ്ഥാനത്തെ പ്രൈമറി, സെക്കന്ററി അധ്യാപകർക്കുളള അവാർഡിന് പൊതു വിദ്യാഭ്യാസ ഡയറക്ടർ അപേക്ഷ ക്ഷണിച്ചു. ജൂലൈ 10 വരെ വിദ്യാഭ്യാസ ഉപഡയറക്ടർക്ക് അപേക്ഷ നൽകാം. വിശദ വിവരങ്ങൾ www.education.kerala.gov.in ൽ ലഭ്യമാണ്.Dt.21.6.2019.
************************
സംസ്ഥാനത്തെ എയ്ഡഡ് ഹയർ സെക്കൻഡറി സ്‌കൂൾ അധ്യാപകരെ നിയമിക്കുന്നതിനുള്ള സെലക്ഷൻ കമ്മിറ്റിയിൽ അംഗമാകുന്നതിന് താത്പര്യമുള്ള ഡെപ്യൂട്ടി സെക്രട്ടറി/ ഡെപ്യൂട്ടി കളക്ടർ റാങ്കിൽ കുറയാത്ത ഉദ്യോഗസ്ഥർ അവരുടെ പേരുവിവരങ്ങൾ ഡയറക്ടറേറ്റ് ഓഫ് ജനറൽ എഡ്യൂക്കേഷൻ, ഹയർ സെക്കൻഡറി വിങ്, ഹൗസിംഗ് ബോർഡ് ബിൽഡിംഗ്, ശാന്തി നഗർ, തിരുവനന്തപുരം എന്ന വിലാസത്തിൽ ജൂൺ 28ന് മുമ്പ് നൽകണം. ജില്ലാ കളക്ടർ മുഖേന ഇതിനകം അറിയിച്ചിട്ടുള്ളവർ വീണ്ടും അപേക്ഷ നൽകേണ്ടതില്ല.Dt.21.6.2019.
************************
ജൂൺ 22, 29 തിയതികളിൽ നടക്കുന്ന കേരള ടീച്ചേഴ്‌സ് എലിജിബിലിറ്റി ടെസ്റ്റ് (കെ-ടെറ്റ്) പരീക്ഷയുടെ ഹാൾടിക്കറ്റ് പരീക്ഷാഭവൻ വെബ്‌സൈറ്റിൽ നിന്ന് ഡൗൺലോഡ് ചെയ്യാം. ആപ്ലിക്കേഷൻ ഐ.ഡിയും ആപ്ലിക്കേഷൻ നമ്പരും നഷ്ടപ്പെട്ടവർക്ക് പരീക്ഷാഭവന്റെ വെബ്‌സൈറ്റിൽ നിന്നും ലഭിക്കും. ktet.kerala.gov.in ലെ വിജ്ഞാപനത്തിൽ വ്യവസ്ഥ ചെയ്തിരിക്കുന്നത് പ്രകാരമുള്ള (പരീക്ഷാർത്ഥിയുടെ പേരും തീയതിയും) ഫോട്ടോ അപ്‌ലോഡ് ചെയ്യാത്തവർക്ക് ഹാൾടിക്കറ്റ് ലഭിക്കില്ല. ഹാൾടിക്കറ്റ് ലഭ്യമാകാത്തവർക്ക് വിജ്ഞാപനപ്രകാരമുള്ള ഫോട്ടോ അപ്‌ലോഡ് ചെയ്ത് ഹാൾടിക്കറ്റ് പ്രിന്റെടുക്കുന്നതിന് 20 വരെ അവസരം ലഭിക്കും.Dt.17.6.2019.
************************
കേരള കർഷകത്തൊഴിലാളി ക്ഷേമപദ്ധതിയിലെ അംഗങ്ങളുടെ മക്കൾക്ക് 2019 മാർച്ചിലെ എസ്.എസ്.എൽ.സി/റ്റി.എച്ച്.എസ്.എൽ.സി, പ്ലസ് ടു, ഡ്രിഗ്രി, പി.ജി, ടി.ടി.സി, ഐ.ടി.ഐ, ഐ.ടി.സി, പോളിടെക്‌നിക്, ജനറൽ നഴ്‌സിംഗ്, പ്രൊഫഷണൽ ഡിഗ്രി, എം.ബി.ബി.എസ്, പ്രൊഫഷണൽ പി.ജി, മെഡിക്കൽ പി.ജി, പരീക്ഷയിൽ ലഭിച്ച ഉയർന്ന മാർക്കിന്റെ അടിസ്ഥാനത്തിൽ പാരിതോഷികം നൽകുന്നതിന് തിരുവനന്തപുരം ജില്ലയിലെ ക്ഷേമനിധി അംഗങ്ങളിൽ നിന്നും നിശ്ചിത ഫോമിലുള്ള അപേക്ഷ ക്ഷണിച്ചു. 2019 എസ്.എസ്.എൽ.സി/റ്റി.എച്ച്.എസ്.എൽ.സി. പരീക്ഷ ആദ്യ അവസരത്തിൽ പാസായവരും 80ഉം 80ൽ കൂടുതലും പോയിന്റ് നേടിയവരുമായ ഗവൺമെന്റ്/എയ്ഡഡ് സ്‌കൂൾ വിദ്യാർത്ഥികൾക്ക് അപേക്ഷിക്കാം. ഹയർസെക്കൻഡറി, വൊക്കേഷണൽ ഹയർസെക്കൻഡറി അവസാനവർഷ പരീക്ഷയിൽ 90 ശതമാനത്തിൽ കുറയാതെയും മറ്റുകോഴ്‌സുകൾക്ക് അവസാനവർഷ പരീക്ഷയിൽ 80 ശതമാനം മാർക്കും നേടിയ വിദ്യാർത്ഥികളുമാണ് അപേക്ഷിക്കേണ്ടത്. അപേക്ഷയോടൊപ്പം ഗസറ്റഡ് ഓഫീസർ സാക്ഷ്യപ്പെടുത്തിയ മാർക്ക് ലിസ്റ്റിന്റെ പകർപ്പ്, അംഗത്തിന്റെ പാസ് ബുക്ക്, ആധാർ കാർഡ്, ബാങ്ക് പാസ് ബുക്ക്, റേഷൻ കാർഡ് എന്നിവയുടെ സ്വയം സാക്ഷ്യപ്പെടുത്തിയ പകർപ്പും ഹാജരാക്കണം. അപേക്ഷിക്കുന്ന തൊഴിലാളിക്ക് 2019 മാർച്ചിൽ 12 മാസത്തിൽ കുറയാത്ത അംഗത്വം ഉണ്ടാവണം. അപേക്ഷാ തീയതിയിൽ അംഗത്തിന്റെ ഡിജിറ്റലൈസേഷൻ നടപടി പൂർത്തികരിക്കപ്പെട്ടവരും 24 മാസത്തിൽ കൂടുതൽ അംശദായ കുടിശിക ഇല്ലാത്തവരും ആകണം. 24 മാസത്തിൽ താഴെ കുടിശിക ഉണ്ടെങ്കിൽ കുടിശിക തീർത്ത് അപേക്ഷ സമർപ്പിക്കണം. അപേക്ഷ ജൂലൈ 15 വൈകിട്ട് മൂന്ന് വരെ സ്വീകരിക്കും. വിശദ വിവരങ്ങൾക്ക് ഫോൺ: 0471-2729175.Dt.17.6.2019.
************************
തിരുവനന്തപുരം വഴുതക്കാട് പ്രവർത്തിക്കുന്ന കാഴ്ചപരിമിതർക്കുവേണ്ടിയുള്ള സർക്കാർ വിദ്യാലയത്തിൽ 2019-2020 അധ്യയന വർഷം ഒന്നു മുതൽ ഏഴുവരെയുള്ള ക്ലാസ്സുകളിലേക്കുള്ള പ്രവേശനം 28വരെ നടക്കും. കുറഞ്ഞത് 40 ശതമാനമോ അതിന് മുകളിലോ കാഴ്ചക്കുറവുള്ളവർക്കാണ് പ്രവേശനം. ആൺകുട്ടികൾക്കും പെൺകുട്ടികൾക്കും പ്രത്യേകം ഹോസ്റ്റൽ സൗകര്യവും ഭക്ഷണവും കുട്ടികളെ പ്രത്യേകം പരിചരിക്കുവാൻ പ്രാപ്തരായ ജീവനക്കാരുടെ സേവനവും ലഭ്യമാണ്. പൊതു വിഷയങ്ങൾക്കു പുറമേ ഉപകരണ സംഗീതം, ഇവർക്ക് അനുയോജ്യമായ ആധുനിക വിവരസാങ്കേതിക വിദ്യ, ദിനചര്യാ പരിശീലനം, കായിക വിദ്യാഭ്യാസം എന്നിവയും ലഭിക്കും. ബ്രയിൽ പുസ്തങ്ങളുടെയും സിഡിയിൽ തയാറാക്കിയ പുസ്തകങ്ങളുടെയും ശേഖരമടങ്ങിയ ബ്രെയിൽ ലൈബ്രറി ലഭ്യമാണ്. കുട്ടികളുടെ അഭിരുചിക്കനുസരിച്ചുള്ള മത്സരങ്ങളിൽ പങ്കെടുപ്പിക്കും. പ്രവേശനത്തിന് ആഗ്രഹിക്കുന്ന വിദ്യാർത്ഥിയുടെ രക്ഷിതാക്കൾ സ്‌കൂൾ മേൽവിലാസത്തിൽ കത്ത് മുഖേനയോ നരിട്ടോ 28നകം ബന്ധപ്പെടണം. വിലാസം: ഹെഡ്മാസ്റ്റർ, കാഴ്ചപരിമിതർക്കുവേണ്ടിയുള്ള സർക്കാർ വിദ്യാലയം, വഴുതക്കാട്, തിരുവനന്തപുരം. ഫോൺ: 0471-2328184, 8547326805.Dt.17.6.2019.
************************
2018 ലെ ദേശീയ അധ്യാപക അവാർഡിനുളള നാമനിർദേശം നൽകാൻ താത്പര്യമുളള സർക്കാർ, സർക്കാർ എയ്ഡഡ് സ്‌കൂളുകളിലെ അധ്യാപകർക്കും, പ്രഥമാധ്യാപകർക്കും www.mhrd.gov.in ൽ നേരിട്ട് നാമനിർദേശം അപ്‌ലോഡ് ചെയ്യാം. നോമിനേഷൻ ഫയൽ ചെയ്യേണ്ട അവസാന തിയതി ജൂൺ 15.Dt.6.6.2019.
************************
സംസ്ഥാന തിരഞ്ഞെടുപ്പ് കമ്മീഷനിൽ ഓഫീസ് അറ്റൻഡന്റിന്റെ ഒരു ഒഴിവിലേയ്ക്ക് സർക്കാർ വകുപ്പുകളിൽ നിന്നും ഡെപ്യൂട്ടേഷൻ വ്യവസ്ഥയിൽ നിയമിക്കുന്നതിന് അപേക്ഷ ക്ഷണിച്ചു. സെക്രട്ടേറിയറ്റിലും മറ്റ് സർക്കാർ വകുപ്പുകളിലും ഓഫീസ് അറ്റൻഡന്റിന്റെ തസ്തികകയിൽ ജോലി ചെയ്യുന്നവർ ഉചിത മാർഗേണ ജൂൺ 15നകം സെക്രട്ടറി, സംസ്ഥാന തിരഞ്ഞെടുപ്പ് കമ്മീഷൻ, കോർപ്പറേഷൻ ഓഫീസ് സമുച്ചയം, എൽ.എം.എസ് ജംഗ്ഷൻ, തിരുവനന്തപുരം - 695633 എന്ന വിലാസത്തിൽ അപേക്ഷിക്കണം.Dt.6.6.2019.
************************
കെ-ടെറ്റ് ജൂൺ 2019 പരീക്ഷയ്ക്ക് അപേക്ഷ നൽകിയവരിൽ ഫോട്ടോ തെറ്റായി അപ്‌ലോഡ് ചെയ്തവർക്ക് വീണ്ടും അവസരം. വിജ്ഞാപനത്തിൽ പറഞ്ഞ പ്രകാരമുള്ള ഫോട്ടോ അപ്‌ലോഡ് ചെയ്യുന്നതിന് ജൂൺ 10 മുതൽ 13 വരെ അവസരമുണ്ട്. അപേക്ഷാർത്ഥികൾക്ക് ആപ്ലിക്കേഷൻ ഐഡിയും അപ്ലിക്കേഷൻ നമ്പറും ഉപയോഗിച്ച് ലോഗിൻ ചെയ്ത് തിരുത്തൽ വരുത്താം. വിജ്ഞാപനം പ്രസിദ്ധീകരിച്ച തിയതിക്ക് (27.05.2019) ശേഷമുള്ള ഫോട്ടോ ആയിരിക്കണം അപ്‌ലോഡ് ചെയ്യേണ്ടത്. ഫോട്ടോയിൽ പരീക്ഷാർത്ഥിയുടെ പേരും ഫോട്ടോ എടുത്ത തിയതിയും രേഖപ്പെടുത്തിയിരിക്കണം.Dt.6.6.2019.
************************
2019 ഫെബ്രുവരിയിൽ നടന്ന എൽ.എസ്.എസ് പരീക്ഷയുടെ പുനർമൂല്യനിർണയ ഫലം പ്രസിദ്ധീകരിച്ചു. ഫലം www.keralapareekshabhavan.in എന്ന വെബ്‌സൈറ്റിൽ ലഭ്യമാണ്.Dt.6.6.2019.
************************
എസ്.എസ്.എൽ.സി/റ്റി.എച്ച്.എസ്.എൽ.സി./എ.എച്ച്.എസ്.എൽ.സി/എസ്.എസ്.എൽ.സി (എച്ച്.ഐ) സേ പരീക്ഷാഫലം www.keralapareekshabhavan.in ൽ ലഭ്യമാണ്.Dt.4.6.2019.
************************
2018 നവംബറിൽ ഒന്നാം വർഷ ഹയർസെക്കൻഡറി തുല്യതാ പരീക്ഷ എഴുതിയ പരീക്ഷാർത്ഥികൾക്കുളള ഇംപ്രൂവ്‌മെന്റ് പരീക്ഷ ജൂലൈ 12നും, 13നും, 14നും കേരളത്തിലെ 14 ജില്ലകളിലെ പരീക്ഷാകേന്ദ്രങ്ങളിൽ നടക്കും. ഇംഗ്ലീഷ്, രണ്ടാം ഭാഷ, പാർട്ട് - III വിഷയങ്ങൾ എല്ലാം ഉൾപ്പടെ പരമാവധി മൂന്ന് വിഷയങ്ങൾ ഇംപ്രൂവ് ചെയ്യാം. ഒന്നാം വർഷ തുല്യതാപരീക്ഷയിലെ ഏതെങ്കിലും വിഷയങ്ങൾക്ക് ഹാജരാകാത്തവർക്ക് ആ വിഷയങ്ങൾക്കും ഇപ്പോൾ അപേക്ഷിക്കാം. നവംബറിൽ രണ്ടാം വർഷ തുല്യതാപരീക്ഷ എഴുതി പരാജയപ്പെട്ടവർ തോറ്റ വിഷയങ്ങളുടെ ഒന്നും രണ്ടും വർഷത്തെ പരീക്ഷകൾ വീണ്ടും എഴുതണം. ഒന്നാം വർഷ വിഷയങ്ങൾ ഈ ഇംപ്രൂവ്‌മെന്റ് പരീക്ഷ എഴുതുന്നവർക്കൊപ്പം എഴുതണം. ഒന്നാം വർഷ ഇംപ്രൂവ്‌മെന്റ്/സപ്ലിമെന്ററി പരീക്ഷയ്ക്ക് പേപ്പർ ഒന്നിന് 500/- രൂപയാണ് ഫീസ്. സർട്ടിഫിക്കറ്റ് ഫീസ് - 100/- രൂപ, പിഴയില്ലാതെ ഫീസടയ്‌ക്കേണ്ട അവസാന തീയതി ജൂൺ 18. 20/-രൂപ പിഴയോടുകൂടി ഫീസടയ്‌ക്കേണ്ട അവസാന തീയതി ജൂൺ 25. സപ്ലിമെന്ററി വിദ്യാർത്ഥികൾ രണ്ടാം വർഷ പരീക്ഷയ്ക്ക് രജിസ്റ്റർ ചെയ്ത കേന്ദ്രങ്ങളിലും അല്ലാത്തവർ ഒന്നാം വർഷ പരീക്ഷയ്ക്ക് രജിസ്റ്റർ ചെയ്ത കേന്ദ്രങ്ങളിലും ഫീസടയ്ക്കണം. നോട്ടിഫിക്കേഷന്റെ പൂർണ രൂപം www.dhsekerala.gov.in ലഭിക്കും.Dt.4.6.2019.
************************
ഹയർസെക്കൻഡറി മുഖ്യഘട്ടത്തിൽ സ്‌പോർട്‌സ് മികവ് രജിസ്‌ടേഷൻ നടത്തി ജില്ലാ സ്‌പോർട്‌സ് കൗൺസിലിൽ നിന്നും സ്‌കോർ കാർഡ് നേടാൻ കഴിയാത്തവർക്ക് ജൂൺ ആറ് വരെ അതത് ജില്ലാ സ്‌പോർട്‌സ് കൗൺസിലുകളുമായി ബന്ധപ്പെട്ട് നേടാമെന്ന് ഹയർസെക്കൻഡറി ജോയിന്റ് ഡയറക്ടർ അറിയിച്ചു. മുഖ്യഘട്ടത്തിൽ സ്‌കോർ കാർഡ് നേടിയ ശേഷം സ്‌പോർട്‌സ് ക്വാട്ട പ്രവേശനത്തിനായി ഓൺലൈനായി അപേക്ഷ സമർപ്പിക്കാത്തവർക്കും പുതിയതായി സ്‌കോർ കാർഡ് നേടുന്നവർക്കും സപ്ലിമെന്ററി ഘട്ടത്തിൽ APPLY ONLINE-SPORTS എന്ന ലിങ്കിലൂടെ ഓൺലൈനായി അപേക്ഷ നൽകാം. ഇതിന്റെ പ്രിന്റൗട്ട് അനുബന്ധരേഖകൾ സഹിതം വെരിഫിക്കേഷനായി ഏതെങ്കിലും സർക്കാർ/എയ്ഡഡ് ഹയർസെക്കൻഡറി സ്‌കൂളിൽ സമർപ്പിക്കണം. മുഖ്യഘട്ടത്തിൽ അപേക്ഷിച്ചിട്ടും അലോട്ട്‌മെന്റ് ലഭിക്കാത്തവർക്ക് വേക്കൻസിക്ക് അനുസൃതമായി പുതിയ ഓപ്ഷനുകൾ ഉൾപ്പെടുത്തി RENEWAL FORM നേരത്തെ അപേക്ഷ വെരിഫിക്കേഷനായി സമർപ്പിച്ച സ്‌കൂളിൽ നൽകാം. ജൂൺ നാലു മുതൽ ഏഴ് വരെ ഇത്തരത്തിൽ അപേക്ഷ സമർപ്പിക്കാം. സപ്ലിമെന്ററി അലോട്ട്‌മെന്റിനുളള വേക്കൻസി അഡ്മിഷൻ www.hscap.kerlala.gov.in ൽ പ്രസിദ്ധീകരിച്ചിട്ടുണ്ട്. Dt.4.6.2019.
************************
എട്ടുമുതൽ പന്ത്രണ്ടുവരെ ക്ലാസുകളുള്ള 4752 സ്‌കൂളുകളിൽ ഹൈടെക് ക്ലാസ്മുറികൾ സ്ഥാപിച്ചതിനു പുറമെ ഒന്നു മുതൽ ഏഴുവരെ ക്ലാസുകളുള്ള 9941 സ്‌കൂളുകളിൽ ഹൈടെക് ലാബുകൾകൂടി സജ്ജമാക്കി പുതിയ അധ്യയനവർഷം പിറക്കുന്നു. കേരള ഇൻഫ്രാസ്ട്രക്ചർ ആൻഡ് ടെക്‌നോളജി ഫോർ എഡ്യൂക്കേഷൻ (കൈറ്റ്) കിഫ്ബി ധനസഹായത്തോടെ നടപ്പാക്കുന്ന ഹൈടെക് ലാബ് പദ്ധതിക്കായി 55086 ലാപ്‌ടോപ്പുകൾക്കും യു.എസ്.ബി സ്പീക്കറുകൾക്കും 23170 പ്രൊജക്ടറുകൾക്കും വർക്ക് ഓർഡർ നൽകി. ജൂലൈ മുതൽ ഇവ സ്‌കൂളുകളിലെത്തും. നേരത്തെ ഹൈടെക് സ്‌കൂൾ പദ്ധതിയുടെ ഭാഗമായി 58430 ലാപ്‌ടോപ്പുകളും 42227 മൾട്ടിമീഡിയ പ്രൊജക്ടറുകളും നാല്പതിനായിരത്തിലധികം യു.എസ്.ബി സ്പീക്കർ, എച്ച്.ഡി.എം.ഐ കേബിൾ, മൗണ്ടിംഗ് കിറ്റ്, ഫേസ്‌പ്ലേറ്റ് എന്നിവയും 4688 ഡി.എസ്.എൽ.ആർ ക്യാമറകളും 4522 എൽ.ഇ.ഡി പരിഷ്‌കരിച്ചുള്ള ടെലിവിഷനുകളും 4720 ഫുൾ എച്ച്.ഡി വെബ് ക്യാമുകളും സ്‌കൂളുകളിൽ വിന്യസിച്ചിട്ടുണ്ട്. ഈ സ്‌കൂളുകളിൽ പുതുതായി 4752 മൾട്ടിഫങ്ഷൻ പ്രിന്ററുകൾ ഈ മാസം വിന്യസിക്കും. മുഴുവൻ സ്‌കൂളുകൾക്കും ബ്രോഡ്ബാൻഡ് ഇന്റർനെറ്റ് ലഭ്യമാക്കിയതിന് പുറമെ ക്ലാസ്മുറികൾ നെറ്റ്‌വർക്ക് ചെയ്യുന്നതും ഈമാസം പൂർത്തിയാകും. ലാബുകളിൽ സെർവറുകൾ വിന്യസിക്കും. പ്രൈമറി, ഹൈസ്‌കൂൾ, ഹയർസെക്കന്ററി വിഭാഗങ്ങളിലായി 1,83,235 അധ്യാപകർ ഏപ്രിൽ-മെയ് അവധിക്കാലത്ത് ഡിജിറ്റൽ സംവിധാനങ്ങൾ ക്ലാസ്മുറികളിൽ പ്രയോജനപ്പെടുത്താനും ഉള്ളടക്കം തയാറാക്കാനും പ്രാപ്തരാക്കുന്ന പ്രത്യേക ഐടി പരിശീലനം നേടി. ഡിജിറ്റൽ വിഭവങ്ങൾ ഉപയോഗിച്ചുള്ള പഠനപ്രവർത്തനങ്ങൾക്ക് അധ്യാപകർക്കും വിദ്യാർഥികൾക്കും ഒരുപോലെ പ്രയോജനപ്പെടുത്തുന്നവിധം പരിഷ്‌കരിച്ചിട്ടുള്ള 'സമഗ്ര' വിഭവ പോർട്ടലിന്റെ രണ്ടാംപതിപ്പാണ് പുതിയ അധ്യയനവർഷം മുതൽ ലഭ്യമാക്കുക. സമഗ്രയുടെ ഓഫ്‌ലൈൻ പതിപ്പും ഇനി ലഭ്യമാകും. ഒന്നുമുതൽ പന്ത്രണ്ടുവരെ ക്ലാസുകൾക്കായി 27811 ഡിജിറ്റൽ റിസോഴ്‌സുകൾ സമഗ്രയിലുണ്ട്. 5411 അധ്യാപകർ കഴിഞ്ഞ വർഷം കൈറ്റിന്റെ 'KOOL' പ്ലാറ്റ്‌ഫോം വഴി ഓൺലൈൻ പരിശീലനം വിജയകരമായി പൂർത്തിയാക്കി സർട്ടിഫിക്കറ്റ് നേടിയിട്ടുണ്ട്. ഈ പ്ലാറ്റ്‌ഫോം വഴി പുതിയ നിരവധി കോഴ്‌സുകൾ പൊതുജനങ്ങൾക്കുൾപ്പെടെ ലഭ്യമാക്കും. 1898 സ്‌കൂളുകളിലായി 58247 കുട്ടികൾ ഉണ്ടായിരുന്ന 'ലിറ്റിൽ കൈറ്റ്‌സ്' ഐടി ക്ലബുകളിൽ പുതുതായി 60,000 കുട്ടികൾകൂടി ഈ വർഷം സജീവമാവും. ആർട്ടിഫിഷ്യൽ ഇന്റലിജൻസ്, റോബോട്ടിക്‌സ്, ഇന്റർനെറ്റ് ഓഫ് തിംഗ്‌സ് (ഐ.ഒ.ടി), ത്രീഡി ക്യാരക്ടർ അനിമേഷൻ തുടങ്ങിയ മേഖലകളിൽ കഴിഞ്ഞ വർഷം പരിശീലനം നേടിയ 'ലിറ്റിൽ കൈറ്റ്‌സ്' അംഗങ്ങളുടെ നേതൃത്വത്തിൽ പുതിയ അധ്യയനവർഷം സ്‌കൂളുകൾ കേന്ദ്രീകരിച്ച് താല്പര്യമുള്ള മറ്റ് കുട്ടികൾക്ക് പ്രത്യേക പരിശീലനങ്ങൾ നൽകും. സ്‌ക്രിപ്റ്റ് തയാറാക്കൽ മുതൽ ഷൂട്ടിങ്ങും വീഡിയോ എഡിറ്റിങ്ങും ഉൾപ്പെടെയുള്ള വാർത്താനിർമാണത്തിന്റെ മുഴുവൻ പ്രവർത്തനങ്ങളും നടത്താൻ സജ്ജരായ 'കുട്ടി റിപ്പോർട്ടർമാർ' പുതിയ അധ്യയനവർഷത്തിൽ സജീവമാകും. സ്‌കൂൾ കുട്ടികൾക്ക് സൈബർ സുരക്ഷ ഉറപ്പാക്കുന്നതിനുള്ള 'സൈബർ സേഫ്റ്റി പ്രോട്ടോക്കോൾ' അനുസരിച്ച് സൈബർ സേഫ്റ്റി ക്ലിനിക്കുകൾ 'ലിറ്റിൽ കൈറ്റ്‌സ്' ക്ലബുകളുടെ നേതൃത്വത്തിൽ സ്‌കൂളുകളിൽ രൂപീകൃതമാകും. സൈബർ സുരക്ഷയോടൊപ്പം പരിസ്ഥിതി അവബോധം, ലഹരി വസ്തുക്കൾ തടയൽ, മാലിന്യ നിർമാർജനം, രക്ഷിതാക്കൾക്കുള്ള ഐടി ബോധവൽക്കരണം തുടങ്ങിയ നിരവധി പ്രവർത്തനങ്ങൾ ലിറ്റിൽ കൈറ്റ്‌സ് ക്ലബുകൾ പുതുതായി ഏറ്റെടുക്കും. ലിറ്റിൽകൈറ്റ്‌സിലെ അടുത്തവർഷത്തെ ബാച്ചിലേക്കായി എട്ടാംക്ലാസിലെ വിദ്യാർഥികളെ ഈ മാസം തന്നെ തിരഞ്ഞെടുക്കും. എല്ലാ സ്‌കൂളുകളും തയാറാക്കുന്ന ഡിജിറ്റൽ മാഗസിനുകൾ ഓഗസ്റ്റ് മാസം പ്രസിദ്ധീകരിക്കും. ഹയർസെക്കന്ററി മേഖലയിൽ ഗണിതപഠനം എളുപ്പവും കാര്യക്ഷമവുമാക്കാനുള്ള 'മാത്സ് ഐ.ടി ലാബുകൾ', ഫിസിക്‌സ് പഠനത്തിനുള്ള 'എക്‌സ്‌പൈസ് കിറ്റുകൾ' തുടങ്ങിയവ ഈ വർഷം പുതുതായി ആവിഷ്‌കരിച്ചതാണ്. മസാച്യൂസെറ്റ്‌സ് ഇൻസ്റ്റിറ്റ്യൂട്ട് ഓഫ് ടെക്‌നോളജി (എം.ഐ.ടി.) ആവിഷ്‌കരിച്ച് 'സ്‌ക്രാച്ച്' സ്വതന്ത്ര സോഫ്റ്റ്വെയർ വിഷ്വൽ പ്രോഗ്രാമിങ് ടൂളുകൾ പഠനത്തിന് മാത്രമല്ല, ഐ.ടി മേളയിലും ഈ വർഷം പ്രയോജനപ്പെടുത്തും. ഹൈടെക് പദ്ധതിയുടെ സ്വാധീനം പഠനവിധേയമാക്കാൻ അന്താരാഷ്ട്ര ഏജൻസികൾ താൽപര്യം പ്രകടിപ്പിച്ചിട്ടുണ്ട്. സാങ്കേതികവിദ്യയുടെ സഹായത്തോടെ അക്കാദമിക നിലവാരം മികച്ചതാക്കാനും ഫലപ്രദമായ മോണിറ്ററിങ്ങും ഇ-ഗവേർണൻസും നടപ്പാക്കാനുമുള്ള പുതിയ പദ്ധതികൾക്ക് ഈ വർഷം കൈറ്റ് തുടക്കംകുറിക്കുമെന്ന് വൈസ് ചെയർമാൻ & എക്‌സിക്യൂട്ടീവ് ഡയറക്ടർ കെ. അൻവർ സാദത്ത് അറിയിച്ചു.Dt.4.6.2019.
************************
ഏകജാലകരീതിയിലൂടെ മെരിറ്റ് ക്വാട്ടയിൽ പ്രവേശനം നേടിയ വിദ്യാർത്ഥികൾക്ക് കോമ്പിനേഷൻ/സ്‌കൂൾ മാറ്റത്തിനും കോമ്പിനേഷൻ മാറ്റത്തോട് കൂടിയ സ്‌കൂൾ മാറ്റത്തിനും അപേക്ഷിക്കാം. മുഖ്യഘട്ടത്തിൽ ഒന്നാം ഓപ്ഷൻ പ്രകാരം പ്രവേശനം നേടിയവർക്ക് സ്‌കൂൾ/കോമ്പിനേഷൻ മാറ്റത്തിനായി അപേക്ഷിക്കാൻ അർഹതയില്ല. സ്‌പോർട്‌സ്/മാനേജ്‌മെന്റ്/കമ്മ്യൂണിറ്റി ക്വാട്ടകളിൽ പ്രവേശനം നേടിയവർക്ക് മെരിറ്റ് സീറ്റുകളിലേക്ക് സ്‌കൂൾ മാറ്റമോ കോമ്പിനേഷൻ മാറ്റമോ അനുവദിക്കില്ല. ആദ്യഘട്ട സ്‌കൂൾ/കോമ്പിനേഷൻ മാറ്റങ്ങൾക്കായി നിലവിലുള്ള ഒഴിവുകളോടൊപ്പം 20 ശതമാനം മാർജിനൽ സീറ്റ് വർധനവ് ഉൾപ്പെടുത്തിയ ഒഴിവുകൾ ജൂൺ ആറിന് രാവിലെ 10ന് www.hscap.kerala.gov.in ൽ പ്രസിദ്ധീകരിക്കും. ജൂൺ ഒന്നിന് ഉച്ചയ്ക്ക് മൂന്ന് വരെ സ്‌കൂൾ/കോമ്പിനേഷൻ മാറ്റത്തിനായി അപേക്ഷിക്കാൻ അർഹതയുള്ള വിദ്യാർത്ഥികൾക്ക് വെബ്‌സൈറ്റിൽ ലഭ്യമാക്കിയിട്ടുള്ള സ്‌കൂൾ/കോമ്പിനേഷൻ മാറ്റങ്ങൾക്കുള്ള നിർദിഷ്ട മാതൃകയിലുള്ള അപേക്ഷ അഡ്മിഷൻ നേടിയിട്ടുള്ള സ്‌കൂളിൽ സമർപ്പിക്കാം. പുനർമൂല്യനിർണയത്തിൽ ഗ്രേഡ് വ്യത്യാസം വന്നിട്ടുള്ള വിദ്യാർത്ഥികൾ സ്‌കൂൾ/കോമ്പിനേഷൻ ട്രാൻസ്ഫറിന്റെ അപേക്ഷയിൽ ഗ്രേഡ് വ്യത്യാസം പ്രത്യേകം രേഖപ്പെടുത്തി പുതിയ മാർക്ക് ലിസ്റ്റ് കോപ്പി സഹിതം പ്രവേശനം നേടിയ സ്‌കൂളിൽ അപേക്ഷ സമർപ്പിക്കണം. സ്‌കൂൾ/കോമ്പിനേഷൻ മാറ്റങ്ങൾ അനുവദിച്ച ശേഷമുള്ള ഒഴിവുകളുടെ വിശദാംശങ്ങൾ ജൂൺ 10ന് വെബ്‌സൈറ്റിൽ പ്രസിദ്ധീകരിക്കും. ഈ ഒഴിവുകളിലേക്ക് നേരത്തെ അപേക്ഷ നൽകാൻ കഴിയാതിരുന്ന എല്ലാ വിദ്യാർത്ഥികൾക്കും പുതിയ അപേക്ഷകൾ നൽകാം. അപേക്ഷ നൽകിയിട്ടും അലോട്ട്‌മെന്റ് ലഭിക്കാത്തവർക്കും വീണ്ടും പരിഗണിക്കപ്പെടുന്നതിന് അപേക്ഷ പുതുക്കി നൽകാം. നിലവിലുള്ള ഒഴിവുകളുടെ അടിസ്ഥാനത്തിൽ ഓപ്ഷനുകളും പുതുക്കി നൽകാം. അപേക്ഷ പുതുക്കുന്നതിനുള്ള ഫോമും സപ്ലിമെന്ററി അലോട്ട്‌മെന്റ് സംബന്ധിക്കുന്ന കൂടുതൽ നിർദേശങ്ങളും പിന്നീട് നൽകും.Dt.3.6.2019.
************************
എസ്.സി.ഇ.ആർ.ടി 2018 നവംബറിൽ നടത്തിയ നാഷണൽ മീൻസ് കം-മെറിറ്റ് സ്‌കോളർഷിപ്പിനുളള യോഗ്യതാ പരീക്ഷയുടെ ഫലം പൊതുവിദ്യാഭ്യാസ വകുപ്പിന്റെ വെബ് സൈറ്റിൽ പ്രസിദ്ധീകരിച്ചു. ഓരോ ജില്ലയിലും സ്‌കോളർഷിപ്പിന് അർഹത നേടിയ കുട്ടികളുടെ പേരുവിവരങ്ങൾ റാങ്ക് അടിസ്ഥാനത്തിലാണ് ഉൾപ്പെടുത്തിയിരിക്കുന്നത്. അർഹരായ എല്ലാ കുട്ടികളും സ്‌കോളർഷിപ്പിനുവേണ്ടി നാഷണൽ സ്‌കോളർഷിപ്പ് പോർട്ടൽ വഴി ഓൺലൈൻ അപേക്ഷ രജിസ്റ്റർ ചെയ്യണം. അപേക്ഷ രജിസ്റ്റർ ചെയ്യുന്നത് സംബന്ധിച്ച വിവരങ്ങൾ പിന്നീട് അറിയിക്കും.Dt.3.6.2019.
************************
സംസ്ഥാനത്തെ പൊതുവിദ്യാലയങ്ങളിലെ മികച്ച ജൈവ വൈവിധ്യ ഉദ്യാനങ്ങൾക്ക് സംസ്ഥാനതല പുരസ്‌കാരങ്ങൾ പ്രഖ്യാപിച്ചു. ഒന്നാം സ്ഥാനം: ജി.എൽ.പി.എസ്. കഞ്ഞിക്കുഴി, ഇടുക്കി, രണ്ടാം സ്ഥാനം: സെന്റ് മേരീസ് എൽ.പി.എസ്. എടത്വാ, ആലപ്പുഴ, മൂന്നാം സ്ഥാനം: എസ്.വി.എ.യു.പി.എസ്. കാപ്പിൽ, മലപ്പുറം, പ്രോത്‌സാഹന സമ്മാനം: 1) ഗവൺമെന്റ് യു.പി.എസ് വെളളാട്, കണ്ണൂർ, 2) ജി.എച്ച്.എസ്.എസ്. ഉദിനൂർ, കാസർകോട്. ഫലകവും, പ്രശസ്തി പത്രവും പാരിതോഷികവും ഉൾപ്പെടുന്നതാണ് പുരസ്‌കാരം. മികച്ച ഒന്നും രണ്ടും മൂന്നും സ്ഥാനം നേടിയ വിദ്യാലയങ്ങൾക്ക് യഥാക്രമം 50,000/- രൂപ, 30,000/-രൂപ, 20,000/- രൂപയും, പ്രോത്സാഹന സമ്മാനമായി 10,000/- രൂപ വീതവും പാരിതോഷികം നൽകും. പുരസ്‌കാരങ്ങൾ ജൂൺ 11ന് രാവിലെ 11.30ന് ഗവൺമെന്റ് യു.പി.സ്‌കൂൾ, ബീമാപ്പള്ളിയിൽ നടക്കുന്ന ''ജൈവവൈവിധ്യ ഉദ്യാനം'' സംസ്ഥാനതല അവാർഡ്ദാന ചടങ്ങിൽ വിദ്യാഭ്യാസ മന്ത്രി സമ്മാനിക്കും. Dt.2.6.2019
************************
പ്ലസ് വൺ സീറ്റുകളിലേക്കുള്ള മുഖ്യ അലോട്ട്‌മെന്റിനു ശേഷമുള്ള ഒഴിവിൽ 20% മാർജിനൽ ഉൾപ്പെടുത്തിയ വർധിത സീറ്റിൽ നിലവിൽ ഒന്നാം ഓപ്ഷനില്ലാതെ മെരിറ്റ് ക്വാട്ടിയിൽ പ്രവേശനം നേടിയ വിദ്യാർത്ഥികൾക്ക് കോമ്പിനേഷൻ മാറ്റത്തിനോ/സ്‌കൂൾ മാറ്റത്തിനോ/സ്‌കൂൾ മാറ്റത്തോടെയുള്ള കോമ്പിനേഷൻ മാറ്റത്തിനോ ജൂൺ ആറ് മുതൽ ഏഴിന് ഉച്ചയ്ക്ക് മുന്നു വരെ പ്രവേശനം നേടിയ സ്‌കൂളിൽ അപേക്ഷ സമർപ്പിക്കാം. വിശദ നിർദേശങ്ങളും ഒഴിവുകളും അഡ്മിഷൻ വെബ്‌സൈറ്റായ www.hscap.kerala.gov.in ൽ ജൂൺ ആറിന് രാവിലെ പത്തിന് ലഭ്യമാകും. സ്‌കൂൾ/കോമ്പിനേഷൻ ട്രാൻസ്ഫറിനു ശേഷമുള്ള വേക്കൻസി സപ്ലിമെന്ററി അലോട്ട്‌മെന്റ് ജൂൺ പത്തിന് അഡ്മിഷൻ വെബ്‌സൈറ്റിൽ പ്രസിദ്ധീകരിക്കും. 20% മാർജിനൽ സീറ്റ് വർധന ഉൾപ്പെടുത്തി സംവരണതത്ത്വം പാലിച്ചുകൊണ്ടു പ്രസിദ്ധീകരിക്കുന്ന പ്രസ്തുത വേക്കൻസിയിൽ മുഖ്യ അലോട്ട്‌മെന്റിൽ അപേക്ഷിച്ചിട്ടും ഇതുവരെ അലോട്ട്‌മെന്റൊന്നും ലഭിച്ചിട്ടില്ലാത്തവർക്ക് നിലവിലുള്ള അപേക്ഷ പുതുക്കി പുതിയ ഓപ്ഷനുകൾ കൂട്ടിച്ചേർത്ത് സപ്ലിമെന്ററി അലോട്ട്‌മെന്റിന് അപേക്ഷ നൽകാം. നേരത്തെ അപേക്ഷ നൽകാൻ കഴിയാതിരുന്ന വിദ്യാർത്ഥികൾക്കും ഈ അവസരത്തിൽ പുതിയ അപേക്ഷ സമർപ്പിക്കാം. സപ്ലിമെന്ററി അലോട്ട്‌മെന്റിനെ സംബന്ധിച്ചുള്ള വിശദ നിർദേശങ്ങൾ പിന്നീട് പ്രസിദ്ധീകരിക്കും. പൊതുവിദ്യാലങ്ങളിൽ നിന്നും എസ്.എസ്.എൽ.സി പാസ്സായ എല്ലാ വിദ്യാർത്ഥികൾക്കും പൊതുവിദ്യാലയങ്ങളിൽ തന്നെ പ്രവേശനം ലഭിക്കുന്നതിനുള്ള സീറ്റുകൾ സപ്ലിമെന്ററി അലോട്ട്‌മെന്റിൽ ലഭ്യമാണെന്ന് ഹയർസെക്കൻഡറി ഡയറക്ടർ അറിയിച്ചു. Dt.1.6.2019
************************
2019-2021 അദ്ധ്യയന വർഷത്തെ ഡിപ്ലോമ ഇൻ എലമെന്ററി എഡ്യൂക്കേഷൻ കോഴ്‌സ് ഡിപ്പാർട്ട്‌മെന്റ് ക്വാട്ടായിലെ പ്രവേശനത്തിന് പൊതു വിദ്യാഭ്യാസ ഡയറക്ടർ അപേക്ഷകൾ ക്ഷണിച്ചു. അപേക്ഷാഫോറത്തിന്റെ മാതൃകയും വിശദവിവരങ്ങളും എല്ലാ വിദ്യാഭ്യാസ ഉപഡയറക്ടറാഫീസുകളിലും "www.education.kerala.gov.in"- DPI Announcement എന്ന വെബ്‌സൈറ്റിലും ലഭ്യമാണ്. അപേക്ഷകൾ പൊതുവിദ്യാഭ്യാസ ഡയറക്ടറോഫീസിൽ 19ന് വൈകിട്ട് 5നകം ലഭിക്കണം.Dt.1.6.2019
************************
2019-2021 അധ്യയന വർഷം ബി.എഡ് ഡിപ്പാർട്ട്‌മെന്റ് ക്വാട്ടായിലേയ്ക്ക് പ്രവേശനത്തിന് പൊതു വിദ്യാഭ്യാസ വകുപ്പിലെ അധ്യാപക/അധ്യാപകേതര ജീവനക്കാരിൽ നിന്നും പൊതു വിദ്യാഭ്യാസ ഡയറക്ടർ അപേക്ഷകൾ ക്ഷണിച്ചു. അപേക്ഷാഫോറത്തിന്റെ മാതൃകയും വിശദവിവരങ്ങളും എല്ലാ വിദ്യാഭ്യാസ ഉപഡയറക്ടറാഫീസിലും "www.education.kerala.gov.in"-Announcement എന്ന വെബ്‌സൈറ്റിലും ലഭ്യമാണ്. അപേക്ഷകൾ പൊതുവിദ്യാഭ്യാസ ഡയറക്ടറോഫീസിൽ ജൂൺ 21ന് വൈകുന്നേരം അഞ്ചു മണിക്കകം ലഭിക്കണം.Dt.1.6.2019
************************
2019 ഏപ്രിൽ മാസം നടന്ന ഡി.എഡ് എല്ലാ സെമസ്റ്റർ പരീക്ഷകളുടേയും ഫലം പ്രസിദ്ധീകരിച്ചു. www.keralapareekshabhavan.in, www.bpekerala.in എന്നിവയിൽ ഫലം ലഭ്യമാണ്. പുനർമൂല്യനിർണയത്തിന് ജൂൺ 12 വരെ അപേക്ഷിക്കാം. Dt.1.6.2019
************************
2018 നവംബറിൽ നടത്തിയ രണ്ടാം വർഷ ഹയർസെക്കന്ററി തുല്യതാ പരീക്ഷയുടെ പുനർമൂല്യനിർണ്ണയം, സൂക്ഷ്മപരിശോധന ഫലം www.dhsekerala.gov.in ൽ ലഭ്യമാണ്. Dt.31.5.2019
************************
സ്‌കോൾ-കേരള മുഖേനയുളള ഹയർ സെക്കൻഡറി ഓപ്പൺ റെഗുലർ, പ്രൈവറ്റ് വിഭാഗങ്ങളിൽ ഒന്നാം വർഷ പ്രവേശനത്തിന് അപേക്ഷ ക്ഷണിച്ചു. എസ്.എസ്.എൽ.സി അല്ലെങ്കിൽ സർക്കാർ അംഗീകൃത തത്തുല്യ യോഗ്യതയുളളവർക്ക് അപേക്ഷിക്കാം. ഉയർന്ന പ്രായപരിധി ഇല്ല. ജൂൺ ഒന്ന് മുതൽ www.scolekerala.org യിൽ ഓൺലൈനായി രജിസ്റ്റർ ചെയ്യാം. ഓപ്പൺ റെഗുലർ വിഭാഗത്തിൽ സയൻസ് ഗ്രൂപ്പിൽ ഉൾപ്പെടെ പ്രാക്ടിക്കലുളള, തിരഞ്ഞെടുത്ത വിഷയ കോമ്പിനേഷനുകളിൽ രജിസ്റ്റർ ചെയ്യാം. തിരഞ്ഞെടുത്ത സർക്കാർ ഹയർസെൻഡറി സ്‌കൂളുകളാണ് പഠനകേന്ദ്രങ്ങളായി അനുവദിക്കുക. സ്വയംപഠനസഹായികളും, ലാബ് സൗകര്യവും, പൊതു അവധി ദിവസങ്ങളിൽ സമ്പർക്ക ക്ലാസ്സുകളും വിദ്യാർത്ഥികൾക്ക് ലഭ്യമാണ്. ഹ്യുമാനിറ്റീസ്, കൊമേഴ്‌സ് വിഭാഗത്തിൽ തെരഞ്ഞെടുത്ത കോമ്പിനേഷനുകളിൽ പ്രാക്ടിക്കൽ ഇല്ലാത്ത വിഷയങ്ങളിലാണ് പ്രൈവറ്റ് രജിസ്‌ട്രേഷന് സൗകര്യമുളളത്. ഇരുവിഭാഗത്തിലും രണ്ട് ഘട്ടങ്ങളായാണ് ഓൺലൈൻ രജിസ്‌ട്രേഷൻ നടത്തേണ്ടത്. വിദ്യാർഥിയുടെ വ്യക്തിഗത വിവരങ്ങൾ രേഖപ്പെടുത്തി, നിർദിഷ്ട ഫീസ് അടയ്ക്കുന്നതിനുളള ചെലാൻ ജനറേറ്റ് ചെയ്യുന്നതുവരെയാണ് ഒന്നാം ഘട്ടം. നിശ്ചിത ഫീസ് പോസ്റ്റ് ഓഫീസിൽ അടയ്ക്കുമ്പോൾ നൽകുന്ന രസീതിലെ 19 അക്ക ഇൻവോയിസ് നമ്പർ ഓൺലൈൻ അപേക്ഷയിലെ നിർദിഷ്ട ഫീൽഡിൽ രേഖപ്പെടുത്തി, ഫീസ് അടച്ച തിയതി, പോസ്റ്റ് ഓഫീസിന്റെ പേര്, മറ്റ് വിവരങ്ങളും ഉൾപ്പെടുത്തി അപേക്ഷ ഫോം പ്രിന്റ് എടുക്കുന്നതാണ് രണ്ടാം ഘട്ടം. ഫീസടയ്ക്കുന്നതിന് ജനറേറ്റ് ചെയ്ത് ലഭ്യമാകുന്ന ബാർകോഡ് സഹിതമുളള ചെലാൻ ഉപയോഗിച്ച് സംസ്ഥാനത്തെ ഏത് പോസ്റ്റ് ഓഫീസിലും ഫീസ് അടയ്ക്കാം. പിഴ കൂടാതെ ജൂൺ 26 വരെയും, 60 രൂപ പിഴയോടെ ജൂലൈ രണ്ട് വരെയും ഫീസടച്ച് രജിസ്റ്റർ ചെയ്യാം. ഓൺലൈൻ രജിസ്‌ട്രേഷന് ശേഷം രണ്ട് ദിവസത്തിനകം നിർദിഷ്ട രേഖകൾ സഹിതമുളള അപേക്ഷകൾ, അതത് ജില്ലാ കേന്ദ്രങ്ങളിൽ നേരിട്ടോ എക്‌സിക്യൂട്ടീവ് ഡയറക്ടർ, സ്‌കോൾ-കേരള, വിദ്യാഭവൻ, പൂജപ്പുര പി.ഒ., തിരുവനന്തപുരം-12 എന്ന വിലാസത്തിൽ നേരിട്ടോ, സ്പീഡ്/രജ്‌സ്റ്റേർഡ് തപാൽ മാർഗ്ഗമോ എത്തിക്കണം. ഫീസ് വിവരങ്ങൾക്കും രജിസ്‌ട്രേഷനുളള മാർഗ നിർദ്ദേശങ്ങൾക്കും പ്രോസ്‌പെക്ടസിനും സ്‌കോൾ - കേരളയുടെ വെബ്‌സൈറ്റ് സന്ദർശിക്കുക. കൂടുതൽ വിവരങ്ങൾക്ക് 0471-2342950, 2341271, 2342369. Dt.30.5.2019.
************************
വൊക്കേഷണൽ ഹയർ സെക്കൻഡറി വിദ്യാഭ്യാസ വകുപ്പ് മാർച്ചിൽ നടത്തിയ ഒന്നാം വർഷ പൊതുപരീക്ഷയുടെ സ്‌കോറുകൾ പ്രസിദ്ധീകരിച്ചു. www.keralaresults.nic.in, www.kerala.results.gov.in എന്നിവയിൽ ലഭ്യമാണ്. കണ്ടിന്യുവസ് ഇവാല്യൂവേഷൻ ആന്റ് ഗ്രേഡിംഗ് റിവൈസ്ഡ് കം മോഡുലാർ, എൻ.എസ്.ക്യു.എഫ് എന്നീ രണ്ടു സ്‌കീമുകളിലുള്ള ഉത്തരക്കടലാസുകളുടെ പുനർമൂല്യനിർണ്ണയവും സൂക്ഷ്മപരിശോധനയും നടത്തുന്നതിനുള്ള അപേക്ഷകൾ ജൂൺ 10 വരെ സ്വീകരിക്കും. സംസ്ഥാനത്തെ ഏതെങ്കിലും ട്രഷറിയിൽ നിശ്ചിത ഫീസൊടുക്കി അസൽ ചെലാൻ, വെബ്‌സൈറ്റിൽ നിന്നും ലഭിക്കുന്ന സ്‌കോർഷീറ്റിനോടൊപ്പം പോർട്ടലിൽ നൽകിയിട്ടുള്ള അപേക്ഷാഫോറത്തിന്റെ മാതൃക പ്രിന്റ് ചെയ്ത് പൂരിപ്പിച്ച് വിദ്യാർത്ഥി പഠിക്കുന്ന സ്‌കൂൾ പ്രിൻസിപ്പാളിന് സമർപ്പിക്കണം. സ്‌കൂൾ പ്രിൻസിപ്പാൾ അപേക്ഷകൾ പരിശോധിച്ച് അപാകതകൾ ഇല്ലെന്ന് ഉറപ്പാക്കിയശേഷം വിദ്യാർത്ഥികൾക്ക് കൈപ്പറ്റ് രസീത് നൽകണം. ജൂൺ 14നകം വിദ്യാലയത്തിൽ ലഭിച്ച അപേക്ഷയുടെ വിവരങ്ങൾ പോർട്ടലിൽ അപ്‌ലോഡ് ചെയ്യണം. പുനർമൂല്യനിർണ്ണയത്തിന് പേപ്പറൊന്നിന് 500 രൂപയും സൂക്ഷ്മ പരിശോധനയ്ക്ക് 100 രൂപയും “0202-01-102-93-VHSE Fees” എന്ന ശീർഷകത്തിൽ ഒടുക്കണം. ഉത്തരക്കടലാസിന്റെ പകർപ്പ് ആവശ്യമുള്ള വിദ്യാർത്ഥികൾ പേപ്പറൊന്നിന് 300 രൂപ ഫീസടച്ച് അപേക്ഷകൾ പരീക്ഷാ ഓഫീസിലേക്ക് അയക്കണം. അപേക്ഷാഫോമിന്റെ മാതൃകകൾ 2019ലെ വി.എച്ച്.എസ്.ഇ പരീക്ഷാ വിജ്ഞാപനത്തിൽ ലഭിക്കും. Dt.29.5.2019.
************************
സംസ്ഥാനത്തെ സർക്കാർ/എയ്ഡഡ്/സ്വാശ്രയ മേഖലകളിലെ അധ്യാപക പരിശീലന കേന്ദ്രങ്ങളിൽ ഡിപ്ലോമ ഇൻ എലമെന്ററി എഡ്യൂക്കേഷൻ (ഡി.എൽ.എഡ്) കോഴ്‌സ് പ്രവേശനത്തിന് അപേക്ഷകൾ ക്ഷണിച്ചു. നിർദിഷ്ട ഫോറത്തിൽ പൂരിപ്പിച്ച അപേക്ഷകൾ ജൂൺ 12ന് വൈകിട്ട് അഞ്ചിന് മുൻപ് ബന്ധപ്പെട്ട വിദ്യാഭ്യാസ ഉപ ഡയറക്ടർമാർക്ക് സമർപ്പിക്കണം. വിജ്ഞാപനത്തിന്റേയും അപേക്ഷാഫോമിന്റെയും പൂർണവിവരങ്ങൾ www.education.kerala.gov.in എന്ന വെബ്‌സൈറ്റിലും എല്ലാ വിദ്യാഭ്യാസ ഉപഡയറക്ടർ ഓഫീസുകളിലും ലഭ്യമാണ്. Dt.29.5.2019.
************************
സംസ്ഥാന സർക്കാർ ജീവനക്കാർക്കും പെൻഷൻകാർക്കുമായി നടപ്പാക്കുന്ന ആരോഗ്യ ഇൻഷുറൻസ് പദ്ധതിയിൽ (മെഡിസെപ്) ജീവനക്കാർക്കും പെൻഷൻകാർക്കും തിരുത്തലുകൾ വരുത്തുവാൻ അവസരം. മേയ് 20വരെ അംഗത്വ അപേക്ഷകൾ ലഭ്യമാക്കിയ ജീവനക്കാരും പെൻഷൻകാരും മെഡിസെപ് പോർട്ടലിലെ (www.medisep.kerala.gov.in) ‘status’ link പരിശോധിച്ച് വിശദാംശങ്ങൾ തിരുത്തലുകൾ ആവശ്യമുണ്ടെങ്കിൽ ജീവനക്കാർ അതത് വകുപ്പ് ഡി.ഡി.ഒ/നോഡൽ ഓഫീസർ എന്നിവരെയും പെൻഷൻകാർ ബന്ധപ്പെട്ട ട്രഷറി ഓഫീസറെയും സമീപിക്കണം. വിശദവിവരങ്ങൾക്ക് മേയ് 29 ലെ 56/2019/ധന നമ്പർ സർക്കുലർ പരിശോധിക്കാം. Dt.29.5.2019.
************************
ഏകജാലകരീതിയിലുള്ള പ്ലസ്‌വൺ പ്രവേശനത്തിന്റെ മുഖ്യ അലോട്ട്‌മെന്റ് പ്രക്രിയയിലെ രണ്ടാമത്തേയും അവസാനത്തേതുമായ അലോട്ട്‌മെന്റ് റിസൾട്ട് മേയ് 30ന് രാവിലെ 10 മണി മുതൽ പ്രവേശനം സാധ്യമാകുന്നവിധം പ്രസിദ്ധീകരിക്കും. വിശദാംശങ്ങൾ www.hscap.kerala.gov.in ൽ ലഭ്യമാകും. രണ്ടാമത്തെ ലിസ്റ്റ് പ്രകാരമുള്ള പ്രവേശനം മേയ് 30, 31 ജൂൺ ഒന്ന് തീയതികളിൽ നടക്കും. താത്കാലിക പ്രവേശനത്തിൽ തുടരുന്ന വിദ്യാർത്ഥികൾക്ക് ഹയർ ഓപ്ഷൻ നിലനിർത്താൻ ഇനി അവസരം ഉണ്ടായിരിക്കില്ല. അതിനാൽ അലോട്ട്‌മെന്റ് ലഭിച്ച എല്ലാ വിദ്യാർത്ഥികളും അതത് സ്‌കൂളുകളിൽ ഫീസടച്ച് സ്ഥിരപ്രവേശനം നേടണം. അലോട്ട്‌മെന്റ് ലഭിച്ചവർ അലോട്ട് ചെയ്ത സ്‌കൂളിൽ ഫീസടച്ച് നിർബന്ധമായി ജൂൺ ഒന്നിന് വൈകിട്ട് നാല് മണിക്ക് മുമ്പ് സ്ഥിരപ്രവേശനം നേടണം. ജൂൺ മൂന്നിന് പ്ലസ്‌വൺ ക്ലാസുകൾ ആരംഭിക്കുമെന്ന് ഹയർ സെക്കൻഡറി ഡയറക്ടർ അറിയിച്ചു. നേരത്തെ അപേക്ഷ നൽകാൻ കഴിയാതിരുന്ന എല്ലാ വിദ്യാർത്ഥികൾക്കുമായി സപ്ലിമെന്ററി അലോട്ട്‌മെന്റിന് ജൂൺ 12 മുതൽ അപേക്ഷ സ്വീകരിക്കും. ഇതുവരെ അലോട്ട്‌മെന്റൊന്നും ലഭിച്ചിട്ടില്ലാത്തവർക്ക് നിലവിലുള്ള അപേക്ഷ പുതുക്കി ഓപ്ഷനുകൾ കൂട്ടിച്ചേർത്ത് സപ്ലിമെന്ററി അലോട്ട്‌മെന്റിന് അപേക്ഷ നല്കാം. സ്‌പോർട്‌സ് ക്വാട്ട സ്‌പെഷ്യൽ രണ്ടാം അലോട്ട്‌മെന്റ് റിസൾട്ടും ഇതിനോടൊപ്പം പ്രസിദ്ധീകരിച്ചു.www.hscap.kerala.gov.in ലെ വെബ്‌സൈറ്റിലെ “Sports Allotment Results” എന്ന ലിങ്കിലൂടെ എട്ട് അക്കങ്ങളുള്ള സ്‌പോർട്‌സ് അപേക്ഷാ നമ്പരും ജനനത്തീയതിയും നൽകി ജില്ല സെലക്ട് ചെയ്ത് റിസൾട്ട് പരിശോധിക്കാം. അലോട്ട്‌മെന്റ് ലഭിച്ച വിദ്യാർത്ഥികൾ പ്രസ്തുത ലിങ്കിൽ നിന്നും ലഭിക്കുന്ന രണ്ട് പേജുള്ള അലോട്ട്‌മെന്റ് ലെറ്ററിന്റെ പ്രിന്റൗട്ടെടുത്ത് സ്‌പോർട്‌സ് കൗൺസിലിൽ നിന്നും നൽകിയ സ്‌കോർകാർഡ്, അസ്സൽ സർട്ടിഫിക്കറ്റുകൾ (യോഗ്യത തെളിയിക്കുന്ന സർട്ടിഫിക്കറ്റ്, വിടുതൽ സർട്ടിഫിക്കറ്റ്, സ്വഭാവ സർട്ടിഫിക്കറ്റ്, സ്‌പോർട്‌സ് മികവു തെളിയിക്കുന്ന സർട്ടിഫിക്കറ്റുകൾ) സഹിതം അലോട്ട്‌മെന്റ് ലഭിച്ച സ്‌കൂളിൽ പ്രവേശനത്തിനായി മേയ് 30ന് രാവിലെ 10 മുതൽ ഹാജരാകണം. ഒന്നാം അലോട്ട്‌മെന്റിൽ താത്കാലിക പ്രവേശനം നേടിയ വിദ്യാർത്ഥികൾക്ക് ഈ അലോട്ട്‌മെന്റിൽ ഉയർന്ന ഓപ്ഷനിൽ അലോട്ട്‌മെന്റ് ലഭിച്ചിട്ടില്ലെങ്കിൽ പുതിയ അലോട്ട്‌മെന്റ് ലെറ്റർ ആവശ്യമില്ല. Dt.29.5.2019.
************************
2018 നവംബർ മാസം നടന്ന ഡി.എഡ്/ഡി.എൽ.എഡ് പരീക്ഷകളുടെ പുനർമൂല്യനിർണയ ഫലം www.keralapareekshabhavan.in എന്ന വെബ്‌സൈറ്റിൽ പ്രസിദ്ധീകരിച്ചതായി പരീക്ഷാഭവൻ സെക്രട്ടറി അറിയിച്ചു. Dt.4.5.2019.
************************
ഈ വർഷത്തെ എസ്.എസ്.എൽ.സി പരീക്ഷാഫലം മേയ് ആറിന് ഉച്ചയ്ക്ക് രണ്ടിന് പ്രഖ്യാപിക്കും. ഇതോടൊപ്പം തന്നെ ടി.എച്ച്.എസ്.എൽ.സി, ടി.എച്ച്.എസ്.എൽ.സി (ഹിയറിംഗ് ഇംപേർഡ്), എസ്.എസ്.എൽ.സി (ഹിയറിംഗ് ഇംപേർഡ്), എ.എച്ച്.എസ്.എൽ.സി എന്നീ പരീക്ഷകളുടെ ഫലപ്രഖ്യാപനവും ഉണ്ടായിരിക്കും. ഫലപ്രഖ്യാപനത്തിനുശേഷം പി.ആർ.ഡി ലൈവ് എന്ന മൊബൈൽ ആപ്പിലും http://keralapareekshabhavan.in,https://sslcexam.kerala.gov.in, www.results.kite.kerala.gov.in, http://results.kerala.nic.in, www.prd.kerala.gov.in എന്നീ സൈറ്റുകളിലും ഫലം ലഭ്യമാകും. എസ്.എസ്.എൽ.സി(എച്ച്.ഐ), റ്റി.എച്ച്.എസ്.എൽ.സി (എച്ച്.ഐ) റിസൾട്ട് http://sslchiexam.kerala.gov.in ലും ടി.എച്ച്.എസ്.എൽ.സി റിസൾട്ട് http://thslcexam.kerala.gov.in ലും ലഭ്യമാകും. ഗൂഗിൾ പ്ലേ സ്റ്റോറിൽ നിന്നും ആപ്പ് സ്റ്റോറിൽനിന്നും പി.ആർ.ഡി ലൈവ് ആപ് ഡൗൺലോഡ് ചെയ്യാം. Dt.4.5.2019.
************************
തിങ്കളാഴ്ച (മെയ് 6) രണ്ടൺുമണി മുതൽ www.results.kite.kerala.gov.in വെബ്‌സൈറ്റിലൂടെ എസ്.എസ്.എൽ.സി ഫലമറിയാൻ കേരളാ ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷൻ (കൈറ്റ്) സംവിധാനം ഒരുക്കി. ഇതിനുപുറമെ 'സഫലം 2019' എന്ന മൊബൈൽ ആപ് വഴിയും ഫലമറിയാം. വ്യക്തിഗത റിസൾട്ടിനു പുറമെ സ്‌കൂൾ വിദ്യാഭ്യാസ ജില്ല റവന്യൂജില്ലാ തലങ്ങളിലുള്ള റിസൾട്ട് അവലോകനം, വിഷയാധിഷ്ഠിത അവലോകനങ്ങൾ, വിവിധ റിപ്പോർട്ടുകൾ, ഗ്രാഫിക്‌സുകൾ തുടങ്ങിയവ ഉൾക്കൊള്ളുന്ന പൂർണ്ണമായ വിശകലനം പോർട്ടലിലും മൊബൈൽ ആപ്പിലും 'റിസൾട്ട് അനാലിസിസ്' എന്ന ലിങ്ക് വഴി ലോഗിൻ ചെയ്യാതെ തന്നെ മൂന്നു മണി മുതൽ ലഭ്യമാകും. ഗൂഗിൾ പ്ലേ സ്റ്റോറിൽ നിന്നും "Saphalam 2019' എന്നു നൽകി ആപ് ഡൗൺലോഡ് ചെയ്യാം. നേരത്തെതന്നെ മൊബൈൽ ആപ് ഡൗൺലോഡ് ചെയ്തു വയ്ക്കുന്നത് എളുപ്പത്തിൽ ഫലം ലഭിക്കാൻ സഹായിക്കും. ഇതിനായി പ്രത്യേക ക്ലൗഡധിഷ്ഠിത സംവിധാനം കൈറ്റ് ഒരുക്കിയിട്ടുണ്ട്. ഹയർ സെക്കന്ററിവൊക്കേഷണൽ ഹയർ സെക്കന്ററി ഫലങ്ങളും പ്രഖ്യാപിക്കുന്ന മുറയ്ക്ക് ഇതേ പോർട്ടലിലും ആപ്പിലും ലഭ്യമാക്കും. പ്രൈമറിതലം മുതലുളള കൈറ്റ് ബ്രോഡ്ബാൻഡ് ഇന്റർനെറ്റ് സംവിധാനം ലഭ്യമാക്കിയിട്ടുള്ള 11769 സ്‌കൂളുകളിലും വിദ്യാർത്ഥികൾക്ക് റിസൾട്ടറിയാനുള്ള സംവിധാനം ഒരുക്കാൻ നിർദ്ദേശിച്ചിട്ടുൺെന്ന് കൈറ്റ് വൈസ് ചെയർമാൻ കെ. അൻവർ സാദത്ത് അറിയിച്ചു. Dt.4.5.2019.
************************
ഒന്നു മുതൽ പന്ത്രണ്ട് വരെയുള്ള ക്ലാസുകളിലെ മുഴുവൻ പാഠപുസ്തകങ്ങളും 'സമഗ്ര' പോർട്ടലി ലഭ്യമാണ്. ഒമ്പത്, പത്ത് ക്ലാസുകളിലെ ഭേദഗതി വരുത്തിയ പുസ്തകങ്ങളും ഇതിൽ ഉൾപ്പെടും. പാഠപുസ്തകങ്ങളുടെ മലയാളം, ഇംഗ്ലീഷ്, തമിഴ്, കന്നട പതിപ്പുകൾ പ്രത്യേകം ലോഗിൻ ചെയ്യാതെ തന്നെ www.samagra.kite.kerala.gov.in പോർട്ടൽ വഴി ലഭിക്കും. ഹോം പേജിലെ 'ടെക്സ്റ്റ് ബുക്‌സ്'എന്ന ലിങ്ക് വഴി മീഡിയം, ക്ലാസ്, വിഷയം എന്നിങ്ങനെ തരംതിരിച്ച് പാഠപുസ്തകങ്ങളുടെ പി.ഡി.എഫ് പതിപ്പുകൾ ലഭിക്കും. ഇതിനു പുറമെ പ്ലേസ്റ്റോറിൽ ' SAMAGRA ' എന്ന് നൽകി ഇൻസ്റ്റാൾ ചെയ്യുന്ന മൊബൈൽ ആപ്പുവഴിയും മുഴുവൻ പാഠപുസ്തകങ്ങളും ഡിജിറ്റൽ റിസോഴ്‌സുകളും പൊതുജനങ്ങൾക്കുൾപ്പെടെ സൗജന്യമായി ഡൗൺലോഡ് ചെയ്യാൻ കഴിയുന്ന രൂപത്തിൽ കേരള ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷൻ (കൈറ്റ്) ലഭ്യമാക്കിയിട്ടുണ്ട്. പ്രൈമറി മുതൽ ഹയർ സെക്കന്ററിതലം വരെയുള്ള എല്ലാ അധ്യാപകർക്കും നാല് ദിവസത്തെ വിഷയാധിഷ്ഠിത പരിശീലനവും ഈ മാസം നൽകുന്നതിനാൽ പാഠഭാഗങ്ങളെ അടിസ്ഥാനമാക്കിയുള്ള പഠന വിഭവങ്ങൾ തയ്യാറാക്കുന്നതിനും പാഠാസൂത്രണം നടത്തുന്നതിനും ഡിജിറ്റൽ പാഠഭാഗങ്ങൾ സഹായിക്കും. Dt.3.5.2019.
************************
സംസ്ഥാനത്തെ എല്ലാ സർക്കാർ/എയ്ഡഡ്/അംഗീകൃത അൺ എയ്ഡഡ്, സി.ബി.എസ്.ഇ, ഐ.സി.എസ്.ഇ സ്‌കൂളുകളിൽ ഒന്ന് മുതൽ പത്ത് വരെ ക്ലാസുകളിൽ പഠിക്കുന്ന ഒ.ഇ.സി വിഭാഗം വിദ്യാർത്ഥികൾക്കുള്ള വിദ്യാഭ്യാസാനുകൂല്യം നടപ്പു വർഷം മുതൽ വിദ്യാർത്ഥികളുടെ ബാങ്ക് അക്കൗണ്ടുകളിലേക്ക് നേരിട്ട് നൽകും. ഒ.ഇ.സി വിദ്യാഭ്യാസാനുകൂല്യത്തിന് അർഹരായ വിദ്യാർത്ഥികൾ മേയ് 31നകം അവരവരുടേയും രക്ഷിതാവിന്റേയും പേരിലുള്ള ജോയിന്റ് ബാങ്ക് അക്കൗണ്ടുകൾ ആരംഭിക്കണം. നിലവിൽ അക്കൗണ്ട് ഉള്ളവർ ബാങ്കുമായി ബന്ധപ്പെട്ട് അക്കൗണ്ട് ലൈവ് ആണെന്ന് ഉറപ്പാക്കണം. Dt.30.4.2019.
************************
സംസ്ഥാനത്തെ സർക്കാർ ഹയർസെക്കൻഡറി സ്‌കൂൾ പ്രിൻസിപ്പൽമാരിൽ നിന്നും 2019-20 ലേക്കുള്ള പൊതുസ്ഥലംമാറ്റത്തിന് അപേക്ഷ ക്ഷണിച്ചു. അപേക്ഷയുടെ മാതൃക www.dhsekerala.gov.in ൽ ലഭ്യമാണ്. നിശ്ചിത മാതൃകയിൽ തയ്യാറാക്കിയ അപേക്ഷകൾ ഹയർസെക്കൻഡറി ഡയറക്ടർ, ഹൗസിംഗ് ബോർഡ് ബിൽഡിംഗ്‌സ്, ശാന്തി നഗർ, തിരുവനന്തപുരം - 1 എന്ന വിലാസത്തിൽ 22ന് വൈകിട്ട് അഞ്ചിന് മുമ്പ് ലഭിക്കണം. നിശ്ചിത മാതൃകയിൽ അല്ലാതെയും വൈകി ലഭിക്കുന്നതുമായ അപേക്ഷകൾ പരിഗണിക്കില്ല. അപേക്ഷകൾ അയയ്ക്കുന്ന കവറിനു പുറത്ത് 'സർക്കാർ ഹയർസെക്കൻഡറി സ്‌കൂൾ പ്രിൻസിപ്പൽമാരുടെ സ്ഥലംമാറ്റം' എന്ന് രേഖപ്പെടുത്തണം. Dt.11.4.2019.
************************
ഈ മാസം നടത്താൻ നിശ്ചയിച്ചിരുന്ന ഡി.എഡ്/ഡി.എൽ.എഡ് സെമസ്റ്റർ പരീക്ഷകളുടെ തീയതി പുന:ക്രമീകരിച്ചു. പരീക്ഷകൾ മേയ് ആറ് മുതൽ 16 വരെ തീയതികളിൽ നടക്കും. പുതുക്കിയ ടൈം ടേബിൾ പരീക്ഷാഭവന്റെ വെബ് സൈറ്റിൽ (www.keralapareekshabhabvan.in) ലഭ്യമാണ്. Dt.10.4.2019.
************************
സംസ്ഥാന സർക്കാർ ജീവനക്കാരുടെ ഡിയർനസ് അലവൻസും പെൻഷൻകാരുടെ ഡിയർനസ് റിലീഫും വർധിപ്പിച്ചുളള ഉത്തരവിറങ്ങി. പുതുക്കിയ നിരക്കിലുളള ഡി.എ 2018 ജനുവരി ഒന്ന് മുതൽ മാർച്ച് 31 വരെയുളള കുടിശ്ശിക സഹിതം ഏപ്രിലിലെ ശമ്പളത്തോടൊപ്പം പണമായി ലഭിക്കും. Dt.8.4.2019.
************************
കേരള സ്റ്റേറ്റ് ലൈബ്രറി കൗൺസിൽ സംസ്ഥാനത്തെ ഹൈസ്‌കൂൾ വിദ്യാർത്ഥികളെ പങ്കെടുപ്പിച്ച് നടത്തുന്ന അഖിലകേരള വായനോൽസവത്തിന്റെ പുസ്തകങ്ങൾ പ്രഖ്യാപിച്ചു. സ്‌കൂൾതലം, താലൂക്ക്തലം, ജില്ലാതലം, സംസ്ഥാനതലം എന്നീ നാല് ഘട്ടങ്ങളിലായാണ് ഹൈസ്‌കൂൾതല മൽസരം നടത്തുന്നത്. സ്‌കൂൾതല മത്സരം ജൂലൈ നാലിനും താലൂക്ക് തലത്തിൽ ആഗസ്റ്റ് നാലിനും ജില്ലാ തലത്തിൽ സെപ്റ്റംബർ 22നും സംസ്ഥാനതലത്തിൽ നവംബർ 9, 10 തിയതികളിലുമാണ് മത്സരം. മത്സരങ്ങൾക്കായി തെരെഞ്ഞെടുത്ത പുസ്തകങ്ങളുടെ വിവരം ചുവടെ സ്വാമിയും കൂട്ടുകാരും (നോവൽ) - ആർ.കെ.നാരായണൻ, സ്മാരകശിലകൾ (നോവൽ) - പുനത്തിൽ കുഞ്ഞബ്ദുളള, നവരസകഥകൾ (കഥ) - ടി.പത്മനാഭൻ, അപരിഗ്രഹം (കവിത) - പ്രഭാവർമ്മ, ചിന്താവിഷ്ടയായ സീത (കവിത) - കുമാരനാശാൻ, കടലറിവുകളും നേരറിവുകളും (ശാസ്ത്രം) - റോബർട്ട് പനിപ്പിളള, രാഷ്ട്രീയത്തിൽ നിന്നും ശാസ്ത്ര ഗവേഷണത്തിലേക്ക് (ജീവിതകഥ) - ഡോ.എം.വിജയൻ, ഇന്ദ്രധനുസിൻ തീരത്ത് (ഓർമ്മക്കുറിപ്പുകൾ) - ഭാരതി തമ്പുരാട്ടി, നാസി ഭീകരതയുടെ നിലവിളികൾക്കിടയിലൂടെ (യാത്രാവിവരണം) - വി.കെ.ജോസഫ്, കേശവ്‌ദേവ്, ഓടയിൽ മനുഷ്യനെ കണ്ടെത്തിയ എഴുത്തുകാരൻ (ജീവചരിത്രം) - എം.കെ.സാനു, ശ്രീനാരായണഗുരു വിശ്വമാനവികതയുടെ പ്രവാചകൻ - പി.കെ.ഗോപാലകൃഷ്ണൻ, നവോത്ഥാനം, ശബരിമല, മതനിരപേക്ഷത - പിണറായി വിജയൻ, പൂജ്യത്തിന്റെ കഥ (ഗണിതം - ബാലസാഹിത്യം) - പള്ളിയറ ശ്രീധരൻ, ഗ്രന്ഥാലോകത്തിന്റെ 2018 ജൂലൈ, സെപ്തംബർ എന്നീ ലക്കങ്ങൾ. Dt.5.4.2019.
************************
2018 നവംബറിൽ നടത്തിയ ഒന്നാം വർഷ ഹയർസെക്കന്ററി തുല്യതാ പരീക്ഷാഫലം പ്രസിദ്ധീകരിച്ചു. www.results.kerala.nic.in, www.dhsekerala.gov.in എന്നീ വെബ്‌സൈറ്റുകളിൽ ഫലം ലഭ്യമാണ്. ഉത്തരക്കടലാസുകളുടെ പുനർമൂല്യനിർണ്ണയം നടത്തുന്നതിനും സൂക്ഷ്മപരിശോധന നടത്തുന്നതിനും, ഫോട്ടോകോപ്പി ലഭിക്കുന്നതിനും നിശ്ചിത ഫോറങ്ങളിലുളള അപേക്ഷകൾ, ഫീസടച്ച് പരീക്ഷയ്ക്ക് രജിസ്റ്റർ ചെയ്ത സ്‌കൂളിലെ പ്രിൻസിപ്പാളിന് 20നകം നൽകണം. പുനർമൂല്യനിർണ്ണയം പേപ്പർ ഒന്നിന് 600 രൂപയും ഫോട്ടോകോപ്പി പേപ്പർ ഒന്നിന് 400 രൂപയും സൂക്ഷ്മ പരിശോധന പേപ്പർ ഒന്നിന് 200 രൂപയുമാണ് ഫീസ്. അപേക്ഷാഫോറങ്ങൾ ഹയർ സെക്കൻഡറി പോർട്ടലിൽ ലഭിക്കും. പരീക്ഷാ രജിസ്‌ട്രേഷൻ കേന്ദ്രങ്ങളായിരുന്ന സ്‌കൂളുകളിൽ ലഭിക്കുന്ന പൂരിപ്പിച്ച അപേക്ഷകൾ എൻ.ഐ.സി. സോഫ്റ്റ്‌വെയർ ഉപയോഗിച്ച് 27നകം പ്രിൻസിപ്പൽമാർ അപ്‌ലോഡ് ചെയ്യണം. പുനർമൂല്യനിർണ്ണയം, സൂക്ഷ്മ പരിശോധന, ഫോട്ടോകോപ്പി എന്നിവയ്ക്കുളള ഫീസ് ബന്ധപ്പെട്ട രജിസ്‌ട്രേഷൻ കേന്ദ്രങ്ങളിലെ പ്രിൻസിപ്പൽമാർ ശേഖരിച്ച് ഹയർ സെക്കൻഡറി പരീക്ഷാ സെക്രട്ടറിയുടെ പേരിൽ തിരുവനന്തപുരത്തെ ശാന്തിനഗർ എസ്.ബി.ഐ ബ്രാഞ്ചിൽ മാറത്തക്കവണ്ണം ഡിമാന്റ് ഡ്രാഫ്റ്റായി സമർപ്പിക്കണം. Dt.3.4.2019.
************************
ഐ.എച്ച്.ആർ.ഡിയുടെ കീഴിലുള്ള തിരുവനന്തപുരം മോഡൽ ഫിനിഷിങ് സ്‌കൂളിൽ സ്‌കൂൾ-കോളേജ് വിദ്യാർത്ഥികൾക്കായി റോബോട്ടിക്‌സിലും ഇന്റർനെറ്റ് ഓഫ് തിങ്‌സിലും അവധിക്കാല പരിശീലനത്തിന് ഒഴിവുള്ള ഏതാനും സീറ്റുകളിലേക്ക് അപേക്ഷ ക്ഷണിച്ചു. കൂടുതൽ വിവരങ്ങൾക്ക് www.modelfinishingschool.org എന്ന വെബ്‌സൈറ്റ് സന്ദർശിക്കുകയോ, mfsfaq@gmail.com എന്ന ഇ-മെയിൽ വിലാസത്തിലോ 9037373077, 9207133385, 0471-2307733 എന്ന നമ്പറിലോ മോഡൽ ഫിനിഷിങ് സ്‌കൂൾ, കേരള സയൻസ് & ടെക്‌നോളജി, മ്യൂസിയം ക്യാമ്പസ്, പി.എം.ജി, തിരുവനന്തപുരം ഓഫീസിൽ നേരിട്ടോ ബന്ധപ്പെടണം. Dt.3.4.2019.
************************
സർക്കാർ വകുപ്പുകൾ, തദ്ദേശസ്വയംഭരണ സ്ഥാപനങ്ങൾ, വിവിധ കമ്മീഷനുകൾ, സർവകലാശാലകൾ, കമ്പനി, ബോർഡ്, കോർപറേഷൻ ഉൾപ്പെടെയുള്ള സ്വയംഭരണ, പൊതുമേഖലാ സ്ഥാപനങ്ങൾ ഐ. ടി ഉപകരണങ്ങൾ സർക്കാരിന്റെ കേന്ദ്രീകൃത സംവിധാനമായ www.cprcs.kerala.gov.in എന്ന പോർട്ടൽ മുഖേന വാങ്ങണമെന്ന് കർശന നിർദ്ദേശം പുറപ്പെടുവിച്ചു. കേന്ദ്രീകൃത സംവിധാനം നിലവിലുള്ളപ്പോഴും പല വകുപ്പുകളും സ്ഥാപനങ്ങളും പ്രത്യേക ടെണ്ടർ നടപടികളിലൂടെ ഉപകരണങ്ങൾ വാങ്ങുന്നത് ശ്രദ്ധയിൽപെട്ട സാഹചര്യത്തിലാണിത്. പ്രത്യേക ടെണ്ടർ വിളിച്ച് കൂടിയ തുകയ്ക്ക് ഉപകരണങ്ങൾ വാങ്ങുന്നത് ധനദുർവിനിയോഗമായി കണക്കാക്കും. ഇതുസംബന്ധിച്ച് സർക്കാർ മാർഗനിർദ്ദേശങ്ങൾ പുറത്തിറക്കി. കേന്ദ്രീകൃത സംവിധാനത്തിൽ ഉൾപ്പെടാത്ത ഐ. ടി ഉപകരണങ്ങൾ വാങ്ങുന്നതിന് സംസ്ഥാന ഐ. ടി മിഷന്റെ പ്രതിനിധി ഉൾപ്പെട്ട ടെക്‌നിക്കൽ കമ്മിറ്റിയുടെ അംഗീകാരത്തോടെ വേണം ടെണ്ടർ നൽകേണ്ടത്. മറ്റു മാർഗങ്ങളിലൂടെ കൂടിയ തുകയ്ക്ക് വാങ്ങിയാൽ അധിക തുക പർച്ചേസിന് നേതൃത്വം നൽകുന്ന ഉദ്യോഗസ്ഥന്റെ വ്യക്തിപരമായ ബാധ്യതയായി കണക്കാക്കുകയും ഉദ്യോഗസ്ഥനിൽ നിന്ന് ഈടാക്കുകയും ചെയ്യും. അംഗീകൃത വില നിലവിലുള്ളപ്പോൾ വകുപ്പുകളുടെ ആവശ്യത്തിന് അതേ ഉപകരണങ്ങൾ കെൽട്രോൺ സമാന്തരമായി ടെണ്ടർ നൽകി വാങ്ങുന്ന പ്രവണത അവസാനിപ്പിക്കണം. സംസ്ഥാന ഐ. ടി മിഷൻ, ഇ ഗവേണൻസ് മിഷൻ ടീം പ്രതിനിധികൾ ഉൾപ്പെട്ട വകുപ്പ്തല ടെക്‌നിക്കൽ കമ്മിറ്റിയുടെ ശുപാർശ സഹിതം മാത്രമേ ഐ. ടി ഉപകരണങ്ങൾ വാങ്ങാൻ അനുവദിക്കൂ. വകുപ്പ്, സ്ഥാപന മേധാവികൾ ഇക്കാര്യം ഉറപ്പാക്കണം. ഇതിനാവശ്യമായ മാർഗ നിർദേശങ്ങൾ കെൽട്രോൺ ഹെൽപ് ഡെസ്‌ക് മുഖേന ലഭ്യമാക്കും. വകുപ്പുകൾക്ക് പരാതികളും അഭിപ്രായങ്ങളും അറിയിക്കുന്നതിനുള്ള സംവിധാനം പോർട്ടലിൽ ഉൾപ്പെടുത്തിയിട്ടുണ്ട്. Dt.3.4.2019.
************************
കേരള ഇൻഫ്രാസ്ട്രക്ചർ ആൻഡ് ടെക്‌നോളജി ഫോർ എഡ്യൂക്കേഷന്റെ (കൈറ്റ്) നേതൃത്വത്തിൽ സ്‌കൂൾ അധ്യാപകർക്കായി നാല് ദിവസത്തെ പ്രത്യേക ഐ.ടി പരിശീലനം നൽകുന്നു. 3,500 ഓളം പരിശീലകരുടെ സേവനം പ്രയോജനപ്പെടുത്തി വിവിധ ജില്ലകളിലെ 1,500 പരിശീലന കേന്ദ്രങ്ങളിൽ ഒരേ സമയം 37,500 ഓളം അധ്യാപകർക്ക് പരിശീലനം നൽകും. ഏപ്രിൽ 26 ന് ആരംഭിക്കുന്ന പരിശീലനങ്ങൾ മെയ് അവസാനവാരം വരെ നീണ്ടുനില്ക്കും. ഏപ്രിൽ 16 നകം അധ്യാപകർ രജിസ്റ്റർ ചെയ്യണം. കാഴ്ച്ചപരിമിതിയുള്ള അധ്യാപകർക്ക് പ്രത്യേക സോഫ്റ്റ്‌വെയർ അധിഷ്ഠിതമാക്കിയുള്ള ഐ.സി.ടി പരിശീലനവും ഒരുക്കിയിട്ടുണ്ട്. പരിശീലനത്തിൽ പങ്കെടുക്കുന്ന അധ്യാപകർക്ക് താല്പര്യമുള്ള കേന്ദ്രവും ബാച്ചും തിരഞ്ഞെടുക്കുന്നതിനുള്ള ഓൺലൈൻ സംവിധാനം കൈറ്റ് വെബ്‌സൈറ്റിലെ (www.kite.kerala.gov.in) ) ട്രെയിനിംഗ് മാനേജ്‌മെന്റ് സിസ്റ്റം 2019 വിഭാഗത്തിൽ ലഭ്യമാണ്. ഈ സംവിധാനം വഴി അധ്യാപകർക്ക് ഏത് ജില്ലയിലും പരിശീലനത്തിൽ പങ്കെടുക്കാം. ഓരോ ബാച്ചിലെയും നിശ്ചിത എണ്ണത്തിൽ ആദ്യം രജിസ്റ്റർ ചെയ്യുന്നവർക്ക് അവസരം നല്കും. Dt.31.3.2019.
************************
സംസ്ഥാനത്ത് അനുഭവപ്പെടുന്ന അത്യുഷ്ണത്തിന്റെയും അതിവരൾച്ചയുടെയും സാഹചര്യത്തിൽ സി.ബി.എസ്.സി, സി.ഐ.എസ്.സി.ഇ സ്‌കൂളുകൾ ഉൾപ്പെടെ സംസ്ഥാനത്തെ എല്ലാ ഗവൺമെന്റ്/എയ്ഡഡ്/അൺഎയ്ഡഡ് ലോവർ പ്രൈമറി, അപ്പർ പ്രൈമറി, ഹൈസ്‌കൂൾ, ഹയർസെക്കൻഡറി, വൊക്കേഷണൽ ഹയർസെക്കൻഡറി സ്‌കൂളുകളിലും മധ്യവേനലവധിക്കാലത്ത് ക്ലാസുകൾ നടത്തരുതെന്ന് ബന്ധപ്പെട്ട എല്ലാ പ്രഥമാധ്യാപകർക്കും പ്രിൻസിപ്പൽമാർക്കും സ്‌കൂൾ മാനേജർമാർക്കും പൊതുവിദ്യാഭ്യാസ വകുപ്പ് കർശനനിർദേശം നൽകി. എന്നാൽ, മധ്യവേനലവധിക്കാലത്ത് പരമാവധി 10 ദിവസം എന്ന് നിജപ്പെടുത്തി ബന്ധപ്പെട്ട വിദ്യാഭ്യാസ ഓഫീസറിൽനിന്ന് മുൻകൂർ അനുമതി വാങ്ങിയതിനുശേഷം വെക്കേഷൻ ക്യാമ്പുകൾ നടത്താവുന്നതാണ്. അനുമതി നൽകുന്ന ഓഫീസർ ക്യാമ്പ് നടക്കുന്ന സ്‌കൂൾ നേരിട്ട് സന്ദർശിച്ച് ക്യാമ്പുകളിൽ പങ്കെടുക്കുന്ന കുട്ടികൾക്ക് ആവശ്യമായ ശുദ്ധജലം, ഭക്ഷണം, ഫാൻ, ടോയ്‌ലറ്റ്, പ്രഥമശുശ്രുഷാസൗകര്യം ഉൾപ്പെടെയുള്ള ആവശ്യമായ എല്ലാ ഭൗതിക സാഹചര്യങ്ങളും ഒരുക്കിയിട്ടുണ്ടെന്ന് പ്രത്യേകം ഉറപ്പുവരുത്തേണ്ടതാണ്. ഇത്തരം ക്യാമ്പുകൾ സംഘടിപ്പിക്കുമ്പോൾ കുട്ടികൾക്ക് വേനൽച്ചൂടിന്റെ ആഘാതം ഉണ്ടാകാതെ സൂക്ഷിക്കാൻ സ്‌കൂൾ അധികൃതരും ക്യാമ്പ് സംഘാടകരും സവിശേഷ ശ്രദ്ധ പുലർത്തണം. സർക്കുലറിലെ നിർദേശങ്ങൾ കൃത്യമായി പാലിക്കപ്പെടുന്നുണ്ടെന്ന് ബന്ധപ്പെട്ട വിദ്യാഭ്യാസ ഓഫീസർമാർ ഉറപ്പുവരുത്തണം. ലംഘനമെന്തെങ്കിലും ശ്രദ്ധയിൽപെട്ടാൽ ഉത്തരവാദികളായവർക്കെതിരെ കർശന അച്ചടക്ക നടപടികൾ സ്വീകരിക്കുമെന്നും പൊതുവിദ്യാഭ്യാസ സെക്രട്ടറി അറിയിച്ചു. Dt.30.3.2019.
************************
എൻ.സി.ഇ.ആർ.ടി. നിർദ്ദേശപ്രകാരം പരിഷ്‌കരിച്ച ഒന്നാംഘട്ട ദേശീയ പ്രതിഭാ നിർണ്ണയ പരീക്ഷയുടെ (എൻ.റ്റി.എസ്. പരീക്ഷ) ഫലം പ്രസിദ്ധീകരിച്ചു. വിജയിച്ച 223 വിദ്യാർത്ഥികളുടെ വിശദാംശങ്ങൾ www.scert.kerala.gov.in ൽ ലഭ്യമാണ്. Dt.29.3.2019.
************************
ഫെബ്രുവരിയിൽ നടത്തിയ കെ.ടെറ്റ് പരീക്ഷയുടെ ഫലം പ്രസിദ്ധപ്പെടുത്തി. പരീക്ഷാഭവൻ വെബ്‌സൈറ്റിലും www.ktet.kerala.gov.in ലും ലഭ്യമാണ്. നാലു കാറ്റഗറികളിൽ 61011 പേർ പരീക്ഷയെഴുതിയതിൽ 20815 പേർ വിജയിച്ചു. ആകെ വിജയശതമാനം 34.12. കാറ്റഗറി ഒന്നിൽ 3443 പേർ വിജയിച്ചു. വിജയശതമാനം 17.61%. കാറ്റഗറി രണ്ടിൽ 6994 പേർ വിജയിച്ചു. വിജയശതമാനം 49.55%. കാറ്റഗറി മൂന്നിൽ 8207 പേർ വിജയിച്ചു. വിജയശതമാനം 40.09%. കാറ്റഗറി നാലിൽ 2171 പേർ പരീക്ഷ വിജയിച്ചു. വിജയശതമാനം 31.56%. നിലവിൽ സർക്കാർ/എയ്ഡഡ് സ്‌കൂളുകളിലെ അധ്യാപക തസ്തികകളിലുള്ള 4283 പേർ പരീക്ഷ എഴുതിയതിൽ 1335 പേർ വിജയിച്ചു. വിജയശതമാനം 31.17%. പരീക്ഷ വിജയിച്ചവർ അസൽ സർട്ടിഫിക്കറ്റുകൾ പരീക്ഷാ സെന്റർ സ്ഥിതി ചെയ്യുന്ന സ്ഥലത്തെ ജില്ലാ വിദ്യാഭ്യാസ ഓഫീസിൽ പരിശോധനയ്ക്ക് ഹാജരാക്കണമെന്ന് പരീക്ഷാഭവൻ സെക്രട്ടറി അറിയിച്ചു. Dt.29.3.2019.
************************
വോട്ടർപട്ടികയിൽ പേര് ചേർക്കുന്നതിന് ലഭിച്ചിട്ടുള്ള പുതിയ അപേക്ഷകൾ പരിശോധിച്ച് നടപടിയെടുക്കേണ്ടതിനാൽ ബൂത്ത് ലെവൽ ഓഫീസർമാരായ വിവിധ വകുപ്പുകളിലെ ജീവനക്കാർക്ക് മാർച്ച് 30, ഏപ്രിൽ ഒന്ന് തിയതികളിൽ വകുപ്പ് മേധാവികൾ ഡ്യൂട്ടി ലീവ് അനുവദിക്കാൻ ഉത്തരവായി. Dt.29.3.2019.
************************
ഈ വർഷത്തെ എസ്.എസ്.എൽ.സി പരീക്ഷ ഉത്തരക്കടലാസ് മൂല്യനിർണ്ണയം സംസ്ഥാനത്തൊട്ടാകെ 54 ക്യാമ്പുകളിലായി ഏപ്രിൽ നാലിന് ആരംഭിച്ച് 29ന് അവസാനിക്കുന്ന രീതിയിൽ മൂന്നു ഘട്ടങ്ങളിലായി നടത്തും. ഒന്നാം ഘട്ടം ഏപ്രിൽ നാല് മുതൽ 12 വരെയും (8 ദിവസം), രണ്ടാം ഘട്ടം ഏപ്രിൽ 16 മുതൽ 17 വരെയും (2 ദിവസം), മൂന്നാം ഘട്ടം ഏപ്രിൽ 25 മുതൽ 29 വരെയും (4 ദിവസം) നടക്കും. വിവിധ വിഷയങ്ങളുടെ സ്‌കീം ഫൈനലൈസേഷൻ ക്യാമ്പുകൾ 12 കേന്ദ്രീകൃത മൂല്യനിർണ്ണയ ക്യാമ്പുകളിൽ ഏപ്രിൽ ഒന്നിനും രണ്ടിനും നടത്തും. സംസ്ഥാനത്തൊട്ടാകെ മൂല്യനിർണ്ണയത്തിനായി 919 അഡീഷണൽ ചീഫ് എക്‌സാമിനർമാരെയും 9,104 അസിസ്റ്റന്റ് എക്‌സാമിനർമാരെയും നിയമിച്ച് ഉത്തരവായി. കൂടാതെ രണ്ടു കാറ്റഗറിയിലും റിസർവായി എക്‌സാമിനർമാരെ നിയമിച്ചിട്ടുണ്ട്. നിയമന ഉത്തരവ് മാർച്ച് 29ന് തന്നെ പ്രഥമാദ്ധ്യാപകരിൽ നിന്നും എക്‌സാമിനർമാർ കൈപ്പറ്റണമെന്ന് പരീക്ഷാഭവൻ സെക്രട്ടറി അറിയിച്ചു. Dt.29.3.2019.
************************
ഏപ്രിൽ മാസത്തെ ആദ്യ പ്രവൃത്തിദിവസമായ ഏപ്രിൽ ഒന്നിന് ട്രഷറികളിൽ ഇടപാട് ഉണ്ടായിരിക്കില്ലെന്ന് ട്രഷറി ഡയറക്ടർ അറിയിച്ചു. Dt.28.3.2019.
************************
സൂര്യാഘാത സാധ്യത അനുദിനം വർധിക്കുന്ന സാഹചര്യത്തിൽ ആയൂർവേദത്തിലൂടെ സൂര്യാഘാത സാധ്യത ഫലപ്രദമായി നേരിടാനാകുമെന്ന് ഭാരതീയ ചികിത്സാ വകുപ്പ് ഡയറക്ടർ ഡോ. കെ.എസ്. പ്രിയ അറിയിച്ചു. ഇതിനായി കേരളത്തിലുടനീളമുള്ള ഭാരതീയ ചികിത്സാ വിഭാഗത്തിന്റെ സ്ഥാപനങ്ങൾ വഴി ചികിത്സ ലഭ്യമാക്കുന്നുണ്ട്. വേനലിൽ ഉണ്ടാകാവുന്ന ശാരീരിക മാറ്റങ്ങളും വരാൻ സാധ്യതയുള്ള രോഗങ്ങളും പ്രതിരോധിക്കാൻ കഴിയുന്ന രീതിയിലുള്ള ആഹാരവും ദൈനംദിന ചര്യകളും പിന്തുടർന്നാൽ ഒരു പരിധി വരെ സൂര്യാഘാതത്തെ പ്രതിരോധിക്കാനാകും. ആഹാരത്തിൽ എരിവ്, പുളി, ഉപ്പ് എന്നിവയുടെ ഉപയോഗം വളരെയധികം കുറയ്ക്കണം. വേഗം ദഹിക്കുന്നതും ദ്രവരൂപത്തിലുള്ളതും തണുത്ത ഗുണത്തോടു കൂടിയതുമായ ആഹാരങ്ങൾ വേനൽകാലത്ത് ആരോഗ്യം നിലനിർത്തുന്നതിനും വേനൽക്കാല രോഗങ്ങളെ പ്രതിരോധിക്കുന്നതിനും ഉപയോഗിക്കണം. കയ്പുരസമുള്ള പച്ചക്കറികളും ഇക്കാലത്ത് സുലഭമായി ലഭിക്കുന്ന പഴങ്ങളും ആഹാരത്തിൽ ധാരാളമായി ഉപയോഗിക്കാം. മത്സ്യവും മാംസവും വളരെക്കുറച്ചുമാത്രം ഉപയോഗിക്കുക. ഗോതമ്പ്, അരി, കൂവരക്, ചോളം ചെറുപയർ, പരിപ്പ് വർഗ്ഗങ്ങൾ ഉപയോഗിക്കാം. കുടിക്കാനായി തിളപ്പിച്ചാറിയ വെള്ളം മാത്രം ഉപയോഗിക്കണം. തിളപ്പിച്ചാറിയ വെള്ളത്തിൽ കഴുകി വൃത്തിയാക്കിയ രാമച്ചമിട്ട് വച്ചിരുന്ന ജലം, നറുനീണ്ടി ഇട്ടു തിളപ്പിച്ച ജലം എന്നിവയും കുടിക്കാം. മലർപ്പൊടി പഞ്ചസാര ചേർത്ത് അൽപം വീതം കഴിക്കുന്നത് ക്ഷീണമകറ്റുന്നതിനു സഹായിക്കും. വിവിധ തരം പഴച്ചാറുകൾ നേർപ്പിച്ചും ഉപയോഗിക്കാം. തണ്ണിമത്തൻ, മാങ്ങ, മുന്തിരി, പച്ചക്കറികൾ, മത്തൻ എന്നിവ ജ്യൂസ് ആക്കിയും മോരിൻ വെള്ളം, നാരങ്ങാവെള്ളം എന്നിവയും കുടിക്കാം. വേനൽക്കാലത്ത് മദ്യവും അതുപോലെയുള്ള പാനീയങ്ങളും ഒഴിവാക്കണം. സാധാരണ കുടിക്കുന്നതിലും കൂടുതൽ വെള്ളം വേനൽകാലത്ത് കുടിക്കണം. ആരോഗ്യവാനായ ഒരു വ്യക്തി 12 മുതൽ 15 ഗ്ലാസ് വരെ വെള്ളം വേനൽക്കാലത്ത് കുടിക്കണം. ശരീര താപം വർദ്ധിക്കുന്നതിനാൽ ദേഹത്ത് എണ്ണ തേക്കുന്നത് നല്ലതാണ്. പിണ്ഡതൈലം, നാല്പാമരാദിതൈലം തുടങ്ങിയ എണ്ണകൾ പുരട്ടി കുളിക്കുന്നത് ത്വക്കിന്റെ പ്രതിരോധ ശക്തി വർധിപ്പിക്കും. അയഞ്ഞ കോട്ടൺ വസ്ത്രങ്ങൾ ധരിക്കുന്നതാണ് നല്ലത്. നേരിട്ട് സൂര്യ രശ്മികൾ ശരീരത്തിൽ പതിക്കാത്ത തരത്തിലുള്ള വസ്ത്രങ്ങൾ ആണ് അനുയോജ്യം. സർക്കാർ ആയുർവേദ സ്ഥാപനങ്ങളിൽ ലഭ്യമായ ഷഡംഗം കഷായ ചൂർണം, ഗുളൂച്യാദി കഷായ ചൂർണ്ണം, ദ്രാക്ഷാദികഷായ ചൂർണം എന്നിവ ഇട്ട് തിളപ്പിച്ച വെള്ളം കുടിക്കുന്നതിന് ഉപയോഗിക്കാം. വേനൽക്കാല രോഗങ്ങൾക്ക് പ്രതിരോധത്തിനും ചികിത്സക്കും ആവശ്യമായ എല്ലാ ഔഷധങ്ങളും ഗവ. ആയുർവേദ സ്ഥാപനങ്ങളിൽ ലഭ്യമാണ്. സൂര്യാഘാതം എന്ന ഗുരുതരമായ അവസ്ഥയിലേക്ക് എത്തുംമുൻപ് സൂര്യാതപത്തിന്റേതായ ലക്ഷണങ്ങൾ രോഗിയിൽ വന്നു തുടങ്ങും. ശരീരതാപനില സാധാരണയിൽ കൂടുതൽ ഉയരുക, തൊലിക്ക് ചുവന്ന നിറം വരുക, തലചുറ്റൽ, ക്ഷീണം, മനംപിരട്ടൽ, തളർച്ച, ബോധം നഷ്ടമാകുക എന്നിവയൊക്കെ ഉണ്ടാകാം. ഈ അവസരത്തിൽ വെയിലത്തു നിന്നും മാറ്റി ആവശ്യമായ ചികിത്സയും മരുന്നുകളും നൽകണം. സൂര്യാഘാതത്തിൽ ശരീര താപനില വളരെ കൂടുതൽ ഉയരുന്നു, ശ്വാസോഛ്വാസം കൂടുകയും തൊലി ചുവന്ന് പിന്നീട് വരണ്ടതാകുകയും ചെയ്യും. ശരീരം വിയർക്കുന്നത് നിൽക്കുകയും അപസ്മാര ലക്ഷണങ്ങൾ പ്രകടിപ്പിക്കുകയും ചെയ്യും. അമിതമായ താപനില ആന്തരാവയവങ്ങളുടെ പ്രവർത്തനത്തെ ബാധിച്ച് ബോധക്ഷയവും മരണവും സംഭവിക്കാം. സൂര്യാഘാതമേറ്റ രോഗിയെ താഴെ പറയുന്ന രീതിയിൽ പരിചരിക്കാം: സൂര്യതാപമേറ്റ ചുറ്റുപാടിൽ നിന്നും ഉടൻ തന്നെ രോഗിയെ തണലിലേക്ക് മാറ്റണം. ശരീര താപനില ക്രമാനുഗതമായി കുറച്ചു കൊണ്ടുവരുന്നതിനുള്ള നടപടികൾ സ്വീകരിക്കണം. ശരീരം നനഞ്ഞ തുണികൊണ്ട് പൊതിയുക. തല, കഴുത്തിന്റെ പുറകുവശം, കക്ഷഭാഗങ്ങൾ, തുടയിടുക്കുകൾ എന്നിവിടങ്ങളിൽ നനഞ്ഞ തുണി വയ്ക്കുന്നത് നല്ലതാണ്. കുടിക്കാനായി മോരിൽ ഇഞ്ചിയും മല്ലിയിലയും ചേർത്ത് ഉപയോഗിക്കുക. നറു നീണ്ടി, രാമച്ചം എന്നിവ ഇട്ട വെള്ളം തിളപ്പിച്ച് ഉപയോഗിക്കാം. കറ്റാർവാഴയുടെ ഉള്ളിലുള്ള ഭാഗം തൊലിപ്പുറത്ത് പുരട്ടുന്നത് ഫലപ്രദമാണ്. കുറച്ചു കുറച്ചായി വെള്ളം കുടിപ്പിക്കുക. കോളകൾ, സോഡ ചേർന്ന പാനീയങ്ങൾ, മദ്യം എന്നിവ കൊടുക്കരുത്. അത് നിർജജലീകരണം ഉണ്ടാക്കും. Dt.26.3.2019.
************************
ഐ.എച്ച്.ആർ.ഡിയുടെ കീഴിലുള്ള തിരുവനന്തപുരം മോഡൽ ഫിനിഷിങ് സ്‌കൂളിൽ അവധിക്കാല ക്ലാസുകൾ നടത്തും. അഞ്ച് മുതൽ 12 വരെയുള്ള ക്ലാസുകൾക്ക് C/C++, Java, Python കമ്പ്യൂട്ടർ പ്രോഗ്രാമിങ് ഭാഷകൾ പരിചയപ്പെടുത്തും. Electronics – Internet of Things/ Robotics- Arduino അടിസ്ഥാനപ്പെടുത്തി പ്രോജക്ടുകൾ ചെയ്തു പഠിക്കുവാനുള്ള അവസരം ഉണ്ടാകും. പ്ലസ്ടു കഴിഞ്ഞവർക്കും കോളേജ് വിദ്യാർത്ഥികൾക്കും കമ്മ്യൂണിക്കേറ്റീവ് ഇംഗ്ലീഷ്, ഫോറിൻ ലാംഗ്വേജ്, കരിയർ ഗൈഡൻസ് ക്ലാസുകൾ സംഘടിപ്പിക്കുന്നു. കൂടുതൽ വിവരങ്ങൾക്ക്: www.modelfinishingschool.org ഇ-മെയിൽ: mfsfaq@gmail.com. വിലാസം: മോഡൽ ഫിനിഷിങ് സ്‌കൂൾ, കേരള സയൻസ് ആന്റ് ടെക്‌നോളജി മ്യൂസിയം ക്യാമ്പസ്, പി.എം.ജി, തിരുവനന്തപുരം. ഫോൺ: 0471-2307733, 9037373077, 9207133385. Dt.26.3.2019.
************************
ദേശീയ തലത്തിൽ പ്രതിഭാശാലികളായ ഹൈസ്‌കൂൾ വിദ്യാർത്ഥികളെ കണ്ടെത്തുന്ന നാഷണൽ ടാലന്റ് സേർച്ച് പരീക്ഷയുടെ നവംബറിൽ നടക്കുന്ന ഒന്നാംഘട്ട പരീക്ഷാ പരിശീലനത്തിന് അപേക്ഷ ക്ഷണിച്ചു. സെന്റർ ഫോർ കണ്ടിന്യൂയിംഗ് എജ്യൂക്കേഷൻ കേരളയുടെ കീഴിൽ പ്ലാമൂട്, ചാരാച്ചിറയിലുള്ള കേരള സ്റ്റേറ്റ് സിവിൽ സർവീസ് അക്കാഡമിയിലും പാലക്കാട് സബ് സെന്ററിലും പത്താം ക്ലാസ്സ് വിദ്യാർത്ഥികൾക്ക് കോഴ്‌സിൽ ചേരാം. ഏപ്രിൽ 28 മുതൽ ഒക്‌ടോബർ അവസാനം വരെയാണ് കോഴ്‌സ്. എല്ലാ ഞായറാഴ്ചകളിലും രണ്ടാം ശനിയാഴ്ചകളിലുമാണ് ക്ലാസ്സ്. ജി.എസ്.ടി. ഉൾപ്പെടെ 5900 രൂപയാണ് ഫീസ്. അപേക്ഷാ ഫോം മാർച്ച് 28 മുതൽ ചാരാച്ചിറയിലെ സിവിൽ സർവീസ് അക്കാഡമി മെയിൻ സെന്ററിലും പാലക്കാട്ടെ സബ് സെന്ററിലും ലഭിക്കും. അവസാന തിയതി ഏപ്രിൽ 27. വിലാസം: ഡയറക്ടർ, സെന്റർ ഫോർ കണ്ടിന്യൂയിംഗ് എജ്യൂക്കേഷൻ കേരള, ആനത്തറ ലെയിൻ, ചാരാച്ചിറ, കവടിയാർ പി.ഒ., തിരുവനന്തപുരം. ഫോൺ: 0471-2313065, 2311654 വെബ്‌സൈറ്റ്: www.ccek.org, www.kscsa.org Dt.25.3.2019.
************************
എൽ.എസ്.എസ് - യു.എസ്.എസ് പരീക്ഷ നാളെ (ഫെബ്രുവരി 23) സംസ്ഥാനത്തെ 1,391 കേന്ദ്രങ്ങളിലായി രാവിലെ 10.15 മുതൽ 12 മണി വരെയും ഉച്ചയ്ക്ക് 1.15 മുതൽ മൂന്ന് മണി വരെയും നടത്തും. എൽ.എസ്.എസ് പരീക്ഷയ്ക്ക് 88,019 കുട്ടികളും യു.എസ്.എസ് പരീക്ഷയ്ക്ക് 68,847 കുട്ടികളും രജിസ്റ്റർ ചെയ്തിട്ടുണ്ട്. Dt.21.2.2019.
************************
കെ.ടെറ്റ് കാറ്റഗറി 1, 2, 3, 4 പരീക്ഷകളുടെ ഉത്തരസൂചികകൾ പരീക്ഷാഭവന്റെ വെബ്‌സൈറ്റിൽ പ്രസിദ്ധീകരിച്ചു. ഉത്തരസൂചികകളിൽ പരീക്ഷാർത്ഥികൾക്ക് ഏതെങ്കിലും തരത്തിലുള്ള പരാതികളുണ്ടെങ്കിൽ വെബ്‌സൈറ്റിലുള്ള നിശ്ചിത ഫോർമാറ്റിൽ അവയ്ക്ക് ആധാരമായ രേഖകൾ സഹിതം ഈ മാസം 27 ന് മുമ്പ് നേരിട്ടോ തപാൽ മാർഗ്ഗമോ പരീക്ഷാസെക്രട്ടറി പരീക്ഷാഭവൻ, പൂജപ്പുര, തിരുവനന്തപുരം-12 എന്ന വിലാസത്തിൽ നൽകണം. Dt.21.2.2019.
************************
ഫെബ്രുവരി 28 മുതൽ നടക്കേണ്ടിയിരുന്ന എസ്.എസ്.എൽ.സി ഐ.റ്റി പ്രാക്ടിക്കൽ പരീക്ഷ മാർച്ച് ഒന്നിന് എല്ലാ പരീക്ഷാകേന്ദ്രങ്ങളിലും ആരംഭിക്കുമെന്ന് പരീക്ഷാഭവൻ അറിയിച്ചു. ഫെബ്രുവരി 18ന് നടക്കേണ്ടിയിരുന്ന എസ്.എസ്.എൽ.സി മോഡൽ പരീക്ഷ ഫെബ്രുവരി 28 നു നടക്കും. Dt.21.2.2019.
************************
സംസ്ഥാനത്തെ 9941 പ്രൈമറി, അപ്പർ പ്രൈമറി സ്‌കൂളുകളിൽ ഹൈടെക് ലാബുകൾ സ്ഥാപിക്കുന്നതിന് 292 കോടി രൂപയുടെ സാമ്പത്തികാനുമതി കിഫ്ബി നൽകിയ സാഹചര്യത്തിൽ പദ്ധതി നടപ്പാക്കാനായുള്ള പ്രാഥമിക വിവരശേഖരണം കേരള ഇൻഫ്രാസ്ട്രക്ചർ ആൻഡ് ടെക്‌നോളജി ഫോർ എഡ്യൂക്കേഷൻ (കൈറ്റ്) ആരംഭിച്ചു. ഇതിനായി കൈറ്റിന്റെ വെബ്‌സൈറ്റിൽ നിന്നും ലഭിക്കുന്ന ഫോറത്തിൽ വിവരങ്ങൾ പൂരിപ്പിച്ച് ഫെബ്രുവരി അവസാനവാരം ഉപജില്ലാ തലങ്ങളിൽ നടത്തുന്ന പരിശീലനത്തിൽ പ്രഥമാധ്യാപകർ പങ്കെടുക്കണം. പ്രഥമാധ്യാപകർ നൽകുന്ന വിവരങ്ങളുടെ അടിസ്ഥാനത്തിൽ സ്‌കൂൾ സർവേ നടത്തിയായിരിക്കും വിവരങ്ങൾ അപ്‌ലോഡ് ചെയ്യുക എന്നതിനാൽ വിവരങ്ങൾ കൃത്യമായും സമയബന്ധിതമായും നൽകണമെന്ന് കൈറ്റ് വൈസ് ചെയർമാൻ കെ. അൻവർ സാദത്ത് അറിയിച്ചു. ഉപജില്ലാതല പരിശീലനങ്ങളുടെ വിശദാംശങ്ങൾ കൈറ്റിന്റെ ജില്ലാ ഓഫീസുകളിൽ നിന്നും സ്‌കൂളുകളെ പ്രത്യേകം അറിയിക്കും. സർക്കുലർ www.kite.kerala.gov.in ൽ ലഭ്യമാണ്. Dt.20.2.2019.
************************
മാർച്ചിൽ നടക്കുന്ന ഒന്നാംവർഷ ഹയർ സെക്കന്ററി പരീക്ഷകളുടെ ടൈംടേബിൾ പുന:ക്രമീകരിച്ചു. രണ്ടാം വർഷ ഹയർ സെക്കന്ററി പരീക്ഷയുടെ ടൈംടേബിളിൽ യാതൊരുവിധ മാറ്റവും ഉണ്ടായിരിക്കുന്നതല്ല. പുതുക്കിയ ഒന്നാംവർഷ ടൈംടേബിൾ ചുവടെ. മാർച്ച് ആറിന് ഹിസ്റ്ററി, ഇസ്ലാമിക് ഹിസ്റ്ററി & കൾച്ചർ, ഏഴിന് ബിസിനസ് സ്റ്റഡീസ്, കെമിസ്ട്രി, ജേർണലിസം 11 ന് ആന്ത്രപ്പോളജി, ഗാന്ധിയൻ സ്റ്റഡീസ്, മാത്തമറ്റിക്‌സ്, സംസ്‌കൃതം ശാസ്ത്ര, 13 ന് പാർട്ട്-ഒന്ന് ഇംഗ്ലീഷ്, 14 ന് സോഷ്യൽ വർക്ക് 18 ന് പാർട്ട്-രണ്ട് ഭാഷകൾ, കമ്പ്യൂട്ടർ ഇൻഫർമേഷൻ ടെക്‌നോളജി (പഴയത്), കമ്പ്യൂട്ടർ സയൻസ് & ഇൻഫർമേഷൻ ടെക്‌നോളജി, 19 ന് ജോഗ്രഫി, സൈക്കോളജി, മ്യൂസിക് 20 ന് കമ്മ്യൂണിക്കേറ്റീവ് ഇംഗ്ലീഷ്, ഇലക്‌ട്രോണിക് സർവ്വീസ് ടെക്‌നോളജി (പഴയത്), ഇലക്‌ട്രോണിക് സിസ്റ്റംസ്, പൊളിറ്റിക്കൽ സയൻസ്, 21 ന് കമ്പ്യൂട്ടർ ആപ്ലിക്കേഷൻ, ഇലക്‌ട്രോണിക്‌സ്, ജിയോളജി, ഹോം സയൻസ്, ഫിലോസഫി, സ്റ്റാറ്റിസ്റ്റിക്‌സ്, 25 ന് അക്കൗണ്ടൻസി, ബയോളജി, കമ്പ്യൂട്ടർ സയൻസ്, പാർട്ട്-മൂന്ന് ഭാഷകൾ, സംസ്‌കൃതം, സാഹിത്യം, 26 ന് സോഷ്യോളജി, 27 ന് ഇക്കണോമിക്‌സ്, ഇംഗ്ലീഷ് ലിറ്ററേച്ചർ, ഫിസിക്‌സ്. Dt.16.2.2019.
************************
ഫെബ്രുവരി 23 ന് രാവിലെയും ഉച്ചയ്ക്കു ശേഷവുമായി നടക്കുന്ന എൽ.എസ്.എസ്./യു.എസ്.എസ്. പരീക്ഷകളുടെ ഹാൾടിക്കറ്റ് പ്രസിദ്ധീകരിച്ചു. bpkerala.in/lss_uss_2019 എന്ന ലിങ്കിൽ നിന്നോ, പരീക്ഷാഭവൻ വെബ്‌സൈറ്റിൽ നിന്നോ ഹെഡ്മാസ്റ്റർമാർ ഹാൾടിക്കറ്റ് ഡൺലോഡ് ചെയ്യണം. Dt.15.2.2019.
************************
ഹയർ സെക്കണ്ടറി, നോൺ വൊക്കേഷണൽ അധ്യാപക നിയമനത്തിന് ഏർപ്പെടുത്തിയിരിക്കുന്ന സംസ്ഥാനതല യോഗ്യതാ നിർണ്ണയ പരീക്ഷയായ സെറ്റ് (സ്റ്റേറ്റ് എലിജിബിലിറ്റി ടെസ്റ്റ്) ഓൺലൈൻ രജിസ്‌ട്രേഷൻ ഫെബ്രുവരി 17 ന് അഞ്ച് മണി വരെ ദീർഘിപ്പിച്ചു. അപേക്ഷകൾ 2019 ഫെബ്രുവരി 25 ന് വൈകുന്നേരം അഞ്ചിനു മുമ്പായി എൽ.ബി.എസ്. സെന്ററിൽ ലഭിക്കണം. സെറ്റ് പരീക്ഷ മാർച്ച് 31 ന് നടത്തും. Dt.15.2.2019.
************************
ധനകാര്യ വകുപ്പിന്റെ കീഴിലുള്ള സ്പാർക്ക് പ്രോജക്ടിലേക്ക് ട്രെയിനർ തസ്തികയിലേക്ക് ഉദ്യോഗാർത്ഥികളെ എംപാനൽ ചെയ്യുന്നു. വിദ്യാഭ്യാസ യോഗ്യത, നിബന്ധനകൾ തുടങ്ങിയ വിവരങ്ങൾ www.info.spark.gov.in എന്ന വെബ്‌സൈറ്റിൽ ലഭ്യമാണ്. Dt.15.2.2019.
************************
ഉന്നത വിദ്യാഭ്യാസ വകുപ്പിന് കീഴിലുള്ള സർവകലാശാലകളിലേയും, കോളേജുകളിലേയും അദ്ധ്യാപകർക്ക് വിദേശയാത്രയ്ക്കുള്ള അനുമതി തേടുന്നതിനായി ഉന്നത വിദ്യാഭ്യാസ വകുപ്പ്, ഐ.എച്ച്.ആർ.ഡി.-യുടെ സാങ്കേതിക സഹായത്തോടെ സോഫ്റ്റ് (സിസ്റ്റം ഫോർ ഓൺലൈൻ ആപ്ലിക്കേഷൻ ഫോർ ഫോറിൻ ട്രാവെൽ) എന്ന സോഫ്റ്റ് വെയർ വികസിപ്പിച്ചിട്ടുണ്ട്. സോഫ്റ്റ് മുഖേന അപേക്ഷകൾ അയക്കുന്നതിനുള്ള മാർഗ നിർദ്ദേശങ്ങൾ www.soaft.kerala.gov.in - ൽ ലഭ്യമാണ്. Dt.14.2.2019.
************************
ഹയർ സെക്കണ്ടറി, നോൺ വൊക്കേഷണൽ അദ്ധ്യാപക നിയമനത്തിന് ഏർപ്പെടുത്തിയിരിക്കുന്ന സംസ്ഥാനതല യോഗ്യത നിർണ്ണയ പരീക്ഷയായ സെറ്റ് (സ്റ്റേറ്റ് എലിജിബിലിറ്റി ടെസ്റ്റ്) മാർച്ച് 31 ന് നടക്കും. ഓൺലൈൻ രജിസ്‌ട്രേഷൻ ഈ മാസം അഞ്ചിന് മുമ്പായി പൂർത്തിയാക്കണം. അപേക്ഷകൾ 20 ന് വൈകുന്നേരം അഞ്ചിനുമുമ്പായി എൽ.ബി.എസ്. സെന്ററിൽ ലഭിക്കണം. വൈകി ലഭിക്കുന്ന അപേക്ഷകൾ പരിഗണിക്കുന്നതല്ല. Dt.13.2.2019.
************************
ആരോഗ്യ ജീവിതശൈലീ ദിനചിന്തകൾ വിഷയങ്ങളായി അവതരിപ്പിച്ച് ക്യാമ്പസിലെത്തുന്നവരെ സ്വാഗതം ചെയ്യാൻ വി.എച്ച്.എസ്്.ഇ.കളിലെ എൻ.എസ്.എസ്. വളണ്ടിയർമാർ ഹാബിറ്റ് സ്ലേറ്റ് ഒരുക്കും. സംസ്ഥാന ആരോഗ്യ വകുപ്പിന്റെ അമൃതം ആരോഗ്യം എൻ.റ്റി.സി.പി. തുടങ്ങിയ പദ്ധതികളുടെ ഭാഗമായിട്ടാണ് കേരളത്തിലെ 312 എൻ.എസ്.എസ്. യൂണിറ്റുകൾ വിദ്യാലയ കവാടത്തിനരികെ ഹാബിറ്റ് സ്ലേറ്റ് സജ്ജീകരിക്കുന്നത്. ആരോഗ്യമന്ത്രി കെ.കെ.ശൈലജ ടീച്ചർ കഴിഞ്ഞ ദിവസം പദ്ധതി ഉദ്ഘാടനം ചെയ്തു. Dt.13.2.2019.
************************
ജവഹർ ബാലഭവനിൽ ഏപ്രിൽ-മെയ് മാസങ്ങളിൽ നടത്തുന്ന അവധിക്കാല ക്ലാസ്സുകളിലേക്കുള്ള പ്രവേശനം ആരംഭിച്ചു. സംഗീത, നൃത്ത സംഗീത വാദ്യോപകരണങ്ങൾ, ചിത്രകല, എയ്‌റോമോഡലിംഗ്, കമ്പ്യൂട്ടർ, വ്യക്തിത്വ വികസനം, യോഗ, സ്‌കേറ്റിംഗ് തുടങ്ങി 27 വിഷയങ്ങളാണ് ക്ലാസ്സുകളിൽ ഉൾപ്പെടുത്തിയിട്ടുള്ളത്. കുട്ടികളുടെ വ്യക്തിത്വവികസനം ലക്ഷ്യമാക്കി പ്രഗത്ഭരും പ്രശസ്തരുമായ വ്യക്തികളുമായി ആനുകാലിക പ്രാധാന്യമുള്ള വിഷയങ്ങളിൽ ശിൽപ്പശാലകളും മുഖാമുഖ പരിപാടികളും നടക്കും. വിപുലമായ വാഹന സൗകര്യവും ഏർപ്പെടുത്തിയിട്ടുണ്ട്. കൂടുതൽ വിവരങ്ങൾക്ക് ബാലഭവൻ ഓഫീസുമായി ബന്ധപ്പെടുക ഫോൺ: 2316477 Dt.12.2.2019.
************************
2018 നവംബർ 18 ന് നടന്ന സംസ്ഥാനതല നാഷണൽ ടാലന്റ് സെർച്ച് (എൻ.റ്റി.എസ്) പരീക്ഷാഫലം പ്രഖ്യാപിച്ചു. വിശദവിവരങ്ങൾ www.scert.kerala.gov.in. Dt.12.2.2019.
************************
ഇന്ത്യയിലെ ആദ്യത്തെ സമ്പൂർണ്ണ വിദ്യാഭ്യാസ ചാനലായ കൈറ്റ് വിക്‌ടേഴ്‌സ് ഇനി മുതൽ 24 മണിക്കൂറും സംപ്രേഷണം ചെയ്യും. പരിപാടികളുടെ ലൈവ് സ്ട്രീമിംഗ്, ഷെഡ്യൂൾ, പ്രധാന പരിപാടികൾ, മുൻ എപ്പിസോഡുകൾ തുടങ്ങിയവ കാണാൻ കഴിയുന്ന www.victers.kite.kerala.gov.in എന്ന പുതിയ പോർട്ടലും, ഗൂഗിൾ പ്ലേ സ്റ്റോറിൽ KITE VICTERS ആപ്പും സജ്ജമായി. ഡി.ടി.എച്ച് ശൃംഖലയിൽ കൈറ്റ് വിക്‌ടേഴ്‌സ് ഉൾപ്പെടുത്തുന്നതിനുള്ള നടപടികൾ സ്വീകരിച്ചു വരികയാണെന്ന് വൈസ് ചെയർമാൻ ആന്റ് എക്‌സിക്യൂട്ടീവ് ഡയറക്ടർ കെ. അൻവർ സാദത്ത് അറിയിച്ചു. എസ്.എസ്.എൽ.സി, പ്ലസ്ടു വിദ്യാർത്ഥികൾക്കായി 'ഓർമയുണ്ടാകണം' എന്ന പേരിൽ തത്സമയ പരീക്ഷാ സഹായ പരിപാടി സംപ്രേഷണം തുടങ്ങി. എസ്.എസ്.എൽ.സി ക്കാർക്ക് വൈകിട്ട് ആറിനും പ്ലസ്ടുക്കാർക്ക് രാത്രി 7.30 നും ആണ് ലൈവായി ഒരു മണിക്കൂർ ദൈർഘ്യമുള്ള പരീക്ഷാ സഹായ പരിപാടി. സ്‌കൂളുകളിൽ നിന്നും 'ലിറ്റിൽ കൈറ്റ്‌സ്' അംഗങ്ങൾ തയ്യാറാക്കിയിട്ടുള്ള വാർത്തകളും വിശേഷങ്ങളും ഉൾപ്പെടുത്തി 'ലിറ്റിൽ ന്യൂസ്' എന്ന പുതിയ പരിപാടിയും സംപ്രേഷണം തുടങ്ങുന്നുണ്ട്. Dt.12.2.2019.
************************
മോഡൽ റസിഡൻഷ്യൽ സ്‌കൂൾ വിദ്യാർത്ഥികളുടെ ശാസ്ത്രാവബോധം വളർത്തുന്നതിന് സംസ്ഥാന പട്ടിക വർഗ്ഗ വികസന വകുപ്പിന്റെ ധന സഹായത്തോടെ കേരള ശാസ്ത്ര സാങ്കേതിക പരിസ്ഥിതി കൗൺസിൽ നടത്തുന്ന 'ശാസ്ത്രബോധിനി' പ്രോജക്റ്റിന്റെ അവസാന ഭാഗമായ എം.ആർ.എസ് ശാസ്ത്രമേളയ്ക്ക് തിരുവനന്തപുരം നാലാഞ്ചിറയിലെ മാർ ഗ്രിഗോറിയസ് റിന്യുവൽ സെന്ററിൽ തുടക്കമായി. ശാസ്ത്രമേളയുടെ ഉദ്ഘാടനം പട്ടികവർഗ്ഗ വികസന വകുപ്പ് ഡെപ്യൂട്ടി ഡയറക്ടർ വി. ശശീന്ദ്രൻ നിർവഹിച്ചു. എം.ആർ.എസ് സ്‌കൂളുകളിൽ നിന്നായി 150 കുട്ടികളും 50 അദ്ധ്യാപകരും മേളയിൽ പങ്കെടുക്കുന്നുണ്ട്. മൂന്ന് ദിവസത്തെ മേളയിൽ 58 ശാസ്ത്ര പ്രബന്ധങ്ങൾ കുട്ടികൾ അവതരിപ്പിക്കും. കുട്ടികൾക്കായി ക്വിസ് പ്രോഗ്രാം, മൃഗശാല, മ്യൂസിയം, പ്ലാനറ്റോറിയം സന്ദർശനം എന്നിവയും മേളയുടെ ഭാഗമായി സംഘടിപ്പിച്ചിട്ടുണ്ട്. ചടങ്ങിൽ ഗവ. വിമൺസ് കോളേജ് മുൻ പ്രിൻസിപ്പൽ പ്രൊഫ. സി. പി. അരവിന്ദാക്ഷൻ, ഡോ. എസ്. പ്രദീപ്കുമാർ, ഡോ. അനിൽകുമാർ ഇ. എസ്., ഡോ. ആർ പ്രകാശ്കുമാർ, ഡോ. സി. അനിൽകുമാർ തുടങ്ങിയവർ സംസാരിച്ചു. Dt.11.2.2019.
************************
പ്രവാസി വിദ്യാർത്ഥികൾക്കായുള്ള മലയാളം ഭാഷാപഠന കോഴ്സുകൾ നയിക്കുന്ന റിസോഴ്‌സ് അധ്യാപകർക്കായി വിദഗ്ധ പരിശീലനം സംഘടിപ്പിക്കുന്നു. ഫെബ്രുവരി 9, 10, 11 തീയതികളിൽ തിരുവനന്തപുരം കഴക്കൂട്ടം സമേതി കർഷക ഭവനിൽ നടക്കുന്ന ത്രിദിന ശില്പശാലയിൽ പ്രവാസി മലയാളി സമൂഹങ്ങളിൽ ഭാഷാപഠന പ്രവർത്തനങ്ങൾ നടത്തുന്നവർക്ക് മലയാളം മിഷന്റെ പാഠ്യപദ്ധതി പരിചയം, വിവിധ കോഴ്സുകൾ കൈകാര്യം ചെയ്യുന്നതിനുള്ള പരിശീലനം എന്നിവ നൽകും. മലയാളം മിഷൻ കോഴ്സുകളായ ആമ്പൽ, നീലക്കുറിഞ്ഞി എന്നിവയിലേക്കുള്ള പരിശീലന പരിപാടിയാണ് ശില്പശാലയിൽ നടക്കുക. പത്ത് ഇന്ത്യൻ സംസ്ഥാനങ്ങളിൽ നിന്ന് 30 അധ്യാപകരാണ്പങ്കെടുക്കുന്നത്. ഭാഷാ - അധ്യയന രംഗത്തെ വിദഗ്ദ്ധർ ശില്പശാലയിലെ വിവിധ സെഷനുകൾക്ക് നേതൃത്വം നൽകും. ഇന്ത്യക്കകത്തും പുറത്തുമായി ഇരുപത്തി അയ്യായിരത്തിലേറെ വിദ്യാർത്ഥികൾ മലയാളം മിഷന്റെ കോഴ്സുകൾ വഴി മലയാള ഭാഷാ പഠനം നടത്തുന്നുണ്ട്. Dt.8.2.2019.
************************
പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി കേരളാ ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷൻ (കൈറ്റ്) സംസ്ഥാനത്തെ വിദ്യാലയങ്ങളിൽ രൂപീകരിച്ചിട്ടുള്ള ലിറ്റിൽ കൈറ്റ്‌സ് യൂണിറ്റുകളിൽ നിന്ന് 2018-19 വർഷത്തെ മികച്ച പ്രവർത്തനത്തിനുള്ള അവാർഡിനു അപേക്ഷ ക്ഷണിച്ചു. സംസ്ഥാന തലത്തിൽ ഒന്നും രണ്ടും മൂന്നും സ്ഥാനത്തെത്തുന്ന സ്‌കൂളുകൾക്ക് യഥാക്രമം 5,00,000, 3,00,000, 1,00,000 രൂപയും പ്രശസ്തി പത്രവും ജില്ലാ തലത്തിൽ ഒന്നും രണ്ടും മൂന്നും സ്ഥാനത്തെത്തുന്ന സ്‌കൂളുകൾക്ക് യഥാക്രമം 50,000, 25,000, 10,000 രൂപയും പ്രശസ്തി പത്രവും അവാർഡായി നൽകും. ലിറ്റിൽ കൈറ്റ്‌സ് യൂണിറ്റുകളുടെ ദൈനംദിന പ്രവർത്തനങ്ങൾ, തനത് പ്രവർത്തനങ്ങളും സാമൂഹ്യ ഇടപെടലും, യൂണിറ്റ്തല പ്രവർത്തനങ്ങളുടെ ഡോക്യുമെന്റേഷൻ, സ്‌കൂൾ വിക്കി അപ്‌ഡേഷൻ, ക്യാമ്പുകളിലെ പങ്കാളിത്തം, സ്‌കൂൾതല ഡിജിറ്റൽ മാഗസിൻ തയ്യാറാക്കൽ, വിക്ടേഴ്‌സ് ചാനൽ വ്യാപനം, ചാനലിലേക്ക് ആവശ്യമായ ന്യൂസ് തയ്യാറാക്കൽ, അംഗങ്ങളുടെ വ്യക്തിഗത പ്രകടനങ്ങൾ, ഹൈടെക് ക്ലാസ്മുറികളുടെ പരിപാലനം, പൊതുവിദ്യാഭ്യാസ സംരക്ഷണ യജ്ഞത്തിന്റേതുൾപ്പെടെയുള്ള സ്‌കൂളിലെ മറ്റ് പ്രവർത്തനങ്ങളിൽ യൂണിറ്റിന്റെ ഇടപെടൽ എന്നീ മേഖലകൾ പരിഗണിച്ചായിരിക്കും മികച്ച യൂണിറ്റിനെ കൺെത്തുക. ഹാർഡ്‌വെയർ, അനിമേഷൻ, ഇലക്ട്രോണിക്‌സ്, മലയാളം കമ്പ്യൂട്ടിങ്, സൈബർ സുരക്ഷാ മേഖലകൾക്കുപുറമെ മൊബൈൽ ആപ്പ് നിർമാണം, പ്രോഗ്രാമിങ്, റോബോട്ടിക്‌സ്, ഇ-കൊമേഴ്‌സ്, ഇ-ഗവേണൻസ്, വീഡിയോ ഡോക്യുമെന്റേഷൻ, വെബ് ടിവി, ഹൈടെക് ക്ലാസ്മുറികളുടെ പരിപാലനം തുടങ്ങിയ നിരവധി മേഖലകൾ അടങ്ങുന്നതാണ് ലിറ്റിൽ കെറ്റ്‌സ് ക്ലബ്ബുകളുടെ പ്രവർത്തനം. ലിറ്റിൽ കൈറ്റ്‌സ് യൂണിറ്റുള്ള എല്ലാ വിദ്യാലയങ്ങൾക്കും ഫെബ്രുവരി 20നകം അവാർഡിന് അപേക്ഷിക്കാവുന്നതാണെന്ന് കൈറ്റ് വൈസ് ചെയർമാൻ കെ. അൻവർ സാദത്ത് അറിയിച്ചു. www.kite.kerala.gov.in വെബ്‌സൈറ്റിൽ പ്രസിദ്ധീകരിച്ചിട്ടുള്ള ഫോർമാറ്റിൽ തയ്യാറാക്കിയ അപേക്ഷയും അനുബന്ധ രേഖകളും അതത് ജില്ലാ കോഓർഡിനേറ്റർമാർക്കാണ് സമർപ്പിക്കേണ്ടത്. Dt.7.2.2019.
************************
സംസ്ഥാനത്തെ ഒന്നു മുതൽ പന്ത്രണ്ടുവരെയുള്ള സർക്കാർ, എയിഡഡ്, അൺ-എയിഡഡ് സ്‌കൂളുകളെക്കുറിച്ചുള്ള വിശദാംശങ്ങൾ പൊതുജനങ്ങൾക്കും ദൃശ്യമാവുന്ന വിധത്തിൽ 'സമേതം' ഓൺലൈൻ സ്‌കൂൾ ഡേറ്റാ ബാങ്ക് തയ്യാറായി. കേരള ഇൻഫ്രാസ്ട്രക്ചർ ആൻഡ് ടെക്‌നോളജി ഫോർ എഡ്യൂക്കേഷൻ (കൈറ്റ്) തയ്യാറാക്കിയ പോർട്ടലിൽ സ്‌കൂളുകളെക്കുറിച്ചുള്ള അടിസ്ഥാന വിവരങ്ങൾ, ഭൗതിക സൗകര്യങ്ങൾ, അധ്യാപകരുടേയും ജീവനക്കാരുടേയും വിശദാംശങ്ങൾ, കുട്ടികളുടെ എണ്ണം, സ്‌കൂൾ വിക്കിയിലുള്ള താൾ, ലൊക്കേഷൻ തുടങ്ങിയ വിശദാംശങ്ങൾ ഉൾപ്പെടുത്തിയിട്ടുണ്ട്. www.sametham.kite.kerala.gov.in എന്ന വിലാസത്തിൽ സ്‌കൂളുകൾക്കം പൊതുജനങ്ങൾക്കും ഇന്ന് മുതൽ പോർട്ടലിലെ വിവരങ്ങൾ പരിശോധിക്കാമെന്ന് കൈറ്റ് വൈസ് ചെയർമാൻ കെ.അൻവർ സാദത്ത് അറിയിച്ചു. ഫീൽഡിൽ നിന്നുള്ള നിർദേശങ്ങൾ കൂടി ലഭിച്ച് ഫെബ്രുവരി 20 ഓടെ പോർട്ടൽ പൂർണമായും ഔദ്യോഗികമാവും. വിവിധ വിഭാഗത്തിലുള്ള സ്‌കൂളുകളെ (പ്രൈമറി, അപ്പർ പ്രൈമറി, ഹൈസ്‌ക്കൂൾ, ഹയർ സെക്കന്ററി, വൊക്കേഷണൽ ഹയർ സെക്കന്ററി) ഒരു ക്യാമ്പസ് എന്ന രൂപത്തിലാണ് 'സമേത'ത്തിൽ നൽകിയിട്ടുള്ളത്. അടിസ്ഥാന വിവരങ്ങൾ, ഭൗതിക സൗകര്യങ്ങൾ എന്നീ വിഭാഗങ്ങളിലായി സ്‌കൂളിനെക്കുറിച്ച് യഥാക്രമം 23 ഉം 51 ഉം വിവരങ്ങൾ ഉണ്ട്. സർക്കാർ-എയിഡഡ് സ്‌കൂളുകളിലെ വിവിധ വിഭാഗങ്ങളിലെ എല്ലാ അധ്യാപകരുടേയും ജീവനക്കാരുടേയും തസ്തികകളും പേരും പ്രത്യേകം നൽകിയിട്ടുണ്ട്. ഓരോ ക്ലാസിലെയും വിവിധ മീഡിയം തിരിച്ച് കുട്ടികളുടെ എണ്ണം നൽകിയിട്ടുണ്ട്. സ്‌കൂളിന്റെ ചരിത്രം, വിവിധ ക്ലബ്ബുകൾ, പ്രവർത്തനങ്ങൾ പ്രശസ്തരായ പൂർവ വിദ്യാർത്ഥികൾ, ദിനാചരണങ്ങൾ തുടങ്ങിയവ ചിത്രസഹിതം വിവരിക്കുന്ന സ്‌കൂളിന്റെ 'സ്‌കൂൾ വിക്കി' പേജിലേക്കും സമേതത്തിൽ നിന്നും നേരിട്ട് പ്രവേശിക്കാം. 'സമേതം' ഹോം പേജിൽത്തന്നെ കേരളത്തിലെ സർക്കാർ, എയ്ഡഡ്, അൺ-എയ്ഡഡ് മേഖലകളിലെ 5 വിഭാഗം സ്‌കൂളുകളുടെയും തരംതിരിച്ചിട്ടുള്ള എണ്ണം, കുട്ടികളുടെ എണ്ണം സർക്കാർ-എയ്ഡഡ് മേഖലയിലെ അധ്യാപകരുടെയും അനധ്യാപകരുടെയും എണ്ണം എന്നിങ്ങനെ തരംതിരിച്ച് നൽകിയിട്ടുണ്ട്. ഉപയോക്താക്കൾക്ക് സഹായകമാകുന്നവിധം യൂസർഗൈഡും, വീഡിയോ ട്യൂട്ടോറിയലും ഈ പേജിൽത്തന്നെയുണ്ട്. പ്രത്യേകം ലോഗിൻ ചെയ്യാതെ തന്നെ വിഭാഗങ്ങൾ തിരിച്ചും ജില്ല തിരിച്ചും സ്‌കൂളുകളുടെ പേജിലേക്കെത്താം. ഇനി അല്ലാതെ ഒരു സ്‌കൂളിന്റെ പേരോ, സ്‌കൂൾ കോഡോ, സ്ഥലത്തിന്റെ പേരോ 'സേർച്ച്' ഭാഗത്ത് നൽകിയും സ്‌കൂളുകളിലെത്താം. ജില്ല, പാർലമെന്റ്-അസംബ്ലി മണ്ഡലങ്ങൾ, ത്രിതല പഞ്ചായത്തുകൾ, വിദ്യാഭ്യാസ ജില്ല, ഉപജില്ല എന്നിങ്ങനെ തരംതിരിച്ച് ആ പരിധിയിൽ വരുന്ന സ്‌കൂളുകളെ മുഴുവനായും അഡ്വാൻസ്ഡ് സേർച്ചിലൂടെ കണ്ടെത്താം. സ്‌കൂളുകൾക്കും രക്ഷകർക്കാക്കൾക്കും മാത്രമല്ല എല്ലാ വിഭാഗം ജനപ്രതിനിധികൾക്കും വിദ്യാഭ്യാസ വകുപ്പുദ്യോഗസ്ഥർക്കും, ഗവേഷകർക്കുമെല്ലാം ഒരുപോലെ പ്രയോജനപ്പെടുന്ന വിധമാണ് സുരക്ഷയും സ്വകാര്യതയും ഉറപ്പുവരുത്തി 'സമേത'ത്തിൽ വിവരങ്ങൾ നൽകിയിട്ടുള്ളത്. ഡാറ്റ ലഭിക്കുന്നതിനായി വിവിധ ഓഫീസുകൾ കയറിയിറങ്ങേണ്ട സാഹചര്യം ഇതുവഴി ഇല്ലാതാകും എന്ന് മാത്രമല്ല വകുപ്പിന്റെ പ്രവർത്തനങ്ങൾ കൂടുതൽ സുതാര്യമാക്കാനും 'സമേതം' വഴി സാധിക്കും. കേരളത്തിൽ പൊതുഡൊമൈനിൽ ലഭ്യമാകുന്ന ഏറ്റവും ബൃഹത്തായ ഡാറ്റാ ബാങ്കാണ് 'സമേതം' 'സമേതം' പൊതുവിദ്യാഭ്യാസ വകുപ്പിന്റെ ഔദ്യോഗിക ആവശ്യങ്ങൾക്ക് ഉപയോഗിക്കാൻ അനുമതി നൽകി സർക്കാർ ഉത്തരവിറക്കി. 'സമേത'ത്തിനായി സ്‌കൂളുകൾ പ്രത്യേക വിവരം നൽകേണ്ടതില്ല. ഹൈസ്‌കൂൾ വരെയുള്ള വിവരങ്ങൾ 'സമ്പൂർണ' സോഫ്റ്റ്‌വെയറിൽ നിന്നും, ഹയർ സെക്കന്ററി, വൊക്കേഷണൽ ഹയർ സെക്കന്ററി വിഭാഗങ്ങളുടെ വിവരങ്ങൾ അവരുടെ അഡ്മിഷൻ പോർട്ടലിൽ നിന്നുമാണ് സമേതത്തിൽ എടുക്കുന്നത്. അധ്യാപകരുടേയും ജീവനക്കാരുടേയും വിവരങ്ങൾ പൂർണമായും ധനവകുപ്പിന്റെ 'സ്പാർക്ക്' പോർട്ടലിൽ നിന്നാണ്. അതിനാൽ 'സമേതം' പരിശോധിച്ച് ആവശ്യമായ തിരുത്തലുകൾ സമ്പൂർണ, സ്പാർക്, അഡ്മിഷൻ പോർട്ടൽ എന്നിവിടങ്ങളിൽ സ്‌കൂളുകൾ നടത്തണമെന്നും ഇത് വകുപ്പുദ്യോഗസ്ഥർ പ്രത്യേകം പരിശോധിച്ച് ഉറപ്പുവരുത്തണമെന്നും സർക്കാർ ഉത്തരവ് നിഷ്‌ക്കർഷിക്കുന്നുണ്ട്. Dt.3.2.2019.
************************
കേരള നിയമസഭയുടെ വജ്രജൂബിലി ആഘോഷത്തോടനുബന്ധിച്ചുള്ള ഫെസ്റ്റിവൽ ഓൺ ഡെമോക്രസിയുടെ ഭാഗമായി ഫെബ്രുവരി 23 മുതൽ 25 വരെ നടത്തുന്ന ദേശീയ വിദ്യാർത്ഥി പാർലമെന്റിൽ പങ്കെടുക്കുന്ന വിദ്യാർത്ഥികൾക്കുള്ള രജിസ്‌ട്രേഷന്റെ ഉത്ഘാടനം ഫെബ്രുവരി നാലിന് ഉച്ചയ്ക്ക് 12 മണിയ്ക്ക് നിയമസഭ മീഡിയാ റൂമിൽ സ്പീക്കർ പി.ശ്രീരാമകൃഷ്ണൻ നിർവഹിക്കും. Dt.2.2.2019.
************************
ഫെബ്രുവരി നാലിന് നടത്താനിരുന്ന കെ.ടെറ്റ് കാറ്റഗറി 3 പരീക്ഷ അഞ്ചിന് ഉച്ചയ്ക്ക് 2.30 മുതൽ 5 വരെ നടത്തും. നേരത്തെ നൽകിയ ഹാൾടിക്കറ്റ് തന്നെ ഉപയോഗിക്കാം. മൂവാറ്റുപുഴ ഗവ. മോഡൽ എച്ച്.എസ്.എസ് ൽ നടത്താനിരുന്ന കെ.ടെറ്റ് കാറ്റഗറി 3 പരീക്ഷ മൂവാറ്റുപുഴ സെന്റ് അഗസ്റ്റ്യൻസ് ജി.എച്ച്.എസ്-ലും മാവേലിക്കര ജി.വി.എച്ച്.എസ് ബോയ്‌സിൽ നടത്താനിരുന്ന പരീക്ഷ മാവേലിക്കര ബിഷപ്പ് ഹോഡ്ജ്‌സ് ഹയർസെക്കൻഡറി സ്‌കൂളിലും നടത്തുമെന്ന് പരീക്ഷാസെക്രട്ടറി അറിയിച്ചു. Dt.2.2.2019.
************************
തിരുവനന്തപുരം വിദ്യാഭ്യാസ ഉപഡയറക്ടറുടെ അധികാര പരിധിയിലുള്ള എല്ലാ സ്‌കൂളുകൾക്കും ഇന്ന്(ഫെബ്രുവരി 2) പ്രവർത്തിദിനമായി നിശ്ചയിച്ചിരുന്നെങ്കിലും കേരള ഹിന്ദി പ്രചാരസഭയുടെ സുഗമഹിന്ദി പരീക്ഷയും സബ്ജില്ലാതല STEPS പരീക്ഷയും നടക്കുന്നതിനാൽ സാധാരണ പ്രവർത്തിദിനമായിരിക്കില്ലെന്ന് വിദ്യാഭ്യാസ ഉപഡയറക്ടർ അറിയിച്ചു. Dt.1.2.2019.
************************
2018 ആഗസ്റ്റിൽ നടന്ന ഒന്നാം വർഷ ഹയർ സെക്കൻഡറി ഇംപ്രൂവ്‌മെന്റ് പരീക്ഷയുടെ പുനഃമൂല്യനിർണ്ണയം, സൂക്ഷ്മപരിശോധന എന്നിവയുടെ ഫലം പ്രസിദ്ധീകരിച്ചു. www.dhsekerala.gov.in ൽ ലഭ്യമാണ്. Dt.1.2.2019.
************************
ഹയർ സെക്കൻഡറി, നോൺ വൊക്കേഷണൽ ഹയർ സെക്കൻഡറി അധ്യാപക നിയമനത്തിനുള്ള യോഗ്യതാ പരീക്ഷയായ സ്റ്റേറ്റ് എലിജിബിലിറ്റി ടെസ്റ്റിന് (സെറ്റ്) ഫെബ്രുവരി ഒന്ന് മുതൽ 15 വരെ ഓൺലൈനായി രജിസ്റ്റർ ചെയ്യാം. ഓൺലൈനായി രജിസ്റ്റർ ചെയ്ത ശേഷം പ്രിന്റ്ഔട്ട് തിരുവനന്തപുരം എൽ.ബി.എസ്. സെന്ററിൽ തപാലിലോ നേരിട്ടോ സമർപ്പിക്കണം. അപേക്ഷയോടൊപ്പം വിദ്യാഭ്യാസ യോഗ്യത തെളിയിക്കുന്ന സർട്ടിഫിക്കറ്റുകളുടെ കോപ്പി ഹാജരാക്കേണ്ടതില്ല. വിശദവിവരങ്ങൾ www.lbscentre.kerala.gov.in ൽ ലഭിക്കും. Dt.31.1.2019
************************
2018 നവംബറിൽ നടത്തിയ രണ്ടാം വർഷ ഹയർസെക്കന്ററി തുല്യതാ പരീക്ഷാഫലം ഇന്ന് (ഫെബ്രുവരി ഒന്ന്) ഉച്ചയ്ക്ക് മൂന്നിന് ശേഷം പ്രസിദ്ധീകരിക്കും. www.results.kerala.nic.in, www.dhsekerala.gov.in ൽ ലഭ്യമാകും. ഉത്തരക്കടലാസു കളുടെ പുനർമൂല്യനിർണ്ണയം നടത്തുന്നതിനും സൂക്ഷ്മപരിശോധന നടത്തുന്നതിനും, ഫോട്ടോകോപ്പിക്കും നിശ്ചിത ഫോറങ്ങളിലുള്ള അപേക്ഷകൾ ഫീസടച്ച് പരീക്ഷയ്ക്ക് രജിസ്റ്റർ ചെയ്ത സ്‌കൂളിലെ പ്രിൻസിപ്പാളിന് 20 നകം സമർപ്പിക്കണം. Dt.31.1.2019
************************
സഹകരണ വകുപ്പിന്റെ കൃതി 2018 പുസ്തകമേളയുടെ ഭാഗമായി നടപ്പാക്കിയ ഒരു കുട്ടിക്ക് ഒരു പുസ്തകം പദ്ധതി ഈ വർഷം വിപുലമായി നടപ്പാക്കും. ഈ വർഷം 1.25 കോടി രൂപ മതിക്കുന്ന കൂപ്പണുകൾ നൽകി 80,000 ത്തിലേറെ കുട്ടികളെ കൃതി പുസ്തകമേളയിലെത്തിക്കാനാണ് ലക്ഷ്യമിടുന്നതെന്ന് കൃതി ജനറൽ കൺവീനർ എസ്. രമേശൻ അറിയിച്ചു. www.krithibookfest.com ൽ വിദ്യാലയങ്ങൾക്ക് സന്ദർശിക്കുന്നതിനുള്ള സ്ലോട്ടുകളുടെ തിയതിയും സമയവും തെരഞ്ഞെടുക്കാൻ സൗകര്യമൊരുക്കിയിട്ടുണ്ട്. കുട്ടികൾക്കു കൂടുതൽ പുസ്തകങ്ങൾ സമ്മാനമായി നൽകുന്ന ട്രഷർ ഹണ്ട് ഗെയിമുകൾ സംഘടിപ്പിക്കും. കുട്ടികൾക്ക് കലാപരിപാടികൾ അവതരിപ്പിക്കുന്നതിനുള്ള വേദിയും ഒരുക്കും. നവകേരള നിർമാണവുമായി ബന്ധപ്പെട്ട ആശയങ്ങൾ ചർച്ച ചെയ്യുന്നതിന് സംസ്ഥാന പൊതുവിദ്യാഭ്യാസ വകുപ്പുമായി സഹകരിച്ച് കുട്ടികളുടെ പാർലമെന്റ് നടത്തും. Dt.31.1.2019
************************
സർക്കാർ ഏറ്റെടുത്ത തദ്ദേശസ്വയംഭരണ സ്ഥാപനങ്ങളുടെ അധീനതയിൽ നിലനിന്നിരുന്ന സ്‌കൂളുകളിൽ കോമൺപൂളിൽ ഉൾപ്പെട്ടിട്ടുള്ള പൊതു വിദ്യാഭ്യാസ വകുപ്പിലെ ഹൈസ്‌കൂൾ, പ്രൈമറി വിഭാഗം അദ്ധ്യാപകർ/ പ്രൈമറി വിഭാഗം പ്രധാനാദ്ധ്യാപകർ എന്നിവരിൽ നിന്നും 2019-20 വർഷത്തെ ജില്ലാതല സ്ഥല മാറ്റത്തിനുള്ള അപേക്ഷ ക്ഷണിച്ചു. അപേക്ഷകൾ ബന്ധപ്പെട്ട വിദ്യാഭ്യാസ ഉപഡയറക്ടർ ഓഫീസുകളിൽ ഫെബ്രുവരി 15 ന് വൈകിട്ട് അഞ്ചിനു മുമ്പായി എത്തിക്കണം. വിശദാംശങ്ങൾക്ക് www.transferandpostings.in സന്ദർശിക്കുക Dt.28.1.2019.
************************
2018-നവംബർ മാസം നടത്തിയ പത്താംതരം തുല്യതാ പരീക്ഷാ ഫലം പ്രസിദ്ധീകരിച്ചു. പരീക്ഷാഫലം www.keralapareekshabhavan.in എന്ന വെബ്‌സൈറ്റിൽ ലഭ്യമാണ്. ഉത്തരക്കടലാസ് പുനർമൂല്യനിർണ്ണയത്തിന് അപേക്ഷിക്കുന്നവർ അപേക്ഷയും, പേപ്പർ ഒന്നിന് 400 രൂപ നിരക്കിൽ അപേക്ഷ ഫീസും ഫെബ്രുവരി നാലിന് മുമ്പ് അതാത് പരീക്ഷ കേന്ദ്രത്തിലെ ഹെഡ്മാസ്റ്റർക്ക് സമർപ്പിക്കണം.Dt.22.1.2019.
************************
ശബരമിലയിൽ പ്രവേശനത്തിന് ശ്രമിച്ച അദ്ധ്യാപികയുടെ മകളുടെ പഠനം തടസ്സപ്പെടുത്തിയെന്ന പരാതിയിൽ സംസ്ഥാന ബാലാവകാശ സംരക്ഷണ കമ്മീഷൻ കേസെടുത്തു. ക്ലാസ് ടീച്ചറുടെ പ്രേരണയാൽ ജനക്കൂട്ടം മകളുടെ പഠനം തടസ്സപ്പെടുത്തുകയും തങ്ങളെ അപമാനിക്കുകയും ചെയ്‌തെന്നായിരുന്നു പരാതി.Dt.22.1.2019.
************************
പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി കേരളാ ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷൻ (കൈറ്റ്) ഹൈസ്‌കൂളുകളിൽ രൂപീകരിച്ചിട്ടുള്ള ലിറ്റിൽ കൈറ്റ്‌സ് യൂണിറ്റുകളിലേക്ക് 2019-21 വർഷത്തേക്കുള്ള അംഗങ്ങളുടെ തെരഞ്ഞെടുപ്പ് ഇന്ന് (ജനുവരി 23) നടക്കും. നിലവിൽ എട്ടാംക്ലാസിൽ പഠിക്കുന്ന (അടുത്തവർഷം ഒമ്പതാം ക്ലാസിൽ) 20 മുതൽ 40 വരെ കുട്ടികൾക്കാണ് ഒരു സ്‌കൂളിലെ ക്ലബ്ബിൽ അംഗത്വം ലഭിക്കുക. മുൻ വർഷം അംഗീകാരം നേടിയ 1898 യൂണിറ്റുകളിലും ഈ വർഷം താൽക്കാലികമായി അംഗീകാരം നൽകിയിട്ടുള്ള 149 വിദ്യാലയങ്ങളിലേയും അപേക്ഷിച്ചിട്ടുള്ള മുഴുവൻ വിദ്യാർഥികളെയും ഉൾപ്പെടുത്തി രാവിലെ 10.30 ന്് അഭിരുചി പരീക്ഷ നടത്തും. എട്ടാം തരം ഐടി പാഠപുസ്തകത്തേയും ഐ.ടി മേഖലയിലെ പൊതുവിജ്ഞാനത്തിന്റേയും അടിസ്ഥാനത്തിലാണ് പരീക്ഷ. സ്‌കൂളുകളിലെ ഹാർഡ്‌വെയർ പരിപാലനം, രക്ഷിതാക്കൾക്കുള്ള കമ്പ്യൂട്ടർ സാക്ഷരത, ഏകജാലകം ഹെൽപ് ഡെസ്‌ക്, ഭിന്നശേഷിക്കാർക്കുള്ള പ്രത്യേക ഐ.ടി പരിശീലനം, പൊതുജനങ്ങൾക്ക് സ്വതന്ത്ര സോഫ്റ്റ്‌വെയറുകൾ ഇൻസ്റ്റാൾ ചെയ്ത് നൽകൽ, ഡിജിറ്റൽ മാപ്പിംഗ്, സൈബർ സുരക്ഷാ പരിശോധനയും ബോധവൽക്കരണവും, സ്‌കൂൾ വിക്കിയിലെ വിവരങ്ങൾ പുതുക്കൽ, ഐടി മേളകളുടേയും ക്യാമ്പുകളുടേയും സംഘാടനം, വിക്ടേഴ്‌സിലേക്ക് ആവശ്യമായ വാർത്തകളുടേയും ഡോക്യുമെന്ററികളുടേയും നിർമ്മാണം, സ്‌കൂൾതല വെബ് ടി.വികൾ, മൊബൈൽ ആപ്പുകളുടെ നിർമ്മാണം എന്നിങ്ങനെ വൈവിധ്യമാർന്ന പ്രവർത്തനങ്ങളാണ് 'ലിറ്റിൽ കൈറ്റ്‌സ്' ക്ലബ്ബുകൾ സംഘടിപ്പിക്കുന്നത്. പരിശീലനങ്ങൾക്ക് പുറമെ മറ്റു വിദഗ്ദ്ധരുടെ ക്ലാസുകൾ, ക്യാമ്പുകൾ, ഇൻഡസ്ട്രി വിസിറ്റുകൾ തുടങ്ങിയവയും ലിറ്റിൽ കൈറ്റ്‌സിന്റെ ഭാഗമായും നടത്തും. വിവിധ മേഖലകളിലെ വിദഗ്ദ്ധരെയും സാങ്കേതിക പ്രവർത്തകരേയും 'ലിറ്റിൽ കൈറ്റ്'സുമായി ബന്ധിപ്പിക്കുന്നുണ്ട്.സംസ്ഥാനത്തെ അംഗീകാരം നേടിയ 2047 യൂണിറ്റുകളുടെയും പട്ടിക കൈറ്റ് വെബ്‌സൈറ്റിൽ (www.kite.kerala.gov.in) പ്രസിദ്ധീകരിച്ചിട്ടുണ്ട്.Dt.22.1.2019.
************************
സംസ്ഥാന ആർക്കൈവ്‌സ് വകുപ്പിന്റെ പൈതൃക പഠന പദ്ധതിയിൽ സ്‌കൂളുകൾക്ക് ഗ്രാന്റിന് അപേക്ഷിക്കാം. സംസ്ഥാനത്തെ സ്‌കൂളുകളിൽ പൈതൃക പഠന പദ്ധതിയുടെ ഭാഗമായി പ്രാദേശിക ചരിത്രരചന, ഡോക്യുമെന്ററി നിർമ്മാണം, പഠന യാത്രകൾ, ഹെരിറ്റേജ് സർവ്വെ ഉൾപ്പെടെയുള്ള പ്രവർത്തനങ്ങൾ ഏറ്റെടുത്ത് നടപ്പിലാക്കുന്നതിനായി ജില്ലയിലെ തെരഞ്ഞെടുക്കപ്പെടുന്ന ഒരു സ്‌കൂളിന് 20,000 രൂപ വീതം ഗ്രാന്റായി നൽകും. അപേക്ഷകരിൽ നിന്നും ലഭിക്കുന്ന ഏറ്റവും മികച്ച പദ്ധതിക്കായിരിക്കും ഗ്രാന്റ് നൽകുക. അപേക്ഷകൾ ഫെബ്രുവരി അഞ്ചിന് മുമ്പ് ഡയറക്ടർ, ആർക്കൈവ്‌സ് വകുപ്പ്, നളന്ദ, കവടിയാർ പി.ഒ, പിൻ - 695003 എന്ന വിലാസത്തിലോ keralaarchives@gmail.com എന്ന ഇ-മെയിലിലോ അയക്കണം. ഫോൺ: 0471-2311547, 9497269556. Dt.21.1.2019.
************************
കെ.ടെറ്റ് പരീക്ഷയുടെ പുതുക്കിയ സമയക്രമം പ്രസിദ്ധീകരിച്ചു. കാറ്റഗറി ഒന്ന് ഫെബ്രുവരി രണ്ടിന് രാവിലെ 10 മുതൽ 12.30 വരെയും കാറ്റഗറി രണ്ട് അതേ ദിവസം ഉച്ചയ്ക്ക് രണ്ടു മുതൽ 4.30 വരെയും നടക്കും. കാറ്റഗറി മൂന്ന് നാലാം തിയതി 2.30 മുതൽ അഞ്ച് വരെയും കാറ്റഗറി നാല് ആറാം തിയതി 2.30 മുതൽ 5 വരെയും നടക്കും. ഹാൾ ടിക്കറ്റ് ഈ മാസം 22 മുതൽ പരീക്ഷാഭവന്റെ വെബ്‌സൈറ്റായ ktet.kerala.gov.inൽ ലഭ്യമാണ്. ആപ്ലിക്കേഷൻ ഐ.ഡിയും ആപ്ലിക്കേഷൻ നമ്പരും നഷ്ടമായവർക്കും വെബ്‌സൈറ്റിൽ നിന്ന് അവ ലഭ്യമാകും. Dt.21.1.2019.
************************
2018 ജനുവരി 22 ന് മുഖ്യമന്ത്രി പിണറായി വിജയൻ ഉദ്ഘാടനം ചെയ്ത 8 മുതൽ 12 വരെ ക്ലാസുകളിൽ സാങ്കേതികവിദ്യാ സഹായക വിദ്യാഭ്യാസം സാധ്യമാക്കുന്ന ഹൈടെക് സ്‌കൂൾ പദ്ധതി ഒരു വർഷം പൂർത്തിയാക്കി. സർക്കാർ-എയ്ഡഡ് മേഖലയിലെ ഹൈസ്‌കൂൾ, ഹയർ സെക്കന്ററി, വൊക്കേഷണൽ ഹയർ സെക്കന്ററി തലങ്ങളിലുള്ള 4752 സ്‌കൂളുകളിലാണ് കേരള ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷന്റെ (കൈറ്റ്) നേതൃത്വത്തിൽ പദ്ധതി നടപ്പാക്കുന്നത്. പദ്ധതിയുടെ ഭാഗമായി 58430 ലാപ്‌ടോപ്പുകൾ, 42227 മൾട്ടിമീഡിയാ പ്രൊജക്ടറുകൾ, 40594 മൗണ്ടിംഗ് കിറ്റുകൾ, 40621 എച്ച്.ഡി.എം.ഐ. കേബിൾ, 40614 ഫേസ് പ്ലേറ്റ്, 21847 സ്‌ക്രീനുകൾ, 41544 യു.എസ്.ബി. സ്പീക്കറുകൾ, 4688 ഡി.എസ്.എൽ.ആർ. ക്യാമറകൾ, 4522 നാല്പത്തിരണ്ടിഞ്ച് എൽ.ഇ.ഡി. ടെലിവിഷനുകൾ, 4720 ഫുൾ എച്ച്.ഡി. വെബ് ക്യാമുകൾ എന്നിവയുടെ വിന്യാസം പൂർത്തിയായതായി കൈറ്റ് വൈസ് ചെയർമാൻ & എക്‌സിക്യൂട്ടീവ് ഡയറക്ടർ കെ.അൻവർ സാദത്ത് അറിയിച്ചു. ഐ.ടി. ലാബുകളോടൊപ്പം ലാപ്‌ടോപ്പ്, പ്രൊജക്ടർ, സ്പീക്കർ, ഇന്റർനെറ്റ് തുടങ്ങിയവ പ്രയോജനപ്പെടുത്തിക്കൊണ്ടുള്ള ഹൈടെക് ക്ലാസ് മുറികളും സജ്ജമാക്കി 'സമഗ്ര' വിഭവ പോർട്ടൽ ഉപയോഗിച്ചാണ് ഹൈടെക് പഠനം സ്‌കൂളുകളിൽ നടത്തുന്നത്. 'സമഗ്ര'യിൽ 5.5 ലക്ഷം സമഗ്രാസൂത്രണ രേഖകളും 8.89 ലക്ഷം സൂക്ഷ്മാസൂത്രണ രേഖകളും 24388 ഡിജിറ്റൽ റിസോഴ്‌സുകളും ലഭ്യമാണ്. 1898 സ്‌കൂളുകളിലായി 58247 കുട്ടികളുള്ള 'ലിറ്റിൽ കൈറ്റ്‌സ്' ഐ.ടി. ക്ലബ്ബുകളും പ്രവർത്തിക്കുന്നുണ്ട്. വയനാട് ജില്ലയിലെ തോൽപ്പെട്ടി ഗവൺമെന്റ് ഹൈസ്‌ക്കൂൾ ഒഴികെയുള്ള 4751 സ്‌കൂളുകളിലും ബ്രോഡ്ബാൻഡ് ഇന്റർനെറ്റ് ഏർപ്പെടുത്തി. ക്ലാസ് മുറികളുടെ നെറ്റ്‌വർക്കിംഗ് മെയ് മാസത്തോടെ പൂർത്തിയാകും. ഇതോടെ ലാബിലെ മിനി സെർവറുകളും പ്രവർത്തനക്ഷമമാവും. പദ്ധതിയ്ക്കായി കിഫ്ബി വഴി ഇതുവരെ 318 കോടിരൂപ ചെലവഴിച്ചു. ഹൈടെക് സ്‌കൂൾ പദ്ധതിയുടെ ഒന്നാംഘട്ട വിലയിരുത്തൽ സർവേ നവംബർ മാസം നടത്തിയതിൽ 92 ശതമാനം അധ്യാപകർ ക്ലാസ് മുറികളിൽ ഹൈടെക് സംവിധാനം ഉപയോഗിച്ച് പഠിപ്പിക്കുന്നുണ്ടെന്ന് കണ്ടെത്തിയിരുന്നു. ഇതനുസരിച്ച് തുടർ വിലയിരുത്തലുകളും മെച്ചപ്പെടുത്തലുകളും നടത്താൻ പൊതുവിദ്യാഭ്യാസ വകുപ്പ് പദ്ധതികളാവിഷ്‌ക്കരിച്ചതായി സെക്രട്ടറി എ.ഷാജഹാൻ അറിയിച്ചു. പ്രൈമറിതല ഹൈടെക് ലാബ് പദ്ധതിയ്ക്കും കിഫ്ബി അംഗീകാരം ലഭിച്ചതോടെ അടുത്ത അദ്ധ്യയന വർഷം തുടങ്ങുന്നതിനു മുൻപ് വിദ്യാഭ്യാസ രംഗത്തെ ആദ്യത്തെ സമ്പൂർണ സംസ്ഥാനമായി കേരളം മാറുമെന്ന് പൊതുവിദ്യാഭ്യാസ വകുപ്പു മന്ത്രി പ്രൊഫ. സി.രവീന്ദ്രനാഥ് അറിയിച്ചു. Dt.21.1.2019.
************************
വൊക്കേഷണൽ ഹയർ സെക്കൻഡറി മാർച്ചിൽ നടത്തുന്ന ഒന്നും രണ്ടും വർഷ പൊതുപരീക്ഷക്ക് അപേക്ഷിച്ചിട്ടുള്ള എല്ലാ വിദ്യാർത്ഥികളുടെയും രജിസ്‌ട്രേഷൻ ഓൺലൈനായി സ്‌കൂൾ അധികൃതർ 23ന് വൈകിട്ട് അഞ്ച് മണിക്കകം പൂർത്തിയാക്കണമെന്ന് സെക്രട്ടറി അറിയിച്ചു. Dt.17.1.2019.
************************
സ്്കൂൾ കുട്ടികളുടെ ഗണിതശാസ്ത്രത്തിലുള്ള കഴിവുകൾ പരിപോഷിപ്പിക്കുന്നതിന് എസ്.സി.ഇ.ആർ.ടി നടപ്പിലാക്കുന്ന ന്യൂമാറ്റ്‌സ് പദ്ധതിയുടെ സംസ്ഥാനതല അഭിരുചി പരീക്ഷ ജനുവരി 19 ന് രാവിലെ 10.30 മുതൽ 11.30 വരെ താഴെപ്പറയുന്ന ജില്ലാ കേന്ദ്രങ്ങളിൽ നടത്തും. തിരുവനന്തപുരം- ഗവൺമെന്റ് മോഡൽ ഗേൾസ് എച്ച്.എസ്.എസ്. പട്ടം. കൊല്ലം- ഗവൺമെന്റ് മോഡൽ ബോയിസ് എച്ച്.എസ്.എസ്.കൊല്ലം. പത്തനംതിട്ട- ഗവൺമെന്റ് എച്ച്.എസ്.എസ്.പത്തനംതിട്ട. ആലപ്പുഴ- ഗവൺമെന്റ് മോഡൽ ഗേൾസ് എച്ച്.എസ്.എസ്. ആലപ്പുഴ. കോട്ടയം - ഗവൺമെന്റ് മോഡൽ എച്ച്.എസ്.എസ്. കോട്ടയം. ഇടുക്കി- ജി.വി.എച്ച്.എസ്.എസ്. തൊടുപുഴ. എറണാകുളം- ഗവൺമെന്റ് ഗേൾസ് എച്ച്.എസ്.എസ്. ആലുവ. തൃശൂർ- കാൾഡിയൻ സിറിയൻ എച്ച്.എസ്.എസ്. തൃശൂർ. പാലക്കാട്- ബി.ഇ.എം. എച്ച്.എസ്.എസ്. പാലക്കാട്. മലപ്പുറം- ജി.ബി.എച്ച്.എസ്.എസ്. മലപ്പുറം. കോഴിക്കോട്- ഗവൺമെന്റ് മോഡൽ ബോയിസ് എച്ച്.എസ്.എസ്. മാനാഞ്ചിറ. വയനാട്- ജി.എച്ച്.എസ്.എസ്. കണിയാംപെറ്റ. കണ്ണൂർ- തലശ്ശേരി ബ്രണ്ണൻ മോഡൽ എച്ച്.എസ്.എസ്. കാസർഗോഡ്- ജി.എച്ച്.എസ്.എസ്.കാസർഗോഡ് Dt.14.1.2019.
************************
തിരുവനന്തപുരം ജി.വി. രാജ സ്‌പോർട്‌സ് സ്‌കൂളിലും, കണ്ണൂർ സ്‌പോർട്‌സ് ഡിവിഷൻ സ്‌കൂളിലും ഏഴ്, എട്ട് ക്ലാസ്സുകളിൽ പ്രവേശനത്തിന് അത്‌ലറ്റിക്‌സ്, ബാസ്‌ക്കറ്റ്‌ബോൾ, ഫുട്‌ബോൾ, വോളിബോൾ, തായ്‌ക്കൊണ്ടോ, റസ്‌ലിങ്, ഹോക്കി, വെയ്റ്റ് ലിഫ്റ്റിംങ്, ബോക്‌സിങ്, ജൂഡോ എന്നീ കായികയിനങ്ങളിൽ താൽപ്പര്യമുള്ള കുട്ടികളെ തിരഞ്ഞെടുക്കുന്നു. സംസ്ഥാനത്തെ 200 പൊതുസ്‌കൂളുകളിലെയും 29 പട്ടികജാതി/പട്ടികവർഗ്ഗ സ്‌കൂളുകളിലെയും കുട്ടികൾക്കായി കായിക യുവജനകാര്യാലയം 65 കേന്ദ്രങ്ങളിലായി ജനുവരി 14 മുതൽ 18 വരെയാണ് ടാലന്റ് ഹണ്ട്. താൽപ്പര്യമുള്ള കുട്ടികൾ അതതു ജില്ലകളിലെ ബന്ധപ്പെട്ട കേന്ദ്രത്തിൽ ടാലന്റ് ഹണ്ട് നടത്തുന്ന ദിവസം നേരിട്ടെത്തണം. സ്‌കൂളുകളുടെ വിശദാംശം വെബ്‌സൈറ്റിൽ പ്രസിദ്ധീകരിച്ചിട്ടുണ്ട്. കൂടുതൽ വിവരങ്ങൾക്ക് www.sportskerala.in. ഫോൺ: 0471-2327271, 0471-2326644, 9895952713.Dt.10.1.2019.
************************
സംസ്ഥാന വിദ്യാഭ്യാസ ഗവേഷണ പരിശീലന സമിതി (എസ്.സി.ഇ.ആർ.ടി) നടപ്പിലാക്കുന്ന സാമൂഹ്യശാസ്ത്ര പ്രതിഭാപരിപോഷണ പരിപാടിയിലേക്കുള്ള (സ്റ്റെപ്‌സ്) സ്‌കൂൾതല സ്‌ക്രീനിംഗ് ടെസ്റ്റ് ജനുവരി 11ന് ഉച്ചയ്ക്ക് രണ്ട് മണി മുതൽ അതത് വിദ്യാലയങ്ങളിൽ നടത്തും. സംസ്ഥാനത്തെ സർക്കാർ/ എയ്ഡഡ് സ്‌കൂളുകളിലെ ആറാം ക്ലാസ് വിദ്യാർത്ഥികൾക്കായാണ് സ്‌ക്രീനിംഗ് ടെസ്റ്റ്. വിശദാംശങ്ങൾ ബന്ധപ്പെട്ട സ്‌കൂൾ/ ഉപജില്ലാ വിദ്യാഭ്യാസ ഓഫീസ് എന്നിവിടങ്ങളിൽ ലഭ്യമാണ്. Dt.5.1.20019.
************************
2017 ഒക്‌ടോബറിൽ നടന്ന ഒന്നാം വർഷ ഹയർസെക്കന്ററി തുല്യതാ പരീക്ഷയുടെ സ്‌കോർഷീറ്റുകൾ പരീക്ഷയ്ക്ക് രജിസ്റ്റർ ചെയ്ത കേന്ദ്രങ്ങളിലെ പ്രിൻസിപ്പാൾമാരിൽ നിന്നും ഇന്ന് (04.01.2019) മുതൽ സ്‌കോർഷീറ്റുകൾ കൈപ്പറ്റാം. Dt.3.1.20019.
************************
കേരള ടീച്ചേഴ്‌സ് എലിജിബിലിറ്റി ടെസ്റ്റ് (കെ-ടെറ്റ്) ജനുവരി 27, ഫെബ്രുവരി രണ്ട് തിയതികളിൽ സംസ്ഥാനത്തെ വിവിധ കേന്ദ്രങ്ങളിൽ നടത്തും. ഇതിനുള്ള അപേക്ഷകൾ ജനുവരി അഞ്ച് വരെ ഓൺലൈനായി സ്വീകരിക്കും. വിശദവിവരങ്ങൾ www.keralapareekshabhavan.in,Ktet.kerala.gov.in വെബ്‌സൈറ്റുകളിൽ ലഭ്യമാണ്. Dt.1.1.20019.
************************
പൊതുവിദ്യാലയങ്ങളിലെ വിദ്യാർത്ഥികളെ ജീവിതത്തിന്റെ എല്ലാ മേഖലകളിലും ജ്ഞാനമുള്ളവരാക്കാനാണ് പൊതുവിദ്യാഭ്യാസ സംരക്ഷണ യജ്ഞത്തിലൂടെ ശ്രമിക്കുന്നതെന്ന് പൊതുവിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ് പറഞ്ഞു. കൈറ്റിന്റെ ആഭിമുഖ്യത്തിൽ സംഘടിപ്പിച്ച കുട്ടി റിപ്പോർട്ടർമാർക്കുള്ള പരിശീലന ക്യാമ്പിന്റെ സംസ്ഥാനതല ഉദ്ഘാടനം നിർവഹിക്കുകയായിരുന്നു അദ്ദേഹം. വിവിധ തരം പരിശീലനം വിദ്യാർത്ഥികൾക്ക് നൽകുന്നതിനൊപ്പം അതാത് മേഖലയിലെ യഥാർത്ഥ നൈതികത സംബന്ധിച്ചും പഠിപ്പിക്കുന്നു. ഓരോ മേഖലയിലെയും നൈതികത വിദ്യാർത്ഥി തിരിച്ചറിയുമ്പോഴാണ് പൊതുവിദ്യാഭ്യാസ സംരക്ഷണ യജ്ഞം വിജയമാകുന്നത്. വിവരശേഖരണവും അവ ഓർമ്മിക്കുന്നുണ്ടോയെന്ന് പരിശോധിക്കലും മാത്രമല്ല പഠനം. വിദ്യാർത്ഥികൾക്ക് ലഭിക്കുന്ന വിവരങ്ങളെ അറിവായി മാറ്റണം. വിദ്യാർത്ഥികൾ വിവരങ്ങളുടെ ഉപഭോക്താക്കളല്ല, പകരം അറിവിന്റെ ഉദ്പാദകരാകണമെന്ന് മന്ത്രി പറഞ്ഞു. കുട്ടി റിപ്പോർട്ടർമാരുടെ ചിത്രം കാമറയിൽ പകർത്തിയാണ് മന്ത്രി ചടങ്ങ് ഉദ്ഘാടനം ചെയ്തത്. കുട്ടികൾ മന്ത്രിയുടെ ചിത്രവും കാമറകളിൽ പകർത്തി. 5710 ലിറ്റിൽ കൈറ്റ്‌സ് അംഗങ്ങളെയാണ് റിപ്പോർട്ടർമാരായി സജ്ജമാക്കുന്നത്. വാർത്ത കണ്ടെത്തൽ, സ്‌ക്രിപ്റ്റ് തയ്യാറാക്കൽ, കാമറയുടെ പ്രവർത്തനം, ഫോട്ടോഗ്രഫി, വീഡിയോ ഷൂട്ടിംഗ്, ഓഡിയോ റിക്കോർഡിംഗ്, ഓഡിയോ മിക്‌സിംഗ്, വീഡിയോ എഡിറ്റിംഗ്, ടൈറ്റ്‌ലിംഗ്, ആങ്കറിംഗ് എന്നിവയിലെല്ലാം പരിശീലനം നൽകും. പൊതുവിദ്യാഭ്യസ വകുപ്പ് സെക്രട്ടറി എ. ഷാജഹാൻ അധ്യക്ഷത വഹിച്ചു. കൈറ്റ് വൈസ്‌ചെയർമാൻ കെ. അൻവർ സാദത്ത് ചടങ്ങിൽ സംസാരിച്ചു. Dt.26.12.2018.
************************
പൊതുവിദ്യാലയങ്ങളിൽ പഠിക്കുന്ന ഗണിതത്തിൽ അഭിരുചിയുള്ള കുട്ടികൾക്കായി എസ്.സി.ഇ.ആർ.ടിയും പൊതുവിദ്യാഭ്യാസ വകുപ്പും സംയുക്തമായി നടത്തുന്ന പദ്ധതി ന്യൂമാറ്റ്‌സിൽ ഈ വർഷത്തെ ഉത്തരമേഖല (തൃശ്ശൂർ, മലപ്പുറം, പാലക്കാട്, കോഴിക്കോട്, കണ്ണൂർ, വയനാട്, കാസർഗോഡ്) ഏകദിന പഠനക്യാമ്പ് ഈ മാസം 27 ന് കോഴിക്കോട് നടക്കാവ് ഗവൺമെന്റ് ഗേൾസ് ഹയർസെക്കന്ററി സ്‌കൂളിൽ നടക്കും. ദക്ഷിണമേഖല (തിരുവനന്തപുരം, കൊല്ലം, പത്തനംതിട്ട, ആലപ്പഴ, കോട്ടയം, ഇടുക്കി, എറണാകുളം) ക്യാമ്പ് ഈ മാസം 30 ന് ചെങ്ങന്നൂർ ഗവൺമെന്റ് ബോയ്‌സ് ഹയർസെക്കന്ററി സ്‌കൂളിൽ വച്ചും നടക്കും. അന്നേദിവസം രാവിലെ 8.30 ന് അംഗങ്ങളായ എല്ലാ കുട്ടികളും ക്യാമ്പുകളിൽ എത്തണമെന്ന് ഡയറക്ടർ അറിയിച്ചു. Dt.24.12.2018.
************************
ഫെബ്രുവരി 23ന് നടത്തുന്ന എൽ.എസ്.എസ്./യു.എസ്.എസ്. പരീക്ഷയുടെ വിജ്ഞാപനമായി. പരീക്ഷാഭവന്റെ വെബ്‌സൈറ്റായ www.keralapareekshabhavan.in ൽ ലഭ്യമാണ്. Dt.22.12.2018.
************************
ലോവർ പ്രൈമറി വിഭാഗം, അപ്പർ പ്രൈമറി വിഭാഗം, ഹൈസ്‌കൂൾ വിഭാഗം സ്‌പെഷ്യൽ വിഭാഗം (ഭാഷാ-യു.പി. തലം വരെ/സ്‌പെഷ്യൽ വിഷയങ്ങൾ-ഹൈസ്‌കൂൾ തലം വരെ) എന്നിവയിലെ അദ്ധ്യാപക യോഗ്യത പരീക്ഷയ്ക്ക് (കെ-ടെറ്റ്) വിജ്ഞാപനമായി. കാറ്റഗറി I & II പരീക്ഷകൾ ജനുവരി 27 നും കാറ്റഗറി III & IV പരീക്ഷകൾ ഫെബ്രുവരി രണ്ടിനും കേരളത്തിലെ വിവിധ സെന്ററുകളിലായി നടക്കും. കെ-ടെറ്റ് ജനുവരി 2019 ൽ പങ്കെടുക്കുന്നതിനുള്ള ഓൺലൈൻ അപേക്ഷയും, ഫീസും www.keralapareekshabhavan.in,ktet.kerala.gov.in വെബ്‌പോർട്ടൽ എന്നിവ വഴി ജനുവരി രണ്ട് വരെ നല്കാം. ഒന്നിലധികം കാറ്റഗറികൾക്ക് അപേക്ഷിക്കുന്നവർ ഓരോ വിഭാഗത്തിനും 500 രൂപ വീതവും എസ്.സി./എസ്.റ്റി/പി.എച്ച്./ബ്ലൈൻഡ് വിഭാഗത്തിലുള്ളവർ 250 രൂപ വീതവും അടയ്ക്കണം. ഓൺലൈൻ നെറ്റ്ബാങ്കിംഗ്, ക്രെഡിറ്റ്/ഡെബിറ്റ് കാർഡ് എന്നിവ മുഖേന പരീക്ഷ ഫീസ് അടയ്ക്കാം. ഓരോ കാറ്റഗറിയിലേയ്ക്കും അപേക്ഷിക്കുവാനുള്ള യോഗ്യതയുടെ വിവരങ്ങൾ അടങ്ങിയ പ്രോസ്‌പെക്ടസ്, ഓൺലൈൻ രജിസ്‌ട്രേഷൻ നടത്തുന്നതിനുള്ള മാർഗ്ഗനിർദ്ദേശങ്ങൾ എന്നിവ www.keralapareekshabhavan.in,ktet.kerala.gov.in ൽ ലഭ്യമാണ്. ഒന്നോ അതിലധികമോ കാറ്റഗറികളിൽ ഒരുമിച്ച് ഒരു പ്രാവശ്യം മാത്രമേ അപേക്ഷിക്കാൻ കഴിയുകയുള്ളൂ. അപേക്ഷ സമർപ്പിച്ച് ഫീസ് അടച്ചാൽ കഴിഞ്ഞാൽ പിന്നിട് തിരുത്തലുകൾ അനുവദിക്കില്ല. നോട്ടിഫിക്കേഷനിലുള്ള മാർഗ്ഗനിർദ്ദേശങ്ങൾ അപേക്ഷിക്കുന്നതിനുമുമ്പ് ഡൗൺലോഡ് ചെയ്ത് വായിച്ചിരിക്കണം. പേര്, ജനനതിയതി, കാറ്റഗറി, ജാതി, വിഭാഗം എന്നിവയിൽ പിന്നീട് തിരുത്തലുകൽ അനുവദിക്കുന്നതല്ല. അഡ്മിറ്റ് കാർഡ് ജനുവരി 17 മുതൽ ഡൗൺലോഡ് ചെയ്യാം. കേരളത്തിലെ സർക്കാർ/എയ്ഡഡ് സ്‌കൂളുകളിലെ അദ്ധ്യാപക നിയമനത്തിന് യോഗ്യതാ മാനദണ്ഡമായി കെടെറ്റ് പരീക്ഷാ യോഗ്യത പരിഗണിക്കും. Dt.22.12.2018.
************************
പഠനത്തിനുള്ള ഡിജിറ്റൽ ഉള്ളടക്കം തയ്യാറാക്കുന്നതോടൊപ്പം വിദ്യാലയങ്ങളിൽ നിന്നുള്ള വാർത്തകളും പ്രവർത്തനങ്ങളും റിപ്പോർട്ടു ചെയ്യാൻ കഴിയുന്ന വിധത്തിൽ 5710 ലിറ്റിൽ കൈറ്റ്‌സ് അംഗങ്ങളെ സജ്ജമാക്കുന്നതിന് ഈ മാസം 26 മുതൽ ദ്വിദിന ക്യാമ്പുകൾ കേരളാ ഇൻഫ്രാസ്ട്രക്ചർ ആന്റ് ടെക്‌നോളജി ഫോർ എഡ്യൂക്കേഷൻ സംഘടിപ്പിക്കും. വാർത്തകൾ തയ്യാറാക്കുന്നതിന്റെ ഭാഗമായി വാർത്ത കണ്ടെത്തൽ, സ്‌ക്രിപ്റ്റ് രചന, ക്യാമറയുടെ പ്രവർത്തനം, ഫോട്ടോഗ്രഫി, വീഡിയോ ഷൂട്ടിംഗ്, ഓഡിയോ റെക്കോർഡിംഗ്, ഓഡിയോ മിക്‌സിംഗ്, വീഡിയോ എഡിറ്റിംഗ്, ടൈറ്റിലിങ്ങ്, അവതരണം എന്നിങ്ങനെയുള്ള പ്രവർത്തനങ്ങളിൽ ലിറ്റിൽ കൈറ്റ്‌സ് അംഗങ്ങൾക്ക് പരിശീലനം നൽകും. കുട്ടികൾ തയ്യാറാക്കുന്ന വീഡിയോകൾ ഹൈടെക് സ്‌കൂളുകളിലെ ഡിജിറ്റൽ ശൃംഖലവഴി കേന്ദ്രീകൃത സെർവറിലേക്ക് സ്‌കൂളുകൾക്ക് അപ്‌ലോഡുചെയ്യാനും കൈറ്റ് സംവിധാനം ഒരുക്കിയിട്ടുണ്ട്. ഹൈടെക് സ്‌കൂൾ പദ്ധതിയുടെ ഭാഗമായി സംസ്ഥാനത്തെ ഹൈസ്‌കൂൾ- ഹയർസെക്കൻഡറി വിഭാഗങ്ങളിലെ 4578 സ്‌കൂളുകൾക്ക് ഡി.എസ്.എൽ.ആർ ക്യാമറ ലഭ്യമാക്കിയിട്ടുണ്ടെന്ന് കൈറ്റ് വൈസ് ചെയർമാൻ കെ. അൻവർ സാദത്ത് അറിയിച്ചു. ഇവയുടെ പ്രവർത്തനം, പരിപാലനം എന്നിവയുമായി ബന്ധപ്പെട്ട മാർഗ്ഗനിർദ്ദേശങ്ങൾ നൽകിയിട്ടുണ്ട്. 'സമഗ്ര' പോർട്ടലിൽ അക്കാദമിക് സ്വഭാവമുള്ള ഡിജിറ്റൽ ഉള്ളടക്കം തയ്യാറാക്കുന്നതിനും പരിശീലനം നൽകും. കൈറ്റ് വിക്ടേഴ്‌സിലേക്കും മറ്റുമായി സ്‌കൂൾ വാർത്തകൾ തയ്യാറാക്കുന്നതിനുള്ള പ്രത്യേക പരിശീലനമാണ് പ്രത്യേക അവധിക്കാല ക്യാമ്പായി നടത്തുന്നത്. 266 സെന്ററുകളിൽ നടക്കുന്ന അവധിക്കാല ക്യാമ്പിന്റെ മുന്നോടിയായി 532 പരിശീലകർക്ക് കൈറ്റ് പരിശീലനം നൽകി. പൂർണമായും സ്വതന്ത്ര സോഫ്റ്റ്‌വെയർ അധിഷ്ഠിത മൾട്ടിമീഡിയ - ഗ്രാഫിക്‌സ് സങ്കേതങ്ങൾ ഉപയോഗിച്ച് ഇത്രയും കൂടുതൽ പേർക്ക് വാർത്തകൾ തയ്യാറാക്കുന്നതു മുതൽ അവയുടെ എഡിറ്റിംഗും സംപ്രേഷണവും ഉൾപ്പെടെ പൂർണ്ണതോതിലുള്ള പരിശീലനം നല്കുന്നത് ഇന്ത്യയിൽ ആദ്യമായാണ്. ക്യാമ്പിന്റെ സംസ്ഥാനതല ഉദ്ഘാടനം 26ന് രാവിലെ 11ന് തിരുവനന്തപുരം ജഗതി ബധിര വിദ്യാലയത്തിന് സമീപമുള്ള കൈറ്റിന്റെ പരിശീലന കേന്ദ്രത്തിൽ പൊതുവിദ്യാഭ്യാസ വകുപ്പ് മന്ത്രി പ്രൊഫ. സി. രവീന്ദ്രനാഥ് നിർവഹിക്കും. Dt.21.12.2018.
************************
സൂപ്പർ സ്‌പെഷ്യലൈസ്ഡ് ജീവനക്കാരുടെ കാലമാണിതെന്ന് മുഖ്യമന്ത്രി പിണറായി വിജയൻ പറഞ്ഞു. സാങ്കേതിക വളർച്ചയ്ക്ക് അനുസൃതമായ മാറ്റം സേവനത്തിലുണ്ടാവുന്നതോടൊപ്പം മാനവശേഷി വികസനവും അത്യാവശ്യമാണ്. സിഡിറ്റിന്റെ മുപ്പതാം വാർഷികാഘോഷം ഉദ്ഘാടനം ചെയ്യുകയായിരുന്നു അദ്ദേഹം. എല്ലാ മേഖലയിലും വൈദഗ്ധ്യമുള്ള മാനവിഭവശേഷി ലഭ്യമാക്കേണ്ടിവരും. സിഡിറ്റിലെ മാനവശേഷി കാലഹരണപ്പെടാതിരിക്കാൻ നൈപുണ്യ വികസന പദ്ധതികൾ നടപ്പാക്കണം. തൊഴിൽ സുരക്ഷയ്‌ക്കൊപ്പം ജീവനക്കാരുടെ ശേഷി വർദ്ധിപ്പിക്കാനുള്ള നടപടികൾ ഉണ്ടാകേണ്ടതുണ്ട്. സാങ്കേതിക മാറ്റം വേഗത്തിൽ ഉൾക്കൊള്ളുന്ന സ്ഥാപനങ്ങൾക്കു മാത്രമേ ഇനി വിജയം കൈവരിക്കാനാവൂ. ഗവേഷണ ഫലങ്ങൾ പ്രയോജനകരമായ ഉത്പന്നങ്ങളായി സമൂഹത്തിലേക്ക് എത്തുമ്പോഴാണ് ഒരു സ്ഥാപനത്തിന്റെ പൂർണത കൈവരുന്നത്. സർക്കാർ ഗ്രാന്റുകളെ ആശ്രയിക്കാതെ സ്വന്തം വരുമാനത്തിൽ നിന്ന് ആവശ്യമായ ഫണ്ട് കണ്ടെത്താനാവുന്നത് സിഡിറ്റിന്റെ മികവാണെന്ന് മുഖ്യമന്ത്രി പറഞ്ഞു. ഐ.ടി സെക്രട്ടറി എം. ശിവശങ്കർ അധ്യക്ഷത വഹിച്ചു. സി ഡിറ്റ് ബ്രോഷറും വീഡിയോയും ആരോഗ്യ മന്ത്രി കെ. കെ. ശൈലജ പ്രകാശനം ചെയ്തു. ചടങ്ങിൽ സിഡിറ്റിന് ലഭിച്ച ഐ.എസ്.ഒ സർട്ടിഫിക്കറ്റ് കൈമാറി. വിരമിച്ച ജീവനക്കാരെ ചടങ്ങിൽ ആദരിച്ചു. കൗൺസിലർ പാളയം രാജൻ, സി ഡിറ്റ് രജിസ്ട്രാർ ജി. ജയരാജ് എന്നിവർ സംബന്ധിച്ചു. Dt.20.12.2018.
************************
സംസ്ഥാന വിദ്യാഭ്യാസ ഗവേഷണ പരിശീലന സ്ഥാപനമായ എസ്.സി.ഇ.ആർ.ടി(കേരള) യിലെക്ക് ആർട്ട് എഡ്യൂക്കേഷൻ, ഇക്കണോമിക്‌സ്, സോഷ്യൽ സയൻസ് വിഷയങ്ങളിൽ റിസർച്ച് ഓഫിസർ തസ്തികയിൽ ഡെപ്യൂട്ടേഷനിൽ നിയമിക്കുന്നതിന് സർക്കാർ സ്‌കൂളുകൾ, സർക്കാർ അദ്ധ്യാപക പരിശീലന കേന്ദങ്ങൾ, സർക്കാർ കോളേജുകൾ, സർക്കാർ ട്രെയിനിംഗ് കോളേജുകൾ, സർവകലാശാലകൾ എന്നിവിടങ്ങളിലെ അദ്ധ്യാപകരിൽ നിന്നും നിശ്ചിത മാതൃകയിൽ അപേക്ഷ ക്ഷണിച്ചു. അപേക്ഷകൾ വകുപ്പു മേലധികാരികളുടെ എൻ.ഒ.സി. സഹിതം 31നകം ഡയറക്ടർ, എസ്.സി.ഇ.ആർ.ടി, വിദ്യാഭവൻ, പൂജപ്പുര, തിരുവനന്തപുരം-12 എന്ന വിലാസത്തിൽ ലഭിക്കണം. അഭിമുഖത്തിനു ശേഷമാണ് നിയമനം നടത്തുക. വിശദവിവരങ്ങൾ www.scert.kerala.gov.inൽ ലഭ്യമാണ്. Dt.19.12.2018.
************************
സംസ്ഥാനത്തിന് പുറത്ത് ദേശീയ പ്രാധാന്യമുള്ള വിദ്യാഭ്യാസ സ്ഥാപനങ്ങളിലും അഖിലേന്ത്യ പ്രവേശന പരീക്ഷയുടെ അയിസ്ഥാനത്തിൽ ഐ.ഐ.ടി, ഐ.ഐ.എം, ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ്, എയിംസ്, ടിസ് തുടങ്ങിയ ഉന്നത വിദ്യാഭ്യാസ സ്ഥാപനങ്ങളിലും ഗ്രാജ്വറ്റ് /പോസ്റ്റ് ഗ്രാജ്വറ്റ് കോഴ്‌സുകളിൽ പഠിക്കുന്ന ഒബിസി വിഭാഗം വിദ്യാർത്ഥികളിൽ നിന്നും പോസ്റ്റ്‌മെട്രിക് സ്‌കോളർഷിപ്പിലുള്ള അപേക്ഷ ക്ഷണിച്ചു. കുടുംബ വാർഷിക വരുമാനം ഒന്നര ലക്ഷം രൂപയിൽ അധികരിക്കരുത്. അപേക്ഷാ ഫോമിന്റെ മാതൃകയും കൂടുതൽ വിവരങ്ങളും പിന്നാക്ക സമുദായ വികസന വകുപ്പിന്റെ ഔദ്യോഗിക വെബ്‌സൈറ്റായ www.bcdd.kerala.gov.in ൽ ലഭിക്കും. ഫോൺ:0471-2727379, 0484-2429130, 0495-2377786 obcdirectorate@gmail.com എന്ന ഇ-മെയിൽ വിലാസത്തിലും ബന്ധപ്പെടാം. അപേക്ഷ ലഭിക്കേണ്ട അവസാന തിയതി ജനുവരി 15. Dt.19.12.2018.
************************
ഈ മാസം 14 ന് നടത്താനിരുന്ന ഹയർ സെക്കന്ററി/വൊക്കേഷണൽ ഹയർ സെക്കന്ററി രണ്ടാം പാദവാർഷിക പരീക്ഷ ജനുവരി മൂന്നിന് നടത്തും. Dt.19.12.2018.
************************
കേരള ഇൻഫ്രാസ്ട്രക്ചർ ആന്റ് ടെക്‌നോളജി ഫേർ എഡ്യൂക്കേഷനിൽ (കൈറ്റ്) ട്രെയിനി പ്രോഗ്രാമറാകാൻ അവസരം. കമ്പ്യൂട്ടർ സോഫ്റ്റ്‌വെയർ മേഖലയിൽ ഡിപ്ലോമ, ബിരുദം, ബിരുദാനന്തര ബിരുദം ഉള്ളവർക്ക് ഈ മാസം 31 വരെ അപേക്ഷിക്കാം. തെരഞ്ഞെടുക്കുന്നവർക്ക് 6 മാസത്തെ പ്രത്യേക പരിശീലനം നൽകും. കൂടുതൽ വിവരങ്ങൾക്കും അപേക്ഷ സമർപ്പിക്കുന്നതിനും www.kite.kerala.gov.in/careers സന്ദർശിക്കുക.Dt.17.12.2018.
************************
2018 ഒക്‌ടോബറിൽ നടത്തിയ കെ.ടെറ്റ് പരീക്ഷയുടെ ഫലം പ്രസിദ്ധപ്പെടുത്തി. പരീക്ഷാഭവൻ വെബ്‌സൈറ്റിലും www.ktet.kerala.gov.in എന്ന വെബ്‌പോർട്ടലിലും ലഭ്യമാണ്. നാലു കാറ്റഗറികളിലായി 69985 പേർ പരീക്ഷയെഴുതിയതിൽ 8178 പേർ കെ.ടെറ്റ് യോഗ്യതാ പരീക്ഷ വിജയിച്ചു. നാല് കാറ്റഗറികളിലായി ആകെ വിജയശതമാനം 11.69. കാറ്റഗറി-1 ൽ 2640 പേർ വിജയിച്ചു (വിജയശതമാനം 11.92). കാറ്റഗറി-2 ൽ 1741 പേർ വിജയിച്ചു (വിജയശതമാനം 10.42). കാറ്റഗറി-3 ൽ 2378 പേർ വിജയിച്ചു (വിജയശതമാനം 10.39). കാറ്റഗറി-4 ൽ 1419 പേർ വിജയിച്ചു (വിജയശതമാനം 17.24). പരീക്ഷ വിജയിച്ചവർ അസൽ സർട്ടിഫിക്കറ്റുകളുടെ പരിശോധനയ്ക്കായി അവരവരുടെ പരീക്ഷാ സെന്റർ സ്ഥിതി ചെയ്യുന്ന സ്ഥലത്തെ ജില്ലാവിദ്യാഭ്യാസ ഓഫീസിൽ ഹാജരാകണം. Dt.13.12.2018.
************************
പരീക്ഷാഭവൻ 2019 മാർച്ച് ഒന്നു മുതൽ എട്ടു വരെ നടത്തുന്ന എൽ.പി/യു.പി വിഭാഗങ്ങളിലെ അറബിക്/ഉറുദു/സംസ്‌കൃതം ഭാഷാധ്യാപക യോഗ്യത പരീക്ഷയുടെ അപേക്ഷ 300 രൂപ സൂപ്പർ ഫൈനോടു കൂടി ശനിയാഴ്ച വൈകുന്നേരം അഞ്ച് മണി വരെ സ്വീകരിക്കും. Dt.13.12.2018.
************************
ഈ അധ്യയനവർഷത്തെ ജില്ലാ, സംസ്ഥാന കലോത്സവങ്ങളുടെ അനുഭവങ്ങൾ പരിഗണിച്ച് കലോത്സവ മാന്വൽ പരിഷ്‌കരിക്കുന്നതിനും 2019-20 വർഷത്തെ ജില്ലാ, സംസ്ഥാന കലോത്സവങ്ങൾക്കാവശ്യമായ ജഡ്ജസ് പാനൽ കലോത്സവാരംഭത്തിന് ഒരുമാസം മുതലെങ്കിലും തയ്യാറാക്കുന്നതിനും ആവശ്യമായ നടപടികൾ സ്വീകരിക്കാൻ പൊതുവിദ്യാഭ്യാസ ഡയറക്ടർക്ക് നിർദേശം നൽകിയതായി പൊതുവിദ്യാഭ്യാസമന്ത്രിയുടെ ഓഫീസ് അറിയിച്ചു. Dt.12.12.2018.
************************
2018 ജൂൺ 23, 30 തിയതികളിലായി നടന്ന കെ-ടെറ്റ് പരീക്ഷ വിജയിച്ച് നവംബർ 20 വരെ ഓൺലൈൻ വെരിഫിക്കേഷൻ പൂർത്തീകരിച്ചവരുടെ സർട്ടിഫിക്കറ്റുകൾ സംസ്ഥാനത്തെ 41 ജില്ലാ വിദ്യാഭ്യാസ ഓഫീസുകളിലും എത്തിച്ചതായി പരീക്ഷാ സെക്രട്ടറി അറിയിച്ചു. Dt.12.12.2018.
************************
തിരഞ്ഞെടുപ്പ് ജോലിയിൽ വീഴ്ച: അധ്യാപകനെതിരെ കേസ് തദ്ദേശഭരണ ഉപതിരഞ്ഞെടുപ്പ് ജോലിയിൽ വീഴ്ച വരുത്തിയ പാലക്കാട്, കണ്ണാടി ഹൈസ്‌കൂളിലെ അധ്യാപകൻ കെ. പ്രജിത്തിനെതിരെ സംസ്ഥാന തിരഞ്ഞെടുപ്പ് കമ്മീഷൻ നിയമനടപടി സ്വീകരിച്ചു. പാലക്കാട് ജില്ലയിലെ കുഴൽമന്ദം ബ്ലോക്ക്പഞ്ചായത്തിലേക്ക് 2018 മേയ് 31-ന് നടന്ന ഉപതിരഞ്ഞെടുപ്പിൽ കോട്ടായി പോളിംഗ് സ്റ്റേഷനിൽ തിരഞ്ഞെടുപ്പ് ജോലികൾക്കായി ഇയാളെ പാലക്കാട് ജില്ലാ തിരഞ്ഞെടുപ്പ് ഉദേ്യാഗസ്ഥൻ നിയമിച്ചിരുന്നു. എന്നാൽ ഉത്തരവ് ലഭിച്ചിട്ടും ഔദേ്യാഗിക ചുമതലകൾ നിർവ്വഹിക്കുന്നതിൽ കൃത്യവിലോപം വരുത്തിയത് കേരള പഞ്ചായത്ത് രാജ് ആക്ട് 133-ാം വകുപ്പ് പ്രകാരം കുറ്റകരവും ശിക്ഷാർഹവുമാണ്. നിയമ നടപടികളുടെ ഭാഗമായി ഇയാൾക്കെതിരെ പാലക്കാട് ജുഡീഷ്യൽ ഒന്നാംക്ലാസ് മജിസ്‌ട്രേറ്റ് കോടതിയിൽ നൽകിയ 2444/2018-ാം നമ്പർ കേസ് കോടതി ഫയലിൽ സ്വീകരിച്ചു. Dt.12.12.2018.
************************
59ാം സംസ്ഥാന സ്‌കൂൾ കലോൽസവത്തിലെ 46 സ്റ്റേജിതര മത്സരങ്ങളുടെ സൃഷ്ടികളും സ്‌കൂൾ വിക്കിയിൽ ലഭ്യമാക്കി. www.schoolwiki.in എന്ന പോർട്ടലിൽ 'കലോൽസവ സൃഷ്ടികൾ' എന്ന പേജിലൂടെ വരകൾ, രചനകൾ എന്ന വിഭാഗങ്ങളിൽ വിവിധ ഗ്രേഡുകൾ ലഭിച്ച സൃഷ്ടികൾ അവയുടെ പകർപ്പും, കുട്ടികളുടെ പേരും, സ്‌കൂളിന്റെ പേജും ഉൾപ്പെടെ കാണാനാകും. മലയാളം, ഇംഗ്ലീഷ്, ഹിന്ദി, അറബിക്, സംസ്‌കൃതം, ഉറുദു എന്നീ ഭാഷകളിലെ കഥ, കവിത, ഉപന്യാസം എന്നിവയും ചിത്രരചനയിൽ പെൻസിൽ, ജലഛായം, എണ്ണഛായം, കൊളാഷ്, കാർട്ടൂൺ എന്നിവയുമാണ് സ്‌കൂൾ വിക്കിയിൽ അപ്‌ലോഡ് ചെയ്തത്. കായംകുളം ശ്രീ വട്ടോബ ഹൈസ്‌കൂളിലെ 'ലിറ്റിൽ കൈറ്റ്‌സ്' ഐ.ടി ക്ലബ്ബിന്റെ സഹായത്തോടെയാണ് ഈ വർഷം സ്റ്റേജിതര മത്സരങ്ങൾ കേരള ഇൻഫ്രാസ്ട്രക്ചർ ആൻഡ് ടെക്‌നോളജി ഫോർ എഡ്യൂക്കേഷൻ (കൈറ്റ്) ഡിജിറ്റൈസ് ചെയ്തത്. കണ്ണൂരിൽ നടന്ന 57ാമത് കലോൽസവം മുതലാണ് സ്റ്റേജിതര മത്സരങ്ങൾ സ്‌കൂൾ വിക്കിയിൽ നൽകാൻ തുടങ്ങിയത്. അടുത്ത വർഷം മുതൽ സബ്ജില്ലാ ജില്ലാ കലോൽസവ സൃഷ്ടികളും സ്‌കൂൾ വിക്കിയിൽ ഉൾപ്പെടുത്താൻ സംവിധാനം ഏർപ്പെടുത്തുമെന്ന് കൈറ്റ് വൈസ് ചെയർമാൻ & എക്‌സിക്യൂട്ടീവ് ഡയറക്ടർ കെ. അൻവർസാദത്ത് അറിയിച്ചു. Dt.12.12.2018.
************************
2019 മാർച്ചിൽ നടക്കുന്ന എസ്.എസ്.എൽ.സി പരീക്ഷയുടെ ഫീസ് 300 രൂപ സൂപ്പർഫൈനോടുകൂടി ഡിസംബർ ഏഴു മുതൽ ഡിസംബർ 12 വരെ പരീക്ഷാ കേന്ദ്രങ്ങളിൽ സ്വീകരിക്കും. Dt.6.12.2018.
************************
ഹയർ സെക്കൻഡറി അധ്യാപക പരിവർത്തനോന്മുഖ പരിപാടിയുടെ പത്തുദിവസത്തെ റസിഡൻഷ്യൽ പ്രോഗ്രാമിന്റെ രണ്ടാം ബാച്ചിലേക്കുള്ള അപേക്ഷകൾ ക്ഷണിച്ചു. 2019 ജനുവരി 25 മുതൽ ഫെബ്രുവരി മൂന്ന് വരെയാണ് കോഴ്‌സ്. മലയാളം, ഇംഗ്ലീഷ്, ഗണിതം, ഫിസിക്‌സ്, കെമിസ്ട്രി, ബയോളജി, ഹിസ്റ്ററി, ഇക്കണോമിക്‌സ്, പൊളിറ്റിക്കൽ സയൻസ്, കൊമേഴ്‌സ് വിഷയങ്ങളിലെ കോഴ്‌സിന് 20 വൈകിട്ട് 5 വരെ അപേക്ഷിക്കാം. ഓൺലൈൻ അപേക്ഷയുടെ നിർദ്ദിഷ്ട ഭാഗത്ത് 150 x 100 mb jpg ഫോർമാറ്റിലുള്ള പാസ്‌പോർട്ട് സൈസ് ഫോട്ടോയും അപ്‌ലോഡ് ചെയ്യണം. അപേക്ഷകർ www.hscap.kerala.gov.in ൽ ഹോംപേജിലെ HSSTTP എന്ന ടാബിൽ ക്ലിക്ക് ചെയ്ത് ഓൺലൈൻ അപേക്ഷകൾ പ്രിൻസിപ്പാളിനു സമർപ്പിക്കണം. പ്രിൻസിപ്പാൾ ഡിസംബർ 20 ന് വൈകിട്ട് 5 നകം ഡയറക്ടറേറ്റിലേക്ക് ഫോർവേഡ് ചെയ്യണം. Dt.4.12.2018.
************************

Ranjith Kumar A.K